د لاسرسۍ وړ لېنکونه

تازه خبر
سه شنبه ۲۵ غبرګولی ۱۴۰۰ کابل ۰۲:۳۸

نړۍ

لبنان: د حزب الله ډلې په یوه مرکز کې د موټر بم چاودنه شوې

لبناني چارواکې وایي، د هېواد په ختیځ کې د حزب الله ډلې په یوه مرکزکې د موټر بم چاودنه شوې او زیاته مرګ ژوبله لري.

د لبنان ملي خبري اژآنس وایي، چاودنه نن سهار وختي د بالبیک سیمې سبوابوا کلې ته نږدې وشوه.

د لبنیان امنیتي چارواکو چاودنه تائید کړې، خو وایي چې د پېښې په اړه زیات معلومات نه لري.

په دې وروستیو کې په لبنان کې د حزب الله ډلې پرهدفونو حملې کېږي.

دا ډله په سوریه کې د بشار الاسد د رژیم د ملاتړو په څنګ کې جنیګږي او د سنیانو له خوا له ګواښونو سره مخامخ ده.

د ورځې تازه خبرونه دلته ولولئ

جو بایډن: ناټو د متحده ایالاتو د ګټو لپاره ډېره مهمه ده

د امریکا ولسمشر جو بایډن

د امریکا ولسمشر جو بایډن ویلي ناټو د متحده ایالاتو د ګټو لپاره ډېره مهمه ده.

ولسمشر بایډن همداراز ویلي چې د ناټو تړون پنځمه فقره چې د متقابلې دفاع په اړه ده یو سپېڅلی مکلفیت په ډاګه کوي.

د امریکا ولسمشر چې د بلجیم پلازمېنه بروکسل کې د ناټو سرمشریزې ته وینا کوله ټینګار وکړ اروپا دې پوه شي چې امریکا یې ترڅنګ ده.

بایډن اروپا ته ځکه سفر کړی چې هم د ناټو په سرمشریزه کې برخه واخلي او هم د واشنګټن له ملاتړه خپلو اروپايي ملګرو ته ډاډ ورکړي.

د امریکا د مخکېني ولسمشر ډونالد ټرمپ په دوره کې د امریکا او اروپا اړیکې سړې شوې وې.

تمه ده ولسمشر جو بایډن د چهارشنبې په ورځ د سویس په جنوا کې د روسیې له ولسمشر ولادیمیر پوتین سره وګوري.

چین د «جي-اووه» ګډه اعلامیه خپلو کورنیو چارو کې ښکاره لاسوهنه وبلله

د نړۍ د اووه لویو صنعتي هېوادونو مشران

په لندن کې د چین سفارت د «جي-اووه» یا د نړۍ د اووه لویو صنعتي هېوادونو ګډه اعلامیه د چین په کورنیو چارو کې ښکاره لاسوهنه بللې او دا ډله‌یې په سیاسي جعل‌کارۍ تورنه کړې ده.

دا وروسته له هغه چې «جي-اووه» هېوادونو په بیجنګ باندې په شینجن او هانګ کانګ کې د بشري حقونو د سرغړونو د ریکارډ د پرېښودلو انتقاد وکړ.

چین په شینجن کې د خپلو سیاستونو په خاطر ورځ تر بلې له نړیوالو نیوکو سره مخ کېږي.

اخوا له اویغور مسلمانانو سره د چین چلند د متحده ایالاتو له‌خوا نسل‌وژنه بلل شوې ده.

د «جي-اووه» په اعلامیه کې له چین غوښتل شوي چې بشري حقونو او اساسي ازادیو ته درناوی وکړي.

په لندن کې د چین سفارت نن په اعلامیه کې زیاته کړې چې «جي-اووه» هېوادونه دې د ګډوډۍ او تقابل د رامنځته کولو پر ځای نړیواله همکاري دود کړي.

د اسکار جایزې ګټونکی نېډ بېټي ومړ

ارشیف، د اسکار جایزه

د هالیووډ د سینما وتلی لوبغاړی نېډ بېټي په ۸۳ کلنۍ ومړ.

ده په څو فلمونو له هغې ډلې ډېلورېنس، سوپرمن او نېټورک کې د لوبېدو لپاره خورا شهرت ګټلی.

روېټرز خبري اژانس د اسکار جایزې د دې ګټونکي سینمايي لوبغاړي د لور بلوسوم بېټي په حواله لیکلي چې نېډ بېټي په لاس انجلس کې په خپل کور کې ساه ورکړې.

نېډ بېټي اته زامن او لورګانې درلودې او د امریکا د کینټاکي ایالت اصلي اوسېدونکی و.

دی یکشنبه سهار مړ شوی.

نېډ بېټي په څه باندې ۱۵۰ فلمونو او ټلوېزیوني ډرامو کې کار کړی.

د ناټو غړو هېوادونو مشران نن په بروکسل کې غونډه لري

بروکسل کې د ناټو مرکز کې د نننۍ غونډې لپاره چمتووالی

د ناټو غړو هېوادونو مشران نن په بروکسل کې غونډه لري، دا د شمالي اتلانتیک تړون/ناټو سازمان ۳۱ سرمشریزه ده چې د امریکا له ولسمشر جو بایډن نیولې د ناټو د ټولو غړو هېوادونو مشران، دفاع او بهرنیو چارو وزیران په‌کې برخه لري.

تمه ده دوی د ناټو اړوند مسئلو له هغې ډلې ټولیز امنیت، اوکراین او ځینو نورو موضوع‌ګانو سربېره په افغانستان کې د ناټو په مأموریت او له دغه هېواده د بهرنیو ځواکونو د وتلو په اړه بحث وکړي.

د ناټو د ۳۰ غړو هېوادونو د مشرانو لپاره به نننۍ سرمشریزه د دې یو فرصت رامنځته کړي چې له هغه مأموریت سره خدای پاماني وکړي چې د ناټو د تأسیس په تاریخ کې د دې تړون د سیاسي جغرافیې بهر لومړنی لوی او اوږد مأموریت و.

د ناټو ۳۰ غړي هېوادونه پر دې هم غور کوي چې په څه ډول کولای شي له افغانستانه بهر د افغان ځانګړو ځواکونو روزنې ته دوام ورکړي.

ناټو ژمنه کړې چې په خپل ملکي حضور سره به د افغانستان د دولت او خلکو ملاتړ ته دوام ورکړي.

د برما لیرې کړای شوې رهبره د خپلې محاکمې په لومړۍ جلسه کې راڅرګندېږي

د برما لیرې کړای شوې رهبره انګ سان سوچي

د برما لیرې کړای شوې رهبره انګ سان سوچي نن دوشنبه د خپلې محاکمې په لومړۍ جلسه کې راڅرګندېږي.

دا په داسې حال کې ده چې دوه میاشتې مخکې د پوځي کودتا له کبله د جنوب ختیځې اسیا د دغه هېواد د ډیموکراسۍ تجربه ختمه شوه.

د برما پخوانۍ ملکي رهبره سان سوچي د تېر کال په ټاکنو کې د سرغړونو په تور محاکمه کېږي.

په هغو ټاکنو کې د هغې په رهبرۍ د ډیموکراسۍ لپاره ملي لیګ په اکثریت رایو ګټونکی شوی و.

له پوځي کودتا راهیسې پوځ له وسله‌والو قومي ډلو سره له نوې شخړې سره مخامخ دی او هره ورځ په دغه هېواد کې د سان سوچي پلویان مظاهرې کوي چې په دې موده کې لږترلږه ۸۵۰ اعتراض کوونکي وژل شوي دي.

د ناټو سرمشریزه؛ جو بایډن بروکسل ته ورسېد

د امریکا ولسمشر جو بایډن

د امریکا متحده ایالاتو ولسمشر جو بایډن د ناټو په سرمشریزه کې د ګډون لپاره د بلجیم پلازمېنې بروکسل ته ورسېد.

دا د ولسمشر په توګه د بایډن تر ټاکل کېدو وروسته د هغه بهرنی لومړنی سفر دی.

بایډن د اوو سترو صنعتي هېوادونو یا «جي-اووه» ډلې په درې ورځنۍ سرمشریزه کې چې د بریتانیا جنوب د کورنوال ساحلي ښار یې کوربه و، له ګډون وروسته بروکسل ته رسېدلی دی.

بایډن به د ناټو په دوه ورځنۍ سرمشریزه کې چې نن دوشنبه پیلېږي له ګډون وروسته، د راتلونکې چهارشنبې په ورځ د روسیې له ولسمشر ولادیمیر پوتین سره د سویس په جنوا ښار کې وګوري.

بایډن په «جي-اووه» سرمشریزه کې همکاري ډېره عالي وبلله او ویې‌ویل چې د ده د ښکېلتیا لپاره یوه رښتینې لېوالتیا رامنځته شوې.

نوموړي په یوه خبري غونډه کې وویل چې امریکا بېرته د نړۍ د چارو مشري ته ورستنه شوې او له َټولو هغو هېوادونو سره به چې زموږ ژور ارزښتونه پالي، دغه مشري مخ ته یوسي.

«جي-۷» بې‌وزلو هېوادونو سره د کرونا ضد یو میلیارد دوز واکسین مرستې ژمنه وکړه

د نړۍ اوو سترو صنعتي هېوادونو یا «جي-اووه» ډله

د نړۍ اوو سترو صنعتي هېوادونو یا «جي-اووه» ډلې ژمنه وکړه چې له بې‌وزلو هېوادونو سره به د کرونا ضد یو میلیارد دوزه واکسین مرسته کوي.

د دې ډلې د سرمشریزې کوربه د بریتانیا صدراعظم بورېس جانسون پرون یکشنبه د درې ورځنۍ سرمشریزې په پای کې دغه اعلان وکړ او ویې‌ویل چې دغه واکسین به مستقیم هېوادونو ته ورکول کېږي یا به‌یې د روغتیا د نړیوال سازمان ائتلاف کوواکس ته ورکول کېږي.

متحده ایالاتو د نیم میلیارد او بریتانیا د ۱۰۰ ملیون دزه واکسین د مرستې ژمنې کړې دي، خو د روغتیا نړیوال سازمان ویلي چې د نړۍ په سلو کې ۷۰ وګړو د واکسین کولو لپاره ۱۱ میلیارد ډوزه واکسین ته اړتیا ده.

د امریکا ولسمشر جوبایډڼ په یوه خبري کنفرانس کې وویل چې دا به د «جي-اووه» د ډلې له‌خوا وروستۍ مرسته نه‌وي، بلکې متحده ایالات ښایي پر نیم میلیارد ډوزه واکسین سربېره یو میلیارد دوزه نور هم برابر کړي.

اسرائیل کې د صدراعظم په توګه د بنیامین نتانیاهو واک پای ته ورسېد

د اسرائیل مخکېنی صدراعظم بنیامین نتانیاهو

د اسرائیل پارلمان د رایو په لږ توپیر نوی ائتلافي حکومت تأیید کړ او په دې توګه د بنیامین نتانیاهو واک چې ۱۲ کاله‌یې د صدراعظم په توګه دنده ترسره کړې، پای ته ورسېد.

د اسرائیل ۱۲۰ کسیز پارلمان یا کنیسیت پرون دغه نوی ائتلافي حکومت د یوې رایې په توپیر تأیید کړ، یعنې ۶۰ غړو ورته مثبتې او ۵۹ منفي رایې ورکړي.

د نوي ائتلافي حکومت مشري د سخت دریځي ملت‌پال ګوند یامینا مشر ۴۹ کلن نفتالي بینیت«Naftali Bennett» کوي چې پرون‌یې د نوي صدراعظم په توګه لوړه وکړه.

۷۱ کلن نتانیاهو په دې کې پاتې راغی چې د اسرائیل د پارلماني انتخاباتو وروسته چې د مارچ په ۲۳مه ترسره شوي، نوی ائتلافي حکومت جوړ کړي.

له ښاغلي بینیت سره د ښي، کین اړخو او منځلارو او دغه‌راز د عربو د ګوندونو یو پراخ ائتلاف یوځای شوی دی.

د قدرت پر سر د شوې موافقې له مخې به بینیت د ۲۰۲۳ کال تر سپټمبر پورې د صدراعظم په توګه دنده ترسره کوي او له هغې وروسته به واک د دوو نورو کلونو لپاره د منځلاري یش اتید (Yesh Atid) ګوند مشر یار لپید (Yair Lapid) ته سپاري.

نتانیاهو د لیکود ګوند د مشر په توګه خپل کار ته دوام ورکوي.

پوتین: که امریکا ورته اقدام ته اماده وی، شکمن سایبر مجرمین به مو ورسپارلي وی

د روسیې ولسمشر ولادیمیر پوتین

د روسیې ولسمشر ولادیمیر پوتین ویلي که امریکا هم ورته اقدام ته اماده وی، نو مسکو به شکمن سایبر مجرمین ورتسلیم کړي وی.

پوتین دا خبرې د امریکا له ولسمشر جو بایډن سره تر لیدنې مخکې په هغه مرکه کې کړي چې نن د روسیې په دولتي ټلوېزیون خپره شوې ده.

پوتین ویلي که مسکو او واشنګټن په دې تړاو موافقې ته رسېدلي وی، نو مسکو د سایبر جرمونو شکمن عاملین امریکا ته سپارل په دې شرط چې امریکا هم ورته کار کړی وی.

تمه ده پوتین او بایډن د جون په ۱۶مه په جنوا کې وګوري. د امریکا او روسیې اړیکې دا وروستي کلونه د روسیې د سایبري حملو په خاطر کړکېچنې شوې دي.

سپینې ماڼۍ ویلي بایډن به له پوتین سره په لیدنه کې د دغو بریدونو موضوع راپورته کړي.

د سایبري بریدونو مسئله یو وار بیا تازه وروسته له هغه ډېره یادېږي چې امریکايي چارواکو ویلي سایبري بریدګرو له روسیې په ختیځه څنډه کې د ګازو د پایپ‌لاینو چلوونکی هدف ګرځولی.

سیسټم‌یې ورتړلی او پيسې یې ترې غوښتي.

چین کې د ګازو د پایپ‌لاین چاودنې ۱۲ تنه وژلي او ۳۹ نور سخت ټپیان دي

ارشیف، د چین پولیس د یوې چاودنې په سیمه کې د څېړنو پر مهال

د چین په یوه هستوګنه سیمه کې نن د ګازو د پایپ‌لاین چاودنې ۱۲ تنه وژلي او ۳۹ تنه نور یې سخت ټپیان کړي.

د چین دولتي رسنیو راپور ورکړی چې له پېښې وروسته د هوبې ولایت په شیان ښار کې ۱۵۰ کسان په روغتون کې بستر شوي هم دي.

لا هم د ځینو خلکو د ژغورنې عملیات روان دي.

حکومتي چارواکو ویلي ټپيانو ته د مرستې رسولو هڅې روانې دي، خو د ګازو د پایپ د چاودنې د لامل په اړه څه نه‌دي ویل شوي.

دا پېښه د چین په شمال ختیځ بندر کې د ۲۰۱۳ کال د بمي چاودنې په څېر وه چې له امله‌یې د ګازو د ځمکې لاندې نل چاودلی و او ۵۵ کسان‌یې وژلي وو.

روسیې د برلین د فلمونو د فیسټیوال ګټونکي فلم د خپرولو ممانعت وکړ

د رومانیايي فلم جوړوونکي رادو جود (Bad Luck Banging Or Loony Porn) فلم

روسیې د برلین د فلمونو د فیسټیوال ګټونکي فلم د خپرولو ممانعت وکړ او د دې کار دلیل‌یې په دغه هېواد کې پر بربنډو فلمونو د لګېدلو محدودیتونو ماتول ګڼلي دي.

سږ کال د برلین د فلمونو د فیسټیوال د غوره فلم جایزه (Bad Luck Banging Or Loony Porn) فلم ګټلې ده.

رومانیايي فلم جوړوونکي رادو جود دا فلم جوړ کړی.

د دې طنز ګوټي فلم کیسه په دې څرخي چې د ښوونځي د یوې ښوونکې له‌خوا د کوروالي په تړاو د شخصي لارښوونو یوه وېډیو انټرنټ ته وځي. که څه هم د ښوونکې عزت له خطر سره مخ دی او د ښوونځي د شاګردانو کورنۍ پرې انتقادونه کوي، خو له دې ټولو فشارونو سربېره نه‌غواړي چې له معلمۍ لاس واخلي.

د برلین د فلمونو فیسټیوال دې فلم ته د طلايي اېږ/خرس اوارډ ورکړی او تلپاتی هنري اثر یې بللی دی.

ارمنستان په نګورنو قره‌باغ کې د ایښودل شویو ماینونو نقشه اذربایجان ته ورکړه

ارشیف، د نګورنو قره‌باغ، اذربایجان او ارمنستان نقشه

ارمنستان د اذربایجان له ډېرو غوښتنو وروسته د نړیوالو په منځګړیتوب په نګورنو قره‌باغ کې د ایښودل شویو ماینونو نقشه باکو ته وسپارله.

د اذربایجان د بهرنیو چارو وزارت پرون (شنبه) د دې خبرې د تأییدولو ترڅنګ وویل چې د نقشې په بدل کې یې ۱۵ ارمنیان چې په اذربایجان کې بندیان وو، خوشې کړي دي.

د ارمنستان له لوري اذربایجان ته په سپارل شوې نقشه کې د ۹۷ زره ایښودل شویو ماینونو ځایونه ښودل شوي دي.

د تېر کال د سپټمبر له ۲۷مې د نومبر تر ۱۰مې پورې د اذربایجان او ارمنستان ترمنځ په جګړه کې اذري ځواکونو هغه سیمې بېرته ونیولې چې درې لسیزې پخوا ارمنستان نیولې وې.

پاکستان کې سلګونه کسان په کاناډا کې د یوې وژل شوې کورنۍ په ویر راټول شول

کاناډا کې د یوې پاکستاني کورنۍ د وژل کېدو د ویر په مراسمو کې د سلګونه کسانو ګډون

سلګونه کسانو پرون (شنبه) د هغې پاکستانۍ کورنۍ د ویر په مراسمو کې ګډون وکړ چې تېره یکشنبه په کاناډا کې په موټر ووهل شوه.

د راپورونو له مخې، د جون په شپږمه یوه ۲۰ کلن سړي په خپل پیک‌اپ موټر د کاناډا په لندن ښار کې د یوې پاکستاني‌الاصله کاناډايي کورنۍ ۴ غړي ووهل.

په دې پېښه کې سلمان افضل، مېرمن‌یې مدیحه سلمان، مور یې او یوه ۱۵ کلنه نجلۍ په داسې حال کې مړه شول چې له سړکه تېرېدل.

د کاناډا پولیسو د نتانیال والټمن په نوم یو کس تورن کړی او ویلي یې دي چې نوموړي د کرکې له مخې دا جرم کړی دی.

ټاکل شوې ده چې تورن سبا (دوشنبه) محکمې ته حاضر شي.

دې پاکستاني ټبره کورنۍ شاوخوا ۱۴ کاله پخوا کاناډا ته پناه وړې وه.

جو بایډن د جاپان صدراعظم ته د توکیو د المپیک سیالیو د ملاتړ ډاډ ورکړ

د امریکا ولسمشر جو بایډن او د جاپان صدراعظم یوشیهاید سوګا

د امریکا ولسمشر جو بایډن د جاپان له صدراعظم یوشیهاید سوګا سره په کتنه کې د توکیو د المپیک سیالیو د ملاتړ ډاډ ورکړ، خو په عین حال کې یې وویل، په‌کار ده چې د برخه‌والو د خوندیتوب لپاره روغتیايي تدابیر په پام کې ونیول شي.

د سپینې ماڼۍ له یوې خبرپاڼې سره سم، بایډن په بریتانیا کې د «جي-۷» ډلې د سرمشریزې په څنګ کې پرون د جاپان له صدراعظم سره په خبرو کې وویل، پر هغو امریکايي لوبغاړو ویاړي چې د توکیو د لوبو لپاره روزل شوي دي.

په ۲۰۲۰ م کال د توکیو المپیک لوبې په نړۍ کې د کرونا وبا د خپرېدو له کبله وځنډول شوې.

ټاکل شوې ده چې د جولای په ۲۳مه نېټه دا لوبې په توکیو کې له دې سره سره پیل شي چې ډېر خلک، ګڼې جاپانۍ کمپنۍ او طبي کارکوونکي یې مخالف دي.

د امریکا په درې ایالتونو کې ۲ تنه په ډزو وژل شوي او لږترلږه ۳۰ نور ژوبل دي

ارشیف، یو امریکايي پولیس

د امریکا په درې ایالتونو کې په ډزو ۲ تنه وژل شوي او لږترلږه ۳۰ نور ژوبل شوي دي.

دا پېښې په داسې حال کې شوي چې په متحده ایالاتو کې د کرونا وبا د خپرېدو د مخنیوي لپاره د بندیزونو د نرمېدو له کبله د خلکو سفرونه، راټولېدنې او راشه درشه ډېره شوې ده.

دا بریدونه وړمه شپه او پرون په تکزاس، ایلینویز او جورجیا ایالتونو کې وشول.

دا په روان کال کې د امریکا په متحده ایالاتو کې ۱۷مه حمله ده چې پر خلکو کېږي.

نور راوښيه

XS
SM
MD
LG