افغان امنیتي چارواکي وايي، لومړنۍ نښې نېښانې ښيي چې د کندهار حمله له افغانستانه دباندې پلان شوې وه.
د افغانستان د ملي امنیت ریاست وايي، د امنیتي ارګانونو ګډ لوړرتبه تحقیقاتي پلاوی، د متحده عربي اماراتو او د څېړنې لپاره د نړیوالو امنیتي ځواکونو د ګومارل شویو تحقیقاتي ټیمونو په همکارۍ په کندهار کې هر اړخیزو تحقیقاتو ته دوام ورکوي.
د ملي امنیت ریاست په یوه خبرپاڼه کې ویل شوي چې لومړنۍ نښې ښيي چې دا برید له افغانستانه دباندې د کوټې ښار ته په غځېدلې لاره کې د مولوي احمد کندهاري په مدرسه کې پلان شوی و.
دغې اعلامیه کې ادعا شوې چې دا مدرسه د انتحاري افرادو د روزنې مرکز دی.
په همدې حال کې د کندهار د والي ویاند صمیم خپلواک تېره شپه ناوخته ازادي راډیو ته وویل چې درې پلاوي تحقیقاتو ته دوام ورکوي.
نوموړي زیاته کړه:
"د څېړنو لپاره له کابله ټیمونه راغلي دي، اوس په څېړنو بوخت دي، د عربي متحده اماراتو یو پلاوی هم په دې اړه څېړنې کوي، خو ویلای نهشو چې دغه څېړنې به څومره وخت ونیسي."
خپلواک په عین حال کې د پلاوو د تحقیقاتو د نتیجې په اړه بېخبري څرګنده کړه او ویېویل چې تحقیقات لا بشپړ شوي نهدي.
د کندهار د والي ویاند د ولسمشر د سلاکار داود ګلزار په مشرۍ کندهار ته د تللي پلاوي د هدف په اړه وویل:
"د ولسمشر د سلاکار داود ګلزار په مشرۍ یو ګډ پلاوی هم تېره ورځ کندهار ته راغلی، په دغه پلاوي کې د دفاع، کورنیو چارو، د ملي امنیت عمومي ریاست او لویې څارنوالۍ غړي شامل دي."
د یکشنبې په ورځ د افغانستان ولسمشر محمد اشرف غني د پاکستان لوی درستیز قمر جاوید باجوه ته وویل چې د کندهار د حملې په شمول وروستۍ حملې هغو وسلهوالو سخت دریځو کړي چې په پاکستان کې مرکزونه لري او پاکستانیې په وړاندې اقدام نهکوي.
د پاکستان لوی درستیز دا بریدونه وغندل او له افغانانو سرهیې خواخوږي څرګنده کړه.
باجوه ویلي چې د دغه هېواد پوځ بېتوپیره د ټولو ترورېستانو پر ضد عملیات کوي.
د تېرې سې شنبې په ورځ د کندهار ولایت په مېلمستون کې د چاودنې په نتیجه کې د دغه ولایت مرستیال والي او د متحده عربي اماراتو د ۵ ډیپلوماتانو په شمول ۱۲ تنه ووژل شول.
دا په داسې حال کې ده چې د کابل او هلمند انتحاري حملو مسؤلیت وسلهوالو طالبانو په غاړه واخیست، خو د کندهار د پېښې مسؤلیت تر دا مهاله کومې وسلهوالې ډلې په غاړه نهدی اخیستی.
په ورته وخت کې پرون د افغانستان او عربي متحده اماراتو د کرکټ ټیمونو د صحرا جام تر سیالۍ وړاندې د کندهار، کابل او لښکرګاه د وروستیو ترورېستي حملو د قربانیانو په یاد یوه دقیقه چوپتیا غوره کړه.
