د افغانستان د ملي وحدت حکومت مشرانو په تهران کې د چهارشنبې د ورځې بریدونه وغندل.
په دې حملو کې ۱۲ تنه وژل شوي او ۴۳ نور ټپیان شوي دي.
د افغانستان جمهوري ریاست ویلي دي چې زموږ ګاونډیان باید د ترورېزم ګواښ ته جدي پاملرنه وکړي.
د افغانستان اجرائیه ریاست بیا په یوې اعلامیه کې څرګنده کړې ده چې هېڅ هېواد د ترورېزم له شره په امان نهدی.
د افغانستان د بهرنیو چارو د وزارت سیاسي مرستیال حکمت خلیل کرزي پرون په کابل کې خبري غونډې ته د دې حملو په اړه وویل:
"زه غواړم چې خپله خواخوږي څرګنده کړم او د ایران په پارلمان باندې برید په سختو ټکو وغندم."
د اسلامي دولت ډلې یا داعش د دې حملو مسؤلیت په غاړه اخیستی دی، خو د ایران سپاه پاسداران ویلي دي چې د امریکا متحده ایالاتو او سعودي عربستان دا بریدونه کړي دي او خپل غچ به واخلي.
د ایران پر پارلمان او د خُمیني پر مقبره حمله کې ۱۲ تنه وژل شوي ۴۲ ټپيان دي
تهران کې دوه انتحاري حملې او په یو شمېر خلکو ډزې شوي
د سپاه پاسداران انقلاب په اعلامیه کې راغلي دي چې دا بریدونه یوه اوونۍ وروسته تر دې وشول چې د امریکا ولسمشر د سعودي عربستان له چارواکو سره وکتل او د دې لپاره چې داعش د دې حملو مسؤلیت منلی دی دا ثابتېږي چې دغه دوه هېوادونهیې تر شا دي.
د سپاه پاسدران انقلاب مرستیال محمد حسین نجات، فارس خبري اژانس ته وویل، کومو کسانو چې پر پارلمان برید وکړ له ۲۰ تر ۲۵ کلونو پورې عمرونهیې درلودل.
د ایران د بهرنیو چارو وزیر جواد ظریف بیا په انقره کې خبریالانو ته وویل چې زموږ عزم به له ترهګرو سره په مبارزه کې دا بریدونه لا پیاوړي کړي.
نوموړي زیاته کړه:
"د امام خمیني پر زیارت او د ایران پر پارلمان د بریدونو له امله د خپل هېواد له خلکو سره خواخوږي څرګندوم. دا ډول کارونه به زموږ اراده له ترورېزم سره په مبارزه کې نوره هم غښتلې کړي. د ایران ټول ملت او پوځ به د دې ملکي ګواښ په وړاندې ودرېږي."
د ایران ولسمشر حسن روحاني هم ویلي دي چې دغه ډول بریدونه به د ترورېزم پر وړاندې ایران نور هم یو موټی کړي، خو د ایران پخواني ولسمشر ابوالحسن بني صدر ازادي راډیو ته وویل چې ایران د ګڼو هېوادونو په جګړو کې لاس لري، نو نهشي کولای چې خپلې دروازې د ترورېستانو پر مخ وتړي.
دی وايي:
"د ایران رژیم په سیمه کې په شپږو جګړو کې برخه لري چې یو یې د ترور له لارې جګړه ده. له دې امله کله چې داسې جګړه په سیمه کې شته نو نهشي کېدای چې د خپل هېواد پولې وتړي که هر رنګه وي داسې ترورېستي بریدونه په ایران کې هم ترسره کېږي."
د ایران د چهارشنبې د ورځې بریدونه د امریکا متحده ایالاتو غندلي دي، خو واشنګټن ویلي دي چې ایران د ترورېستانو ملاتړ کوي او اوس هغوی د ایران د خلکو لور ته مخ اړولی دی.
امریکا ایران په منځني ختیځ کې په ناکراریو او د ترورېستي فعالیتونو په ملاتړ تورن کړی دی.
د ملګرو ملتونو سرمنشي انتونیو ګوترس هم په ایران کې بریدونه غندلي دي او ویلي یې دي هغه کسان چې په دې ناوړه بریدونو کې لاس لري باید سزا ورکړل شي.
