د افغانستان د کډوالو او بېرته راستنېدونکو چارو وزیر سید حسین عالمي بلخي وايي، له پاکستان سره يې د افغان کډوالو برخه کې يو شمېر موافقې کړې وې خو پاکستان کې امنيتي وضعيت خراب شو او له افغانستان سره يې عمده لارې تورخم او چمن وتړلې.
د ده په وینا کله چې اوضاع تغير وکړي، له پاکستان سره د کډوالو اړوندې موافقې به له سره پلي شي.
له ازادي راډيو سره په خبرو کې ښاغلي بلخي وويل:
"پاکستان کې د افغانستان سفارت په جدي توګه دا خبره تعقيبوي چې د تړلو لارو ستونزه حل شي. د دوو ورځو لپاره د لارې پرانيستل ډېر لږ وخت وو او په هېڅ صورت کافي نهدي. لارې باید تل پرانيستې وي."
دی وايي، هغه قانوني تدابير چې ورته اړتيا شته، ښه دي چې وشي خو د لارو تړل په هېڅ ډول نهشي توجيه کېدای.
دی وايي، پاکستان کې د افغانستان سفارت او کونسلګرۍ يې په دغه هېواد کې د افغانانو د وضعيت په اړه هلې ځلې کوي او د افغان کډوالو برخه کې هر ډول شکایتونه له پاکستاني چارواکو سره شریکوي.
دی وايي چې د سفارت د هلو ځلو نتيجه کې یو شمېر کسان چې پاکستان کې توقيف شوي وو، راخوشې شول خو یو شمېر اوس هم بنديان دي.
ښاغلي بلخي همدا راز ازادي راډيو سره خبرو کې د ايرانه راستنېدونکو افغانانو په اړه وويل چې د ايران له حکومت سره يې خبرې کړي او هغوی موافقه وکړه چې هغه افغانان به چې دغه هېواد کې يې اسناد پای ته رسېدلي، راجسټر کوي.
د ده په وينا اوسمهال څلورو بېلابېلو ځايونو کې د افغانانو د ثبت پروسه پیل شوې او هغه کورنۍ چې کوچنيان يې ښوونځيو کې شامل دي، ايراني د ژوند ملګري لري يا په مېړه او مېرمن کې یو يې اسناد لري، هلته ثبتيږي او هغه کسان چې له ۱۹۸۸میلادي کال وروسته يې اسناد نهدي تمديد شوي، هغوی هم ثبتوي.
د هغو کسانو په اړه چې رسمي اسناد نهلري، تراوسه هېڅ پرېکړه نهده شوې.