پاکستان وایي، د افغانستان له خاورې پاکستان ته د سخت دریځو وسلهوالو د ننوتو د مخنیوي لپاره د پولې په اوږدو کې په ځینو سیمو کې امنیتي موانع جوړوي.
د پاکستان پوځ لوی درستیز قمر جاوید باجوه دا څرګندونې چې د پوځ د وړمې ورځې په خپاره شوي بیان کې کړي، ښایي د کابل او اسلاماباد تر منځ اړیکو کې کړکېچ بیا زیات کړي.
د روېټرز خبري اژانس د راپور له مخې پاکستان په وروستیو میاشتو کې په دې هېواد کې د خونړیو حملو پړه پر پاکستاني طالبانو اچولې او ویلي يې دي چې دوی د افغانستان خاوره کې مرکزونه لري او له دې هېواده غواړي چې د دغو سخت دریځو مرکزونه لهمنځه یوسي.
خو کابل ورته غوښتنه له کلونو راهیسې له پاکستانه کړې او دا هېواد یې د وسلهوالو طالبانو او نورو ورانکارو ډلو په ملاتړ تورن کړی دی.
د پاکستان پوځ لوی درستیز قمر جاوید باجوه ویلي چې د لوړې کچې ګواښ لرونکو سیمو مومندو او باجوړ اېجنسیو کې چې د افغانستان د ننګرهار او کونړ ولایتونو سره پوله لري، اغزن سیم غځوي.
خو د افغانستان د سرحدونو او قبایلو چارو وزارت وایي، پاکستان د افغانستان حکومت ته تر اوسه رسماً د ډیورند پر پوله د امنیتي موانعو د جوړولو په اړه خبر نهدی ورکړی او د دې کرښې په اوږدو کې د هر ډول تأسیساتو جوړولو په اړه یو اړخیز اقدام، نه د افغانستان حکومت او نههم د دې هېواد خلکو ته د منلو دی.
لېوال: پاکستان رسماً د ډیورند پر فرضي کرښې تأسیسات نهدي جوړ کړي
زرداري: پر سرحدي مسایلو د کابل-اسلاماباد مشورې مهمې دي
د دې وزارت سرپرست غفور لېوال د یکشنبې په ورځ ازادي راډیو ته وویل، په اوسنیو شرایطو کې چې د ډیورند د فرضي کرښې هاغې غاړې ته سیمې پوځي شوي او د جګړې شرایط حاکم دي دا ډول اقدام پر ځای اقدام نهدی.
د پاکستان پوځ لوی درستیز دغهراز ویلي چې پاکستان له افغانستان سره د دوه اړخیز امنیتي مېکانیزم د پراختیا په پلانونو کار پیل کړی او ویلي يې دي چې یوه ښه کنټرول شوې او امن لرونکې پوله د افغانستان او پاکستان دواړو چې د ترهګرۍ په وړاندې جګړه کې یې ډېره قرباني ورکړې، په ګټه ده.
خو د افغانستان د سرحدونو او قبایلو چارو سرپرست وزیر غفور لېوال له دې نظر سره موافق نهدی او وایي، تر هغو چې د ترهګرو ځالې چې د ډیورند تر کرښې وړاندې په امن ځایونو کې لهمنځه یونهوړل شي، که په دې کرښه لوړ دېوالونه هم جوړ شي، د امنیت له ټینګښت سره مرسته نهشي کولای.
لېوال: پاکستان رسماً د ډیورند پر فرضي کرښې تأسیسات نهدي جوړ کړي
د ډیورند د فرضي کرښې په اوږدو کې د پاکستان لهخوا د دایمي استحکاماتو د جوړولو هڅو تل د کابل غُصه راپارولې ده.
کابل، اسلاماباد تورن کړی چې د وسلهوالو طالبانو پر مشرانو چې په دې هېواد کې اوسېږي سترګې پټې کړي او د هغو ډلو ملاتړ ته دوام ورکوي چې افغانستان کې د ورانکاري فعالیتونه سر ته رسوي.
د افغانستان ولسي جرګه کې نن د ملي امنیت عمومي رئیس معصوم ستانکزي چې د امنیتي ادارو له نورو لوړپوړو چارواکو سره د ولسي جرګې استیضاحیه غونډې ته بلل شوی وویل، وسلهوال طالبان یوه وسیله ده چې د پاکستان پوځ ته د دې زمینه برابروي چې د افغانستان خاورې ته رادننه شي.
ملي امنیت: سیمه کې د ترورېستانو سیاست کې بنسټیز بدلون راغلی
د افغانستان او پاکستان تر منځ د شااوخوا دونیم زره کېلو مترو په اوږدوالي د ډیورند فرضي کرښې پر سر په کراتو-کراتو د دواړو هېوادونو تر منځ لانجې راپورته شوي چې کله هم د پاکستان له لوري د تورخم او سپینبولدک د لارو د تړلو سبب شوي چې مسافرو او سوداګرو تهیې ډیرې ستونزې راولاړې کړې دي.
په وروستیو کې یې بېلګه د دواړو دروازو تړل کېدل و چې شااوخوا پنځه اوونۍ یې دوام وکړ او تېره اوونۍ بېرته پرانیستل شوې.
