د افغان امنیتي ارګانونو یوه باوري سرچینه وايي چې کابل کې د یوې جرمنۍ مېرمنې د وژنې او د یوې فنلنډۍ ښځې د تښتولو پېښه جنايي نه، بلکې یو ترورېستي عمل دی.
دغې سرچینې چې نهیې غوښتل نوم او غږ یې خپور شي د پنجشنبې په ورځ ازادي راډيو ته وویل چې د دغې پېښې د مجرمینو د نیولو او د فنلنډۍ مېرمنې د خلاصون لپاره د دوی عملیات روان دي.
سرچینه زیاتوي چې تر اوسه دوی په څو ځایونو کې عملیات کړي، خو لاسته راوړنهیې نهدرلوده او لا هم د نوموړې بهرنۍ مېرمنې د پیدا کولو په هدف عملیات روان دي.
د تېرې شنبې په شپه ناپېژنده وسلهوالو د کابل ښار په لوېدیځ دارالامان سیمه کې پر یو مېلمستون حمله وکړه یوه جرمنۍ مېرمنیې ووژله او د یوه افغان ساتونکي سر یې غوڅ کړ.
د دې تر څنګ برید کوونکو یوه بله فنلنډۍ مېرمنه ژوندۍ له ځانه سره وړې ده.
تر اوسه د دغې پېښې مسؤلیت کومې ډلې نهدی منلی.
د ولسي جرګې د کورني امنیت کمېسیون له امنیتي ځواکونو غواړي چې د تښتول شوې مېرمنې د خلاصون او د تښتوونکو د موندنې برخه کې خپلې هڅې تېزې کړي.
د دغه کمېسیون مرستیال عبدالحی اخندزاده ازادي راډیو ته وايي چې امنیتي ځواکونه باید په بشپړ توان سره څومره چې ژر کېدای شي تښتول شوې بهرنۍ مېرمن د تښتوونکو له منګولو ژوندۍ راخوشې کړي.
نوموړی وايي:
"امنیتي ارګانونه باید د تښتول شوې ښځې خلاصون ته جدي توجه وکړي، دوی باید داسې اقدامات وکړي چې تښتول شوې بهرنۍ مېرمن ژوندۍ راخوشې کړي."
دا لومړی ځل نهدی چې په کابل کې بهرنیان تښتول کېږي بلکې د تېر لمریز کال په اسد میاشت کې د افغان امریکايي پوهنتون دوه تنه استادان د کابل د دارالامان په سیمه کې داسې مهال وتښتول شول چې له پوهنتونه د خپل استوګنځي پر لور روان وو.
په همدې کال کې یوه هندۍ مېرمن هم اختطاف شوې وه چې بالاخره د امنیتي ځواکونو په هلو ځلو راخوشې شوه.
د چارو کارپوهان په افغانستان په ځانګړي ډول په کابل ښار کې پر بهرنیانو حملې د افغانستان په زیان بولي.
د دغو کارپوهانو له ډلې باري عارض ازادي راډیو ته وویل چې افغانستان دا مهال په بهرنیو مرستو ولاړ دی او د مرستندویه مؤسسو پر کارکوونکو حملې به د دوی مرستې او همکارۍ زیانمنې کړي.
ښاغلي عارض زیاته کړه:
"هېواد اوس په بهرنیو مرستو باندې ولاړ دی، که دغه مرستندویان هدف وګرځي په رښتیا چې دا به د افغانستان په اقتصادي، پوځي او سیاسي ساحه کې ښې پایلې ونهلري."
ښاغلي عارض په افغانستان کې بهرنیو کارکوونکو ته سپارښتنه کوي چې د خپل امنیت د خوندیتوب لپاره د خپل کار او اوسېدنې د ځای په اړه له افغان امنیتي ارګانونو سره معلومات شریک کړي.
د کابل امنیه قوماندانۍ وايي چې د کابل ښار د امنیت، د اوسېدونکو او په ځانګړي ډول د بهرنیو مرستندویه مؤسسو د کارکوونکو خوندیتوبیې مسؤلیت دی او په دې برخه کې هڅې کوي.
راپور: رحمتالله افغان
