د افغانستان حکومت د ډيورند فرضي کرښې په اوږدو کې د پاکستان له لوري د موانعو جوړول یو اړخیز اقدام ګڼي او له دغه هېواده غواړي چې د ډيورند فرضي کرښې په اوږدو کې هر ګام د افغان حکومت په تفاهم وکړي.
دا په داسې حال کې ده چې پاکستان د سې شنبې په ورځ د ډيورند فرضي کرښې په اوږدو کې د ځینو موانعو په جوړولو پیل وکړ خو د افغانستان حکومت د پاکستان دغه اقدام غیر عملي او بېنتېجې یاد کړی.
د افغانستان د بهرنیو چارو وزارت مرستیال ویاند خیرالله ازاد د یکشنبې په ورځ ازادي راډیو ته وویل چې پاکستان د دواړو هېوادونو په اوږدو کې د دغو موانعو د کار پیل د افغان حکومت له هوکړې پرته پیل کړی.
نوموړي وویل:
"د افغانستان دولت د ډيورند فرضي کرښې په اوږدو کې د دواړو لورو له هوکړې پرته هر هغه اقدام چې ترسره کېږي بېنتېجې ګڼي او په دې اساس له پاکستانه د افغان دولت غوښتنه دا ده، هر هغه اقدام چې تر لاس لاندې نیسي د افغان حکومت په موافقې دې ترسره کړي."
دا په داسې حال کې ده چې د پاکستان د پوځ لوی درستیز قمر جاوید باجوه په دې وروستیو کې د پاکستان د پولې په اوږدو کې د موانعو له جوړولو پرده پورته کړه.
د پاکستان پوځ لوی درستیز ویلي چې د باجوړ او مومند اېجنسۍ تر ټولو زیاتې خطرناکې سیمې دي او پوځ به اول په همدغو سیمو کې کټارې او اغزن سیم لګوي.
پاکستان افغانستان سره پر ګډه پوله د مانع "سد" جوړولو کار پېل کړ
تر دې وړاندې د پاکستان د لومړي وزير سلاکار طارق فاطمي ویلي چې دوی د پولو اداري مېکانیزم د عملي کولو په حال کې دي چې هېواد بهیې له افغانستان سره د ټولې پولې په اوږدو کې موانع جوړې کړي.
په همدې حال کې د ولسي جرګې د سرحدونو او کورني امنیت کمېسیون غړي وایي، د افغانسان حکومت باید د ډيورند فرضي کرښې په اوږدو کې پراته خنډونه د ملګرو ملتونو په منځګړيتوب لهمنځه یوسي.
د دغه کمېسیون یوه غړي صالح محمد صالح په دې اړه وویل:
"زه فکر کوم دا زموږ لپاره یوه لویه ستونزه ده او افغانستان باید په ځان کې دا وړتیا پیدا کړي چې د ملګرو ملتونو په منځګړيتوب او څارنې دا ستونزه هواره کړي."
دا لومړی ځل نهدی چې پاکستان په داسې اقدام لاس پورې کوي بلکې تر دې وړاندې هم تورخم کې د دروازې په جوړولو او د ډيورند فرضي کرښې په اوږدو کې د پوستو په جوړولو اقدام کړی.
د يادونې وړ ده چې پاکستاني پوځ د فبرورۍ میاشت کې د افغانستان او پاکستان تر منځ پوله د سند ایالت د لعل شهباز قلندر پر زیارت له ځانمرګي برید وروسته هم د یوې مودې لپاره تړلې وه.
پاکستان ادعا کوي چې دا ډول حملې د هغو وسلهوالو ډلو په واسطه ترسره کېږي چې مرکزونهيې افغانستان کې دي خو کابل تل دا ډول تورونه رد کړي او له اسلاماباده یې غوښتي چې پاکستان د ترورېستي ډلو ځالې لهمنځه یوسي.
په همدې حال کې د نړیوالو اړیکو د برخې کارپوه خالد سادات په دې باور دی چې پاکستان د خپلو اهدافو د پلي کولو لپاره د ترورېستانو ننوتل پلمه ګرځولې ده.
نوموړی وايي:
"دا یوازې یوه پلمه ده، پاکستان د خپل غیر قانوني عمل د توجیه لپاره دلایل پیدا کوي، تاسې ګورئ په ډېرو سیمو کې چې ترورېستي حملې کېږي لکه اروپا کې له ترورېزمه زیانمنېږي، د افغانستان سره سرحد نهلري چې هغوی د دې ادعا وکړي چې له افغانستانه ترورېستان راځي، یوازې د خپلو غیر قانوني کړنو لپاره توجیه پیدا کوي."
ښاغلی سادات د ډيورند فرضي کرښې په اوږدو کې د پاکستان وروستی اقدام خطرناک یادوي او وایي، که د پاکستان د دغې کړنې مخه ونهنیول شي د دواړو هېوادونو تر منځ به ستونزې لا زیاتې شي چې دا به ناوړې پایلې ولري.
راپور: ناجیه ساپۍ
