د پاکستان پوځي چارواکو هغه راپورونه رد کړي چې وايي، افغان پولې ته څېرمه د کورمې اېجنسۍ په قبایلي سیمه کې د ترهګرو پر مرکزونو د امریکا بېپیلوټه الوتکو بریدونه کړي دي.
دا په داسې حال کې ده چې ځینو خبري اژانسونو د پاکستان د استخباراتي ادارې د چارواکو په حواله ویلي وو چې په کورمه اېجنسۍ کې د امریکا بېپېلوټه الوتکو د مشکوکو وسلهوالو پر مرکزونو پرلهپسې ۳ بریدونه کړي چې په نتیجه کې یې لږ تر لږه ۳۱ وسلهوال وژل شوي دي.
خو د پاکستاني پوځ مطبوعاتي دفتر د سې شنبې په ورځ په یوې خپره کړې خبرپاڼه کې ویلي چې د پاکستان د هوايي حریم سرغړونه نهده شوې او نهیې هم پر خاوره د بېپیلوټه الوتکو بریدونه شوي.
خبرپاڼه وايي چې د کورمې اېجنسۍ قبایلي سیمې ته د افغانستان په خوست او پکتیا ولایتونو کې د افغان او بهرنیو ځواکونو عملیات روان دي چې په ترڅ کې یې هوايي بریدونه هم شوي او ګڼ شمېر وسلهوالو ته پهکې مرګ ژوبله اوښتې ده.
خبرپاڼې د پوځ د ویاند په حواله ویلي:
"افغانستان ته د پوځ د مشر جنرال قمر جاوید باجوه تر سفر وروسته د دواړو هېوادونو د پوځیانو ترمنځ همغږي زیاته شوې ده."
په دې وروستیو کې د افغانستان او پاکستان پر پوله په پرتو قبایلي سیمو کې د مشکوکو وسلهوالو پر مرکزونو د امریکا د بېپیلوټه الوتکو بریدونه ډېر شوي دي.
دا بریدونه تر هغې وروسته ډېر شوي چې د امریکا نوي ولسمشر ډونالد ټرمپ د اګسټ په ۲۱مه نېټه د افغانستان او سیمې لپاره د خپلې نوې تګلارې د اعلانولو پر مهال پاکستان د وسلهوالو په ملاتړ تورن کړ او ویېویل چې وسلهوال ترهګر دغه خاوره په افغانستان کې د بهرنیو او افغان ځواکونو پر ضد کاروي.
پاکستان بیا دغه تورونه رد کړي او ټینګار کوي چې پر خپله خاورهیې د ترهګرو پر ضد په پوځي عملیاتو کې د ټولو ترهګرو پر ضد یو ډول عملیات کړي او زیاتوي چې خپله خاوره د چا پر ضد کارېدو ته نهپرېږدي.
د یادونې وړ ده چې له تېرو نږدې ۸ کلونو راهیسې په قبایلي سیمو کې د مشکوکو وسلهوالو پر مرکزونو د امریکا د بېپیلوټه الوتکو بریدونه روان دي چې په نتیجه کې یې د تحریک طالبان پاکستان د دوو مشرانو حکیمالله محسود او بیتالله محسود په ګډون ګڼ شمېر وسلهوال وژل شوي دي.
