د افغانستان د ملي مشارکت ګوند له حکومته غواړي چې پر اعدام محکوم شوي وسله مخالفین ژر ترژره اعدام کړي.
د دې ګوند رئیس نجیب الله کابلي دا څرګندونې، د ټولنیزو فعالانو په هغې غونډه کې وکړې چې د وسله وال پوځ د ملاتړ په مقصد یې جوړه کړې وه.
د ملي مشارکت ګوند وايي، هغه وسله وال مخالفین چې د هېواد د درې ګونو محکمو لخوا په اعدام محکوم شوي او اوسمهال له حکومت سره بندیان دي، باید اعدام شي.
د دې ګوند رئيس نجیب الله کابلي دا خبره د دوشنبې په ورځ په کابل کې د ټولنیزو فعالانو په هغې غونډه کې وکړه چې د امنیتي ځواکونو د ملاتړ په مقصد یې جوړه کړې وه.
ښاغلي کابلي وویل، وسله وال مخالفین هره ورځ د امنیتي ارګانونو په لسګونو هغه عسکر او منسوبین وژني چې ټول مسلمانان او د خلکو او خاورې څخه د دفاع په سنګرونو کې ولاړ دي.
ښاغلي کابلي تاکید وکړ چې د امنیتي ځواکونو وژونکي دې اعدام شي.
هغه زیاته کړه:
"د پل چرخي زندان له طالبانو ډک دی که هره ورځ له دوی څخه څو تنه اعدام شي د خلکو ذهنونه به ارام شي، وسله والو طالبانو د افغانستان خلکو سره ډېر ظلمونه کړي او ډېر بېګناه خلک یې وژلي، جمهور رئیس د نړۍ له اغیز لاندې نه راځي او هغه وسله وال چې د محاکمو لخوا په اعدام محکوم شوي، باید اعدام شي ځکه دا دخکو خوښه ده."
په جوړې غونډه کې د امنیتی ځواکونو پر منسوبینو د وسله والو مخالفینو حملې وغندل شوې او د امنیتي ځواکونو ملاتړ یې د هر افغان مکلفیت وباله.
د اپه داسې حال کې ده چې افغان حکومت څه باندې شل ورځې د مخه ۶ تنه وسله وال طالبان چې درې ګونو محکمو په اعدام محکوم کړي وو، اعدام کړل.
د عفوې نړیوال سازمان د افغان حکومت په دې عمل اندېښنه ښودلې او ویلی یې وو چې د افغانستان عدلي او قضایی ارګانونه اوس هم یو لړ ستونزې لري او باید د اعدامونو لړې دې نه غځوي.
طالبانو هم خبری داری ورکړی چې د دوی د وسله والو اعدامېدل به حکومت ته بدې پایلې ولري او دوی به یې غچ واخلي.
تېره اوونۍ د میدان وردګ ولایت د استیناف محکمې د کارکوونکو پر موټر انتحاري حمله چې یولس تنه په کې ووژل شول، طالبانو د اعدامونو د غچ اخیستو لړۍ یاده کړه.
افغان چارواکي وايي، په دې برخه کې قوانین موجود دي او هر حکم د همدغو قوانینو په چوکاټ کې پلی کېږي.
د جمهور رئیس د ویاند مرستیال دوا خان مینه پال په دې اړه ازادي راډیو ته وویل:
"قضا مستقله ده، کله چې د یو مجرم پروړاندې حکم صادریږی، ولسمشر یې پلی کوي، د افغانستان اساسي قانون او ټول فرعي قوانین په دې برخه کې خپل مسوولیتونه لري."
افغان چارواکي وايي، د مجرم د سزا لپاره قوانین موجود دي او د جرم په پام کې نیولو پر هر کس پلي کېږي.
افغان حکومت وروسته له هغې په اعدام د محکومو طالبانو د اعدام پریکړه وکړه چې په کابل کې د حمل په ۳۱ خونړۍ حملې ۶۴ تنه ووژل او نږدې درې نیم سوه نور یې ټپیان کړل.
خو معلومه نه ده چې د وسله والو طالبانو اعدامول به د جګړو په کموالي کوم اغیز وکړي او که نه؟
راپور: خان محمد سیند
