د لاسرسي لېنکونه

شنبه ۲۷ لړم ۱۳۹۶ کابل ۰۱:۴۷

د ولسي جرګې اداري پلاوی: د دایمي غایب وکیلانو امتیازونه دې سلب شي


د ولسي جرګې اداري پلاوی وايي، د جرګې یو شمېر غړي دایمي غیر حاضر وي او یا هم په عمومي ناستو کې ګډون نه‎کوي.

د ولسي جرګې د اداري پلاوي یو شمېر غړو د یکشنبې په ورځ ازادي راډیو ته وویل، علم خان ازادي، اسحق رهګذر، عزت‌الله عاطف، سید منصور نادري، فریدون مومند او امان‎الله ګذر د جرګې هغه غړي دي چې ډېر کله په عمومي ناستو کې حضور نه‎لري.

د دغې جرګې منشي عبدالقادر ځاځی وطندوست وايي، هغه وکیلان چې پرته له کوم موجه عذره دایمي غیابت لري باید د ملي شورا امتیازات‌یې سلب شي.

د ولسي جرګې تالار
د ولسي جرګې تالار

نوموړی وايي:

"موږ به دا وڅېړو چې د کورني دندو د اصولو له مخې کوم قانوني عذر ونه‎لري، معاشونه او امتیازونه‌یې باید سلب شي."

په ورته وخت کې د ولسي جرګې دوهم مرستیال نذیر احمد احمدزی وايي، که څه هم په جرګه کې د دغو وکیلانو نه‌موجودیت په ځینو مواردو کې د نصاب د نه‌پوره کېدو لامل ګرځي خو په خبره‌یې یاد وکیلان له خپلو خلکو سره دي.

ښاغلي احمدزي زیاته کړه:

"که ازادي صیب دی، امان‌الله ګذر، عزت‌الله عاطف او یا فریدون خان دی د خپلو خلکو په منځ کې حضور لري او د خلکو له لوري موږ ته په دې اړه شکایت نه‌دی شوی."

د ولسي جرګې دویم مرستیال نذیر احمدزی
د ولسي جرګې دویم مرستیال نذیر احمدزی

د افغانستان ولسي جرګه په خپله ۱۶مه دوره کې ده او د افغانستان د اساسي قانون خلاف‌یې خپل اووم کاري کال پیل کړی دی.

د یو شمېر وکیلانو د دایمي غیابت تر څنګ ځیني داسې وکیلان هم شته چې په نورو دولتي برخو کې په کور دننه او بهر په دندو ګمارل شوي او اوس‎مهال د جرګې غړیتوب نه‎لري.

د اداري پلاوي په خبره دا چې د ولسي جرګې وروستی کاري کال نه‌دی مشخص، نو نویو وکیلانو د دغو وکیلانو ځای نه‎دی ډک کړی او له همدې امله د ولسي جرګې نصاب له ۲۴۹ څخه شااوخوا ۲۴۰ ته راټیټ شوی دی.

خو پوښتنه دا ده چې د جرګې یو شمېر وکیلان ولې په عمومي او مهمو ناستو کې ګډون نه‎کوي؟

هڅه مو وکړه چې په دې اړه له یو شمېر هغو وکیلانو سره چې په راپور کې یې نومونه اخیستل شوي هم خبرې وکړو خو بریالي نه‌شوو.

د ولسي جرګې غړی فرهاد صدیقي بیا امنیتي ګواښونه د دغې موضوع عمده لامل یادوي.

دی وايي:

"ملي امنیت او یو شمېر نور بنسټونه ورته پرله‎پسې راپورونه ورکوي چې له احتیاطه کار واخلي ځکه د وژلو په اړه‌یې پلان نیول شوی «ګواښل شوي دي» نو ځکه وېره لري، خو په مهمو ورځو کې کله چې قانون پاسېږي او اجنډا مهمه وي تالار ته راځي."

د ولسي جرګې غړی فرهاد صدیقي
د ولسي جرګې غړی فرهاد صدیقي

اوس ولیدل شي چې اداري پلاوی به د غیابي وکیلانو په اړه څه پرېکړه کوي ایا په ملي شورا کې به د هغوی امتیازات سلب کړي او که نه؟

دا هغه پوښتنه ده چې وخت به‌یې ځواب کړي.

راپور: عبادالله حنان‌زی

XS
SM
MD
LG