د اسرايیل پوځ تېره شپه بیا پر غزه حمله کړې او لږ تر لږه ۱۹ فلسطینیان یې وژلي دي.

روغتیايي سرچینو نن شنبه دا خبر ورکړی دی.

راپورونه وايي، د اسرايیل ځواکونو د جبالیا سیمې پر لوري مخکې تګ ته دوام ورکړی، چې د نړیوالو خیریه بنسټونو په وینا په زرګونو کسان په‌کې راګیر پاتې دي.

ځايي اوسېدونکي وايي، اسرايیلي ځواکونو پر جبالیا سیمې چې د غزې په شمال کې پرته ده او د بې‌ځایه شویو کمپونه په‌کې دي، هوايي او ځمکني عملیات سخت کړي دي.

د اسرايیل پوځ د تازه حملې په باب څه نه‌دي ویلي، خو په مخکېنیو ورځو کې یې په جبالیا او شاوخوا سیمو کې د عملیاتو په نتیجه کې د لسګونو افراطي وسله‌والو د وژلو خبره کړې وه.

د فلسطینیانو روغتیايي چارواکي وايي، د یوې اوونۍ په موده کې په جبالیا کې د وژل شویو شمېر ۱۵۰ ته رسېدلی دی.

د ښځو په پیل شوي شل اوریز نړیوال جام کې نن د اکټوبر په ۱۲مه نېټه سریلانکا، نیوزیلنډ، بنګله‌‌دېش او سویلي افریقا سیالۍ کوي.

دغه سیالۍ چې د عربي متحده اماراتو په کوربه‌توب پیل شوي دي، لومړۍ لوبه د سریلانکا او نیوزیلنډ ترمنځ د شارجې په لوبغالي کې پیل شوې ده.

په‌دې لوبه کې سریلانکا پچه ګټلې او توپوهنه یې غوره کړې ده.

ټاکل شوې چې د ورځې دویمه لوبه د بنګله‌دېش او سویلي افریقا ترمنځ د دوبۍ په لوبغالي کې د کابل پر وخت ماښام پیل شي.

تر دې دمه د روان نړیوال جام په الف ګروپ کې اسټرالیا او په ب ګروپ کې ویسټ اینډیز د نومرو په جدول کې تر نورو مخکې دي.

روسي چارواکي وايي، د اوکراین بې‌پیلوټه الوتکو نن سهار وختي د روسیې پر بلګورود او کراسنودار سیمو بریدونه کړي، چې له امله یې درې تنه ټپیان شوي دي.

د بلګورود والي ویاچسلاف ګلادکوف په ټلېګرام کې ویلي، چې په اوستینکا کې د برید له امله یوه ښځه او دوه نارینه ټپیان شوي، چې په روغتون کې بستر دي.

په کراسنودار کې، یوه محلي چارواکي وینیامین کوندراتییف په ټلېګرام کې لیکلي، په‌دې ځای کې درې کورونه او یو موټر د اوکراین د بې‌پیلوټه الوتکو له کبله ویجاړ شوي دي.

هغه زیاته کړه چې د ځاني زیان راپور نه‌دی ورکړل شوی.

د اوکراین د ختیځ لوهانسک په رووینکي نومې سیمه کې چې روسیې اشغال کړې د تېلو په یوه ډیپو کې اور لګېدلی.

د ټلېګرام په محلي چینلونو کې دا راپور ورکړل شوی او د اورلګېدنې یوه ویډیو خپره شوې ده.

د اوکراین پوځ هم ویلي چې، د اوکراین ختیځ په لوهانسک سیمه کې د روسیې تر اشغال لاندې د تېلو یو ډيپو يې ویشتلی دی.

دا له مې میاشتې وروسته چې هغه وخت هم د تېلو پر ډیپو حمله شوې وه، دویم برید دی.

په جلا خبر کې د روسیې د دفاع وزارت ویلي، د دوی ځواکونو ۱۷ بې‌پيلوټه الوتکې د کراسنودار پر فضا، ۱۲ د کورسک، ۲ د بلګورود او ۱۶ نورې د ازوف پر فضا ویشتلي او نسکورې کړې دي.

ایران پرون جمعه اعلان وکړ، چې د سپاه پاسداران د هغه جنرال مړی یې موندلی، چې تېره میاشت د لبنان په پلازمېنه بیروت کې د حزب‌الله ډلې له مشر حسن نصرالله سره یوځای د اسرايیل په هوايي حمله کې وژل شوی و.

د ایران سپاه پاسداران په یوه اعلامیه کې ویلي، د شهید عباس نیلفروشان مړی تر سختو هڅو وروسته موندل شوی دی.

په اعلامیه کې ویل شوي چې، ایران ته د نیلفروشان د مړي د انتقال او جنازې پلانونه به وروسته اعلان شي.

د ایران د سپاه پاسداران د قدس ځواکونو وتلی قوماندان عباس نیلفروشان د سپټمبر پر ۲۷مه له حسن نصرالله سره یوځای ووژل شو.

قدس ځواکونه د سپاه د بهرنیو عملیاتو څانګه ده.

د لبنان حزب‌الله ډلې نن ویلي، چې نن یې د حیفا په جنوب کې د اسرايیل پر یوه پوځي اډه یو لړ میزاییل ویشتلي دي.

دا په‌داسې حال کې ده، چې اسرايیل نن د یوم کیپور په نوم د یهودانو مهم مذهبي جشن لمانځي.

د ایران متحدې ډلې حزب‌الله په یوه اعلامیه کې ویلي، ځواکونو یې د میزاییلو په حملې سره د اسرايیل د منفجره موادو یوه فابریکه په نښه کړې ده.

د دې ادعا په باب اسرايیل څه نه‌دي ویلي.

دا په‌داسې حال کې ده، چې په لبنان کې د ملګروملتونو د سوله ساتنې پر ماموریت د اسرايیل دویمې هوايي حملې په ډیپلوماتیک ډګر کې انتقادونه پارولي دي.

ملګروملتونو پرون ویلي چې، په‌دې پېښه کې دوه سریلانکايي سوله ساتي ټپیان شوي دي.

د امریکا متحده‌ایالتونو پر اسراییل د ایران د تېرې اوونۍ د برید په غبرګون کې پرون جمعه پر ایران نور بندیزونه لګول.

د امریکا د خزانې وزارت په یوه خبرپاڼه کې وویل، په دغو نویو بندیزونو سره به چې د ایران د تېلو صنعت په‌کې په نښه شوی، پر دې هېواد مالي فشارونه لا زیات شي او د تېلو د پلور له پلوه به یې د رژیم عواید چې هغه په سیمه کې د بې ثباتۍ او د متحده‌ایالتونو پر متحدینو د برید لپاره کارولای شي، کم شي.

د امریکا د خزانې وزیرې جنیت یلین وویل، پر اسراییل د ایران د برید په ځواب کې متحده‌ایالات د ایران د رژیم د تمویل او د بې ثباته کوونکو فعالیتونو د ترسره کولو د وړتیا د لا ګډ وډولو لپاره پرېکنده اقدام کوي.

په عین حال کې د امریکا د بهرنیو چارو وزارت ۶ شرکتونه او شپږ کښتۍ له ایران څخه د تېلو د محصولاتو د لېږد یا سوداګرۍ لپاره د بند ملکیت په توګه پېژندلي.

د دغو بندیزونو له‌مخې په متحده‌ایالتونو کې د په نښه شویو شرکتونو او کښتیو ټولې شتمنۍ کنګل کېږي او امریکایان له‌دې منع کوي چې ورسره هر ډول معامله وکړي.

د روسیې ولسمشر ولادمیرپوتین او د ایران ولسمشر مسعود پزشکیان پرون په‌داسې حال کې د ترکمنستان په پلازمېنه عشق‌اباد کې سره وکتل چې، په اوکراین او منځني ختیځ کې د روانو جګړو په اړه د لوېدیځ اندېښنې په زیاتېدو دي.

روسیه د اوکراین په جګړه کې په مسقیم ډول ښکېله ده اوایران هم په‌دې وروستیو کې په سیمه کې د نیابتي ډلو په ملاتړعملي اقدامات کړي دي.

د ازادې اروپا/ ازادي راډیو د خبر د مرکزي څانګې د راپور له‌مخې دواړه مشران له دغې کتنې په استفادي غواړي چې په خپلو کې دوه اړخیزې اړیکې لا پیاوړې کړي.

په عشق‌اباد کې د پوتین او پزشکیان ترمنځ دغه کتنه چې د یوه کنفرانس په څنډه کې ترسره شوه، د دواړو ولسمشرانو ترمنځ لومړنی کتنه ده.

د دوی ترمنځ بله کتنه د بریکس ډلې په سرمشریزه کې چې په پام کې د روانې اوکتوبر میاشتي له ۲۲ نه تر۲۴ پورې د روسیې په کازان کې جوړه شي، په پام کې نیول شوې ده.

د کریملین ویاند دیمتري پسکوف د روسیې او ایران د ولسمشرانو له پرونۍ کتنې مخکې خبریالانو ته وویل، په‌دې کتنه کې به پر دوه اړخیزو اړیکو خبرې وشي، خو د نوموړي په خبره بې له شکه د منځني ختیځ روان وضعیت به هم د دوی د خبرو په اجنډا کې وي.

د ۲۰۲۲ کال د فبرورۍ له میاشتې راهیسې چې روسیې پر اوکراین پراخ برید کړی، د مسکو او تهران ترمنځ اړیکې پیاوړې شوې دي.

روسیې په دغه جګړه کې تر ډېره د ایران له بې‌‌‌‌پیلوټه الوتکو کار اخیستی، خو ایران د لوېدیځ د تورونو په ځواب کې ویلي، د اوکراین له جګړې مخکې یې مسکو ته یو محدود شمېر بې‌پیلوټه الوتکې ورکړې دي.

د جرمني صدراعظم اولاف شولڅ پرون جمعه د یونیم ميلیارد ډالرو په ارزښت له اوکراین سره د نورو پوځي مرستو اعلان وکړ.

دغه اعلان د جرمني په پلازمېنه برلین کې د اوکراین د ولسمشر ولودمیر زيلینسکي او د جرمني د صدراعظم شولڅ په کتنه کې وشو.

شولڅ وايي، په دغو مرستو کې د هوايي مدافع دستګاوې، توپخانه او بې‌پيلوټه الوتکې شاملې دي.

هغه ویلي دا مرسته د روسیې ولسمشر ولادمیر پوتین ته څرګند پیغام ورکوي، چې جرمني به د اوکراین تر څنګ وي.

زيلینسکي د اروپا د سفر پر مهال په جرمني کې تم شو، تر دې مخکې په جرمني کې د امریکا د متحده‌ایالتونو په یوه پوځي اډه کې د اوکراین په باب یوه نړیواله سرمشریزه لغوه شوه، ځکه په امریکا کې د توفانونو له کبله ولسمشر جو بایډن په خپل هېواد کې پاتې شو او ګډون یې نه‌شوای کولی.

شمالي کوریا پر خپل رقیب هېواد جنوبي کوریا تور ولګاوه، چې د شمالي کوریا خلاف د تبلیغاتي پاڼو د شیندلو لپاره د شمالي کوریا پر پلازمېنه بې‌پېلوټه الوتکې الوزوي.

شمالي کوریا خبرداری ورکړ، که دا الوتنې بیا تکرار شي، دوی به مجبور شي چې د ځواک په کارولو سره یې ځواب ووايي.

د شمالي کوریا د بهرنیو چارو وزارت پرون جمعه په یوه اعلامیه کې وویل، چې د جنوبي کوریا بې‌پېلوټه الوتکې د اکتوبر میاشتې پر درېیمه، تېره چهارشنبه او پنج‌شنبه کشف شوي دي.

دغه وزارت جنوبي کوریا د شمالي کوریا له ملي حاکمیت په سرغړونه او د شمالي کوریا امن ته د خطر په پېښولو تورنه کړه.

د جنوبي کوریا حکومت او پوځ د شمالي کوریا د بهرنیو چارو وزارت د دغه بیان په باب څه نه‌دي ویلي.
د دواړو کوریاګانو ترمنځ په وروستیو کې د ځینو موضوعاتو پر سر کړکېچ زیات شوی دی.

د ملګروملتونو د روغتیا نړیوال سازمان (WHO) پر اسرايیل تور ولګاوه، چې د هغو امبولانسونو په وړاندې خنډ جوړوي، چې کار یې د جدي ناروغانو لېږدول دي، په ځانګړي ډول د غزې له خطرناکو برخو.

د اشغال شویو سیمو لپاره د روغتیا نړیوال سازمان استازي ریک پیپرکورن (Rik Peeperkorn) ویلي، دغه سازمان او د سرې میاشتې ټولنې په څېر یې نورو شریکانو په درېیو مواردو کې هڅه وکړه، چې د امبولانسونو له کتارونو سره، د غزې تړانګې په شمال کې درېیو روغتونونو ته ځانونه ورسوي.

د ده په وینا د محلي روغتیايي چارواکو په غوښتنه باید ځینې ناروغانو نورو ساحو ته لېږدول کېدلای، ځکه اسرايیلي چارواکو دوی ته له دغو ساحو او روغتونونو د وتلو امر کړی و.

د روغتیا نړیوال سازمان دغه استازي ویلي، د دوی کاروانونه د څو ساعتونو لپاره په چک پاینټونو کې ځنډول شوي دي.
د ده په وینا، بالاخره بې له‌دې چې څه ترلاسه شي، دغو کاروانونو ته بېرته د ستنېدو امر وشو.