د افغانستان د کډوالو چارو وزارت وايي، هیله مند دی چې د پاکستان حکومت د کډوالو په اړه د پخواني تفاهم لیک له مخې په پاکستان کې د افغان کډوالو د پاتې کېدو موده، دوه کاله نوره هم وغځوي.
د دې وزارت د خپرونو سلاکار حفیظ میاخېل د پنجشنبې په ورځ ازادي رادیو ته وویل، په پام کې ده چې په دې اړه د جولای د میاشتې په ۱۹مه په اسلام اباد کې یوه ناسته هم جوړه شي.
ښاغلي میاخېل زیاته کړه:
"یوه درې اړخېزه ناسته په راتلونکې میاشت کې د یو.اېن.اېچ.سي.ار په کوربه توب، په اسلام اباد کې جوړیږي.هدف یې دا دی چې له ۶ میاشتو وروسته په دې اړه یو پروګرام جوړ شي."
دا په داسې حال کې ده چې تېره ورځ د پاکستان حکومت په هغه هېواد کې د افغان کډوالو د پاتې کېدو موده، تر راتلونکو شپږو میاشتو پورې وغځوله.
د کډوالو په چارو کې د ملګرو ملتونو د کمېشنرۍ د اعلاميې له مخې د دې کمېشنرۍ مشر فلیپوګراندې، افغانستان، ایران او پاکستان ته له سفر وروسته، د چهارشنبې په ورځ ویلي چې هر کډوال ته چې له پاکستانه هېواد ته ستنیږي ۴۰۰ ډالر ورکول کیږي.
دا اداره وایي، د روان میلادي کال له پیل راهیسې ۷۰۰۰ افغان کډوال په خپل زړه، هېواد ته ستانه شوي دي.
په اسلام اباد کې د دې دفتر مشر قیصر افریدي ازادي راډیو ته ویلي په پام کې ده چې دا پروګرام، د روان کال د جولاې په میاشت کې عملي شي.
د کډوالو چارو وزارت وايي، دم ګړۍ ۳۰۰۰۰۰۰ افغان کډوال په پاکستان کې میشت دي چې یوازې یو میلیون او شپږ لکه یې په هغه هېواد کې د اوسیدو قانوني اسناد لري.
په ورته وخت کې د افغان حکومت د اجرایي ریاست د ویاند مرستیال جاوید فیصل ازادي راډیو ته وویل، حکومت هڅې کوي چې د افغان کډوالو ستونزو ته د حل لارې ومومي.
ښاغلي فیصل زیاته کړه:
"افغان حکومت د کډوالو له کوربه هېوادونو او د یو. این. ایچ. سي. ار له ادارې سره په خبرو کې دی چې د کډوالو ستونزې اوارې کړي."
ځیني افغان کارپوهان په دې باور دي چې افغان حکومت د کډوالو د ستونزو د اواري لپاره ځانګړي پروګرامونه نه لري دا په داسې حال کې ده چې ایران او پاکستان ډېر ځله له افغان کډوالو سره سیاسي چلند کړی دی.
د دې کارپوهانو له ډلې لطیف نظري ازادي راډیو ته وویل، که پاکستان په زوره د کډوالو د ایستلو پریکړه وکړي، راستانه شوي کډوال به په هېواد کې له زیاتو امنیتي، اقتصادي او د بې کورۍ له ستونزو سره مخ شي.
راپور: خان محمد سیند
