د امریکا بېپیلوټه الوتکو په دې وروستیو کې د کرمې اېجنسۍ قبایلي سیمه هدف وګرځوله او څه باندې ۲۰ وسلهوالیې ووژل.
د پاکستان په یوه قبایلي سیمه کې روانه اوونۍ د امریکا بېپیلوټه الوتکو دوه وار جلا حملې وکړې.
په هغې حمله کې چې د سې شنبې په ورځ پر کرمې اېجنسۍ وشوه د پاکستاني چارواکو په خبره د څو مهمو قوماندانانو په شمول ۱۱ وسلهوال اورپکي هم ووژل شول.
یوه ورځ مخکې تر دې هم ۲۰ تنه وسلهوال هغه وخت ووژل شول چې د افغانستان او پاکستان په پوله کې پر کرمې اېجنسۍ باندې د بېپیلوټه الوتکې د حملې هدف وګرځېدل.
د کرمې اېجنسۍ یو سیمهییز مقام بصیر وزیر روېټرز اژانس ته وویل چې د امریکا بېپيلوته الوتکو د وسلهوالو طالبانو مرکزونه ویشتي دي.
د طالبانو اړوند ځینو سرچینو روېټرز ته ویلي چې د امریکا بېپيلوټه الوتکو په دوو وروستیو حملو کې د حقاني شبکې ۲۴ تنه غړي وژل شوي او په منځکې یې د دې شبکې څو مهم قوماندانان هم شامل دي.
خو د پکتیا د والي ویاند عبدالله حسرت ویلي چې د سې شنبې په ورځ په کرمې اېجنسۍ کې په حملې سره ۳۴ پاکستاني طالبان وژل شوي چې پهکې د دې ډلې مهم قوماندان ابوبکر هم شامل دی او ۱۵ تنه نور یې ټپيان دي.
په ولسي جرګه کې د پکتیا د خلکو استازي مجیبالرحمن څمکني هم اسوشیټېډ پرس ته ویلي چې پر وسلهوالو طالبانو دوهمه حمله هغه وخت وشوه چې هغوی د تېرې ورځې د برید په نتیجه کې د مړو شویو طالبانو جسدونه ټولول.
استخباراتي سرچینو ویلي چې د امریکا بېپيلوټه الوتکو په دې وروستیو کې د دې لپاره هوايي حملې وکړې چې د حقاني شبکې وسلهوال او د پاکستاني طالبانو «تحریک طالبان پاکستان» مهم قوماندان ابوبکر په نښه کړي.
دوی په دې وروستیو کې له شمالي وزیرستانه کرمې اېجنسۍ ته کډه شوي دي.
قبایلي سیمې د ترهګرو عمده پټنځایونه بلل کېږي چې پر افغانستان باندې ډېرې حملې هم له دې ځایه پلانېږي.
خو د پاکستاني پوځ مطبوعاتي دفتر د سې شنبې په ورځ په یوې خپره کړې خبرپاڼه کې ویلي چې د پاکستان د هوايي حریم سرغړونه نهده شوې او نهیې هم پر خاوره د بېپیلوټه الوتکو بریدونه شوي.
په کرمې ایجنسۍ کې داسې وخت زیات شمېر سخت دریځي وسلهوال وژل کېږي چې د سې شنبې په ورځ په افغانستان کې د وسلهوالو طالبانو په جلا حملو کې نږدې ۸۰ کسان ووژل شول.
ډېری دا حملې د پوځي اهدافو پر سر وشوې، خو له ګڼو ملکیانو یې هم قرباني واخیسته.
راپور: صفيالله ستانکزی