افغانستان
په فراه کې یو لوی پُل ګټې اخیستنې ته وسپارل شو
د کلیو د پراختیا او بیارغونې وزیر په فراه ولایت کې یو لوی پُل چې درې ولسوالۍ د ښار د مرکز سره نښلوي نن پرانیستی دی.
دغه پُل د ښار په شمالي سیمه کې د فراه رود پر رود د کابو ۸۱ میلیونه افغانیو په لګښت د دوه سوه مترو په اږدوالي او همداشان د ۵ مترو په پلنوالي جوړ شوی دی.
د فراه والي محمد اصف ننګ د دغه پله په پرانیست غونډه کې وویل چې دا په وروستیو کلونو کې په فراه ولایت کې یوه ستره پروژه ده چې بشپړه کېږی.
د والي په خبره دغه پُل که له یوې خوا درې ولسوالۍ د ښار سره نښلوي له بلې خوا په راتلونکي کې به ورڅخه د چابهار بندر د نښلولو څخه هم ګټه واخیستل شي.
که څه هم د فراه اوسېدونکي د ریګي د پُل رغول د فراه په تاریخ کې یو لوی کار بولي خو وایي چې دغه پُل ځیني نیمګړتیاوي هم لري چې باید مخکي ورته پام شوی وای.
د فراه ولایت د اوسېدونکو په خبره د دغه پُل بر یا پلنوالی ډېر کم دی او په یوه وخت کې یوازي یو موټر ورڅخه تېرېدلای شي چې دا به په راتلونکي کې یو لویه ستونزه وي.
له بلې خوا د کلیو د پراختیا او بیارغونې وزیر نصیراحمد دراني بیا د دغه پُل د پرانیستي په غونډه کې ژمنه وکړه چې یو بل پُل به هم ددغه پله وڅنګ ته جوړوي تر څو دغه ستونزه حل شي.
د وزیر په خبره د فراه ولایتي چارواکو ورته د دغه پُل د اهمیت په اړه معلومات وکړي او ډېر ژر به د بل پله د جوړولو لپاره هم امکانات وسنجول شي.
د ریګي پُل جوړول چې د فراه ولایت د خاکسفید، پشت رود او بالابلوک ولسوالۍ د ښار سره نښلوي د دغه ولایت د خلګو د پخوانيو غوښتنو څخه وو.
د چارواکو په خبره د دغه پله څخه به در دوه سوه زرو زیات کسان ګټه واخلي.
دا په فراه ولایت کې په تېرو دیارلسو کلنو کې تر ټول لوي پُل دی چې جوړېږي.
د ورځې تازه خبرونه دلته ولولئ
نن د افغانستان او پاکستان تر ۱۹ کلونو کمعمره کرکټ لوبډلې مسابقه لري
ټاکل شوې د افغانستان د کرکټ تر ۱۹ کلونو کمعمره لوبډله نن د پاکستان په وړاندې مسابقه وکړي.
د افغانستان کرکټ بورډ خبر ورکړی، چې په متحده عرب اماراتو کې د درېیو هېوادونو دغه لومړۍ مسابقه به نن د کابل پر وخت د سهار پر لسو بجو پیل شي.
د دغه بورډ ویاند سید نسیم سادات تېره شپه ازادي راډیو ته وویل: "په دغه درې اړخیزه لوبلړۍکې د افغانستان او پاکستان ترڅنګ متحده عرب امارات هم برخه لري او دغه لوبلړۍ د راتلونکي اسیا جام ته چې هغه به هم د ۱۹ کلنو لوبډلو ترمنځ په متحده عرب اماراتو کېږي، چمتووالی دی."
د افغانستان د کرکټ د ۱۹ کلنو لوبډلې د ۲۰۱۷م کال اسیا جام اتلولي ګټلې وه.
د اکشن اېډ په نوم مؤسسه په يوشمېر ولايتونو کې ۲۵۰۰ کورنيو سره مرسته کوي
تمه کېږي چې د اکشن اېډ په نوم مؤسسې له لارې په کابل، غور او بامیان کې شاوخوا ۲۵۰۰ زیانګالو کورنیو سره نغدي مرستې وشي.
د طالبانو د طبیعي پېښو په وړاندې د مبارزې ادارې پرون پنجشنبه پر خپله ایکسپاڼه (پخواني ټویټر) لیکلي چې، په کابل کې یې له دغې ادارې سره پهدې باب د یو ميلیون ډالرو په ارزښت دوه تړونونه لاسلیک کړي دي.
وړاندې راغلي، چې اکشن اېډ به د کابل ولایت په دهسبز او بګرامیو ولسوالیو کې له ۱۰۰۰ کورنیو او د بامیان او غور په مرکزونو کې له ۱۵۰۰ کورنیو سره نغدي مرسته وکړي.
دغه اداره وايي، چې په کابل کې هرې یوې کورنۍ ته ۴۶۸ ډالره او په بامیان او غور کې هرې یوې کورنۍ ته له ۲۰۰ تر ۳۳۱ ډالره پورې نغدي مرسته ورکوي.
د ژمي په را رسېدو سره په افغانستان کې د بېوزلو کورنیو د ژوندانه د ناوړه وضعیت په اړه اندېښنې تر بل هر وخت زیاتې شوې دي.
سیف دي چلډرن مؤسسې د یکشنبې په ورځ خبرداری ورکړی و، چې په افغانستان کې د وروستیو سېلابونو او د خوړو د کموالي له امله زیانمنې شوې کورنۍ به د ژمي په را رسېدو سره له لا زیاتو ستونزو سره مخ شي.
د افغانستان د فوټبال ملي ټیم به سبا شنبه د نیپال له ټیم سره مخامخ شي
ټاکل شوې دغه لوبه د افغانستان پر وخت مازیګر ۵:۳۰ بجې د تاجکستان د پلازمېنې دوشنبې په مرکزي لوبغالي کې پیل شي.
د افغانستان، تاجکستان او نیپال ترمنځ درې اړخیزه سیالۍ د چهارشنبې په ورځ پیل شوې.
افغانستان په دغو لوبو کې خپله دویمه لوبه د راروانې اوونۍ د سهشنبې په ورځ له تاجکستان سره کوي.
افغان لوبډله له څه باندې پنځهنیمو میاشتو وروسته د لومړي ځل لپاره له خپل ازبکستاني روزونکي عثمان توشیف سره د لوبو ډګر ته ننوځي.
بريتانيا افغان محصلانو ته د تحصيلي بورسونو پروګرام بيا پيل کړ
افغان محصلانو ته د بریتانیا د "چیونینګ" په نوم د تحصلي بورسونو د ورکړې پروګرام بیا له سره پیل شو.
د چیونینګ پر وېبپاڼه پرون په یوه بیان کې د ۲۰۲۵م او ۲۰۲۶م کلونو لپاره د دغه تحصیلي پروګرام د بیا پیل خبر ورکړل شوی دی.
د بیان لهمخې، د تېر کال پر تله د چیونینګ بورسونو ترلاسه کولو لپاره معیارونه بدل شوي دي.
وړاندې راغلي، چې د دغو بورسونو غوښتونکي باید د افغانستان وګړي او په افغانستان کې وي، چې د چیونینګ بورسونو معیارونه پوره کړي.
د بیان لهمخې، افغان متقاضیان د ماسټرۍ په مقطع کې کولی شي د سږکال د نومبر له ۱۴مې د ۲۰۲۵م کال د جنورۍ تر دویمې نومونه ولیکي.
بریتانیا په وږي/ سنبلې میاشت کې د نامعلومو دلایلو لهمخې د چیونینګ تحصلي بورسونو لپاره د افغان محصلانو درخواستونه وځنډول.
چیونینګ د بریتانیا حکومت نړیوال تحصیلي پروګرام دی، چې د بریتانیا د بهرنیو چارو وزارت او همکارو بنسټونو لهخوا تمویلېږي.
نن د افغانستان په ۲۳ ولايتونو کې د ورښتونو اټکل شوی
د طالبانو د ترانسپورت او هوايي چلن وزارت د هواپېژندنې اداره وايي، نن جمعه د افغانستان په ۲۳ ولایتونو کې د باران او سېلابونو اټکل شوی دی.
دغه رياست د پنجشنبې په ورځ په يوه خبرپاڼه کې ويلي، چې بدخشان، نورستان، کونړ، ننگرهار، لغمان، کاپیسا، پروان، کابل، لوگر، پکتیا، خوست، پنجشېر، تخار، بغلان، بامیان، سرپل، دایکنډي، غور، غزني، ارزگان، هلمند، کندهار او زابل ولایتونه به نن د سختو بارانونو، تالندې برېښنا او سېلابونو شاهدان وي.
په بېلابېلو سیمو کې د باران اندازه د ۱۵ او ۳۰ ملي مترو ترمنځ اټکل شوې ده.
په بیان کې ویل شوي چې په لوړو او سړو سیمو کې د واورې د اورېدو امکان هم شته.
کرکټ؛ افغانستان سبا له پاکستان سره سیالي کوي
د افغانستان د نولسکلنو ځوانانو ملي لوبډله د درې اړخیزو سیالیو په لړ کې سبا جمعه د نومبر په ۱۵مه نېټه د پاکستان له نولسکلنې لوبډلې سره سیالي کوي.
افغان کرکټ بورډ وايي، دغه سیالۍ د عربي متحده اماراتو په کوربهتوب پيليږي چې پر افغانستان او پاکستان سربېره په کې د اماراتو لوبډله هم برخه لري.
سیالي به د کابل پر وخت سهار ۱۰:۰۰ بجې پیل شي.
د دې درې اړخیزو سیالیو په لړ کې به هره لوبډله یو له بل سره دوه-دوه سیالۍ کوي او د نومرو د جدول دوه مخکښې لوبډلې به د نومبر په ۲۶مه نېټه پایلوبه ترسره کوي.
د ویلو ده چې تر دې سیاليو وروسته به افغانستان د نولسکلنو ځوانانو په اسیا کپ کې هم ګډون وکړي، چې د نومبر په ۲۹مه نېټه په عربي متحده اماراتو کې پیليږي.
طالبانو ننګرهار کې د يوې ښځې په ګډون يوولس کسان په دُرو وهلي
د طالبانو د حکومت ستره محکمه په ننګرهار ولایت کې پر یوولسو مجرمینو د “تعزیري سزاګانو” د عملي کېدو خبر ورکوي.
دې محکمې نن پنجشنبه په خپله وېبپاڼه کې لیکلي چې، د دې ولایت د غنيخېلو او د سرخرود ولسوالیو د ابتدایه محکمو د پرېکړو لهمخې د یوې ښځې په ګډون پر یوولسو مجرمینو چې د زنا، لواطت او نامشروع اړیکو په تور مجرم پېژندل شوي و، روانه اوونۍ د دوشنبې او چهارشنبې په ورځو کې تعزیري سزاګانې عملي شوې.
د بیان لهمخې اووه مجرمین له ۳۰ نه تر ۳۹ دُرو او دغهراز مجرمه ښځه په ۲۹ او نور درې مجرمین په ۳۹ دُرو وهل شوې دي.
په ننګرهار کې پر مجرمینو دغه "تعزیري سزاګانې" داسې مهال عملي کېږي چې پرون چهارشنبې په پکتیا کې د قتل په جرم پر یوه کس د شریعت لهمخې د “قصاص” حکم عملي شو.
د راپورونو لهمخې دا له کله چې طالبان پر افغانستان واکمن شوي، د دوی له لوري د "قصاص" شپږمه سزا ده چې عملي کېږي.
پکتيا کې په عام محضر کې د يو کس اعدامېدو ته غبرګونونه مخ په ډېرېدو دي
په پکتیا کې پرون چهارشنبې د طالبانو لهخوا په عام محضر کې د یوه کس د اعدامېدو په وړاندې د نړیوالو غبرګونونو په ترڅ کې په جینوا کې د ملګروملتونو دفتر دغه اعدام غندلی او هغه یې له بشري حقونو ښکاره سرغړونه بللې ده.
دې دفتر په خپله وېبپاڼه کې په یوه بیان کې د طالبانو له سرپرست حکومت څخه غوښتي چې دغه ډول سزاګانې سمدستي ودروي.
ملګروملتونو همدارنګه په افغانستان کې د بشري حقونو د مخ په خرابېدونکي وضعیت په اړه ژوره اندېښنه څرګنده کړې ده.
طالبانو پرون چهارشنبه وویل چې د پکتیا د مرکز ګردیز په ورزشي سټډیوم کې یې یو کس چې نوم یې محمد ایاس اسد ښودلی، په عام محضر کې اعدام کړ.
د طالبانو سترې محکمې په یوه خبرپاڼه کې ویلي، پر نوموړي د قتل په جرم د "قصاص" حکم عملي شو.
په افغانستان کې د ملګروملتونو مرستندوی ماموریت یا یوناما هم پرون د دغه اعدام په وړاندې غبرګون کې په عام محضر کې اعدامونه، د بشري حقونو په برخه کې د افغانستان د نړیوالو ژمنو خلاف عمل وباله او د هغو د درېدو غوښتنه یې وکړه.
د افغانستان د بشري حقونو لپاره د ملګروملتونو ځانګړي راپور ورکونکي ریچارد بېنيټ هم دغه اعدام "زړه بوږنونکی" وباله او پر طالبانو یې غږ وکړ، چې دا ډول سزاوې سمدستي ودروي.
طالبانو ننګرهار کې رسنيو ته د عکس او ويډيو د نه خپرولو خبر ورکړی
د افغانستان د خبریالانو مرکز پرون خبر ورکړ چې په ننګرهار کې طالبانو دولتي ادارو ته امر کړی دی چې، نه به عکس اخلي نه به تصویر خپروي.
په ننګرهار کې یوشمېر رسنیو د افغانستان د خبریالانو مرکز ته ویلي دي، د ننګرهار اطلاعات او کلتور ریاست دوی ته د تصویرونو او ویډیوګانو د نه اخیستو او خپرېدو خبر ورکړی دی.
په ننګرهار کې د طالبانو د والي مرستیال مولوي عزیزالله مصطفی دولتي ادارو او ولسوالانو ته ویلي دي، د ملاهبتالله اخندزاده د فرمان لهمخې د ژونديسرو د عکس اخیستل او خپرېدل منع دي.
تر اوسه پورې د ملاهبتالله اخندزاده دغه فرمان چې د زمري میاشتې په یو دېرشمه صادر شوی دی په کندهار، تخار، بادغیس او هلمند کې عملي شوی دی او په دغو ولایتونو کې دولتي او خصوصي تلوېزیونه تړل شوې دي.
فرانسې افغانستان کې د خوړو له نړيوال پروګرام سره مرسته کړې
فرانسې په افغانستان کې د خوړو له نړیوال پرګرام سره د درې میلیونه یورو مرسته وکړه.
د خوړو نړیوال پروګرام په خپله ایکسپاڼه (پخواني ټویټر) کې پرون د دې مرستې خبر ورکړ.
د راپور لهمخې پهدې مرسته به د افغانستان په لومړنیو ښوونځیو کې له پنځلس زرو څخه زیاتو هلکانو او نجونو ته هره ورځ یوه اندازه صحي خواړه چمتو شي او له پنځهدېرش زرو څخه زیات کسان به د خپلې ټولې کورنۍ د تغذیې د ښه کولو لپاره نباتي غوړي ترلاسه کړي.
د خوړو نړیوال پروګرام وایي، سږکال د مالي بحران له امله نهدی توانېدلی چې دوه میليونه ښځو او ماشومانو ته د خوارځواکۍ د مخنیوي لپاره خواړه برابر کړي.