د پاکستان واکمن مسلملیګ نون ګوند پرېکړه کړې چې شهباز شریف به د دغه هېواد راتلونکی صدراعظم وي، خو تر هغه چې نوموړی د پارلمان غړیتوب تر لاسه کوي، شاهد خاقان عباسي به د لنډ مهالي صدراعظم په توګه کار کوي.
د پاکستان مخکیني صدراعظم نواز شریف د سترې محکمې لهخوا تر نااهله کېدو وروسته دا اعلان د شنبې په ورځ مازدیګر په اسلاماباد کې د خپل ګوند مسلم لیګ نون په هغه غونډه کې وکړ چې د نوي صدراعظم د ټاکلو لپاره رابلل شوې وه او د یاد ګوند مخکښو غړیو پهکې ګډون کړی و.
د پاکستان سترې محکمې د دې هېواد مخکینی صدراعظم نواز شریف د تېرې جمعې په ورځ د پاناما اسنادو په قضیه کې د درغلیو په تور نااهله وګرځاوه او د هغه پر ضد یې په احتساب عدالت کې د قضیې د داېرولو امر ورکړ چې ورسره سم ښاغلي شریف له خپلې دندې استعفا وکړه.
د پاکستان د اساسي قانون له مخې د صدراعظم تر استعفا وروسته د هغه کابینه هم ړنګه شوه او نوی صدراعظم به یې له سره ټاکي.
ښاغلي شریف د خپل ګوند مشرانو په غونډه کې د وینا پرمهال د صدراعظم په توګه د خپل کشر ورور شهباز شریف نوم وړاندې کړ چې د ګوند د مشرتابه او مخکښو غړیو له خوا تائید شو.
شهباز شریف چې دا مهال د پنجاب ایالات اعلی وزیر دی او د ملي پارلمان غړیتوب نهلري، نو د پاکستان د قانون له مخې نهشي کولای د صدراعظم په توګه وټاکل شي، بلکې د دې لپاره به نوموړی لومړی د پارلمان غړیتوب ترلاسه کوي.
نواز شریف غونډې ته د وینا پر مهال وویل، ترهغه چې شهباز شریف د پارلمان غړیتوب ترلاسه کوي، نو شاهد خاقان عباسي به د لنډمهالي صدراعظم په توګه دنده ترسره کوي.
نوموړی په دې اړه وايي:
"لکه څنګه چې ما خپل منصب پریښی دی، نو تر کافي غور او فکر وروسته ما دا پریکړه کړې او غواړم چې ستاسو مخې ته کېدم او هغه دا چې ما شهبازشریف د پاکستان د راتلونکي صدراعظم په توګه د ټاکلو پریکړه کړې، خو لکه څنګه چې دا به یو څه وخت اخلي، نو تر هغې به شاهد خاقان عباسي د پاکستان د لنډ مهاله صدراعظم په توګه دنده ترسره کوي."
د پاکستان د لنډ مهالي صدراعظم په توګه نومول شوی شاهد خاقان عباسي د مسلم لیګ نون ډلې یو مهم مخکښ دی چې له راولپنډۍ څخه د قومي اسمبلۍ غړی او همدا شان د نواز شریف د حکومت پر مهال یې د هغه په کابینه کې د نفتو د وزیر په توګه دنده ترسره کوله.
عباسي د نواز شریف تر اعلان وروسته د پاکستان له دولتي تلویزیزون سره په خبرو کې وویل، ګوند پر ده باور کړی او دی به هڅه کوي چې د هېواد چارې په سمه توګه پرمخ یوسي او راتلونکي صدراعظم ته یې وسپاري.
د یادونې وړ ده چې د صدراعظمۍ لپاره به واکمن مسلم لیګ نون ګوند لومړی شهباز شریف د ضمني ټاکنو له لارې د قومي اسمبلۍ غړی جوړوي او بیا به په پارلمان کې هغه ته له اکثریتي رأیو ورکولو وروسته نوموړی د پاکستان صدراعظم جوړېږي.
راپور: ذبیح مومند
- پخواني معلومات:
د پاکستان لېرې کړای شوي صدراعظم نوازشریف خپل ورور شهباز شریف خپل ځای ناستی اعلان کړ.
نوموړي د شنبې په ورځ په اسلاماباد کې د خپل ګوند پلویانو ته په یوه ټلویزیوني وینا کې وویل چې د شهباز شریف تر راتلو به د دغه هېواد د تیلو پخوانی وزیر شاهد خاقان عباسي د هېواد مؤقت صدراعظم وي.
د مسلملیګ نون ګوند مشر نواز شریف د شنبې په مازدیګر خپل ګوند ته په یوه ټلویزیوني وینا کې وویل:
"زه ترما وروسته د شهباز شریف ملاتړ کوم، خو هغه په انتخاباتو کې د سیالۍ لپاره وخت ته اړتیا لري، نو ځکه د اوس لپاره شاهد خاقان عباسي کاندید کوم. "
شاهد خاقان عباسي د مسلملیګ نون ډلې یو مهم غړی دی او له راولپنډۍ څخه د قومي اسمبلۍ غړی دی.
شهباز شریف د پاکستان د لېرې کړای شوي صدراعظم نوازشریف کشر ورور دی او له ۲۰۰۸ میلادي کال راهیسې د پنجاب ایالت د وزیر اعلی په توګه دنده پر مخ وړي.
مؤقت صدراعظم به د لږ تر لږه ۴۵ ورځو لپاره واکمن وي ترڅو چې شهباز شریف د پنجاب د وزیر اعلی په توګه له خپلې دندې استعفی ورکوي او بیا به په انتخاباتو کې ګډون کوي.
د پاکستان له قوانینو سره سم د صدراعظم تر استعفا وروسته به د هغه کابینه هم له سره جوړېږي.
د پاکستان سترې محکمې د جولای پر ۲۸ د مسلم لیګ نون ګوند مشر نواز شریف اداري فساد په تور بې واکه کړ.
شریف په فساد کې ښکیلتیا ردوي.
د دې ترڅنګ محکمې د پاکستان د احتساب قومي ادارې ته امر وکړ چې په شپږو اونیو کې دې د صدراعظم او د هغه د کورنیو د غړو پرضد مقدمه درج کړي.
نوازشریف د محکمې تر پریکړې وروسته خپله استعفی اعلان کړه.
له ۱۹۴۷ میلادي کال راهیسې چې پاکستان د بریتانیا له استعماره خپلواکي واخېستله، په دغه هېواد کې هېڅ صدراعظم د خپلې واکمنۍ پنځه کلنه دوره نهده بشپړه کړې.
د ۶۷ کلن نوازشریف د صدراعظمې یوه بله تېره دوره په ۱۹۹۹ کې د یوې پوځي کودتا په پایله کې لنډه شوه.
