د «لاجوردو» د لارې قرارداد نن چهارشنبه «۱۳۹۶ کال د لړم ۲۴» د ترکمنستان په مرکز عشقاباد کې د "ریکا" د سیمهییزو اقتصادي همکاریو د سازمان په اوومه غونډه کې لاسلیک شو.
د افغانستان د بهرنیو چارو وزیر صلاحالدین رباني وویل چې دغه قرارداد په اساسي پروژو د پانګې لګونې له لارې د ټرانسپورت او سوداګرۍ د پراختیا لپاره د ګډو زیارونو په نتیجه کې لاسلیک شو.
د لاجوردو د لارې قرارداد د افغانستان، ترکیې، ترکمنستان، اذربایجان او ګرجستان ترمنځ لاسلیک شو.
د لاجوردو لاره په ترکمنستان، اذربایجان او ګرجستان تېرېږي بیا په تور سمندر ترکیې ته رسېږي.
افغانستان چې سمندر ته مستقیمه لار نهلري د لاجورد په لار ازادو اوبو سره ځان نښلوي.
د افغانستان د بهرنیو چارو وزیر د "ریکا" یا د سیمهییزو اقتصادي همکاریو په غونډه کې د نورو اقتصادي لاسته راوړنو یادونه هم وکړه.
صلاحالدین رباني وویل افغانستان ته د ترکمنستان د ۵۰۰ کېلو ولټ برېښنا د لېږد د ګډې اعلامیې لاسلیک هم یوه لویه لاسته راوړنه ده چې د سیمهییزو اقتصادي همکاریو دوامداره پرمختک څرګندوي.
د افغانستان د بهرنیو چارو وزیر د افغانستان او هند ترمنځ هوايي دهلېز ته هم اشاره وکړه او ویېویل چې په تېرو ۵ میاشتو کې د افغاني سوادګرو ۱۱۵۰ ټنه اقلام هند ته صادر شوي دي.
په عشقاباد کې د افغانستان په اړه د سیمهییزو اقتصادي همکاریو دوه ورځنۍ غونډه نن پای ته رسېږي.
د بهرنیو چاور د وزیر صلاحالدین رباني تر څنګ د افغانستان له لوري د ولسمشر دوهم مرستیال سرور دانش هم په غونډه کې برخه اخیستې.
د سیمهییزو اقتصادي همکاریو سازمان یا "ریکا" په ۲۰۰۵ کال تأسیس شوی دی.
مخکنۍ غونډې یې په کابل، استانبول، نوې ډهلي او اسلاماباد کې شوي دي.