د لاسرسۍ وړ لېنکونه

تازه خبر
سه شنبه ۱ لړم ۱۴۰۳ کابل ۰۹:۱۰

افغانستان

پکتیکا: که د پاکستان حملې دوام وکړي ډیرې کورنۍ به کډې کولو ته اړ شي

د پکتیکا امنیتي مسولین وایي، که چیرې د پاکستان له خاورې د توغندیو ویشتل دوام وکړي نو د دغه ولایت د سرحدي ولسوالیو ډیرې کورنې به کډې کولو ته اړ شي.

د دغه ولایت د امنیې قومندان دولت ځدراڼ ازادي راډیو ته وویل چې تیره شپه ناوخته هم له وزیرستان څخه په برمل ولسوالۍ باندې پنځه توغندي راتوغول شوي دي.

دا په داسې حال کې ده چې له دې یوه ورځ مخکې د پکتیکا په وازې خوا او تورو ولسوالۍ باندې د پاکستان له خاورې شااوخوا دیرش توغندي راغلل چې له امله یې یوشمیر کورنۍ د کورونو پریښودو ته اړ شوې.

د ورځې تازه خبرونه دلته ولولئ

د بنګله‌دېش پر وړاندې درې یو ورځنیو سیالیو ته افغان لوبډله اعلان شوه

د افغانستان کرکټ ملي لوبغاړي.
د افغانستان کرکټ ملي لوبغاړي.

د افغانستان کرکټ بورډ اداې نن په یوه خبر کې د بنګله‌دېش پر وړاندې درې یو ورځنیو سیالیو ته افغان لوبډله اعلان کړه.

کرکټ بورډ ویلي دي چې، دغه درې یو ورځنۍ سیالۍ به د راتلونکې نومبر میاشتې په ۶مه نېټه پیل او تر ۱۱مې نیټې به دوام لري.

یادې ادارې دا هم ویلي دي چې، ابراهیم ځدراڼ او مجیب‌الرحمن د خپلو ټپونو له امله لا هم د لوبې جوګه نه‌‌دي، نو ځکه یې نه‌دي غوره کړي.

دوه نور افغان لوبغاړي صدیق اتل او نوراحمد چې د سویلي افریقا پر وړاندې لوبلړۍ کې نه و، دې سیالیو ته رابلل شوي دي.

په اعلان شوې لوبډله کې حشمت‌الله شهیدي لوبډلمشر، رحمت‌شاه زرمتی مرستیال لوبډلمشر، رحمن‌الله ګربز او اکرام علي‌خېل وېکټ ساتونکي، عبدالمالک، ریاض حسن، صدیق‌الله اتل، دروېش رسولي، عظمت‌الله عمرزی، محمد‌نبي، ګلبدین نایب، راشد خان، ننګیال خروټی، الله محمد غضنفر، نور احمد، بلال سمیع، فضل‌الحق فاروقي، نوید ځدراڼ او فرید احمد ملک شامل دي.

د ویلو ده چې د بنګله‌‌دېش پر وړاندې لومړۍ لوبه به د نومبر په ۶مه، دویمه د نومبر په ۹مه او وروستۍ د همدې میاشتې په ۱۱مه نېټه د عربي متحده اماراتو د شارجې په لوبغالي کې وي.

کرکټ؛ هانګ کانګ د افغانستان الف لوبډلې ته ماتې ورکړه

د افغانستان او هانګ کانګ کرکټ لوبه.
د افغانستان او هانګ کانګ کرکټ لوبه.

د اسیا ایمرجینګ جام په ګروپي پړاو کې افغان ابدالیانو خپله وروستۍ لوبه د ۵ وېکټو په توپیر د هانګ کانګ ملي لوبډلې ته وبایلله.

دغه سیالي چې د عمان په کوربه‌توب د کابل پر وخت ماسپښین ۱:۳۰بجه پیل شوې وه افغان لوبډلمشر د پچې تر ګټلو وروسته توپوهنه غوره کړه.

افغان لوبډلې د ټولو لوبغاړو تر سوځېدو وروسته په ۱۹.۵ اورونو کې ۱۳۱ منډې وکړې.

په‌دې سیالۍ کې هم د افغان توپوهونکو له ډلې صدیق‌الله اتل مخکښ و، هغه ۵۲ منډې وکړې.

دغه راز کریم جنت ۲۱ او نعمان شاه ۲۰ منډې جوړې کړې.

د هانګ کانګ په توپ اچونکو کې بیا انس خان ښه وځلېد چې ۶ افغان لوبغاړي یې وسوځول او د دې لوبې د غوره لوبغاړي جایزه یې هم وګټله.

یادې لوبډلې ورکړل شوی هدف د وروستي اور په درېیم توپ د ۵ لوبغاړو تر سوځېدو وروسته پوره کړ او په‌‌دې سره یې د ایمرجینګ په روان جام کې خپله لومړۍ بریا ثبت کړه.

د هانګ کانګ لوبډلمشر نزاکت خان ۶۱ او بابر حیات بیا ۳۹ منډې وکړې.

په افغان توپ اچونکو کې عبدالرحمن رحماني ۳ او قیس احمد دوه لوبغاړي وسوځول.

د افغانستان الف لوبډلې په ګروپي پړاو کې د سریلانکا او بنګله‌‌دېش الف لوبډلې ماتې کړې دي او له وړاندې نیمه پایلوبې ته رسېدلي دي.

د روان جام د ګروپي پړاو وروستۍ سیالۍ به سبا چهارشنبه د اکټوبر په ۲۳مه نېټه پای ته ورسېږي او له هغې وروسته به څرګنده شي چې د اکټوبر په ۲۵مه نېټه افغان لوبډله له هندوستان او یا هم پاکستان سره نیمه پایلوبه لوبوي.

د ویلو ده چې د اسیا ایمریجنګ جام پایلوبه به د اکټوبر په ۲۷مه نېټه وي.

د افغانستان واليبال ملي لوبډلې تاجکستان ته خپله لوبه وبايلله

د افغانستان واليبال ملي لوبډله.
د افغانستان واليبال ملي لوبډله.

د افغانستان د والیبال ملي لوبډلې له خپل سیالې تاجکستانۍ لوبډلې نه درې پر دوه ماتې وخوړه.

د منځنۍ اسیا د والیبال د سیالیو په دوام کې چې د ازبکستان په پلازمېنه تاشکند کې ترسره کېږي، د افغانستان د والیبال ملي لوبډله په خپله څلورمه سیالۍ کې نن سه‌شنبه د عقرب په لومړۍ نېټه د تاجکستان د والیبال له ملي لوبډلې سره په میدان کې لوبه وکړه.

تاجکستان دغه لوبه د درې پر دوه په توپیر سره وګټله.

دغه سيالۍ د ازبکستان د تاشکند په ښار کې د منځنۍ اسيا د شپږو ټيمونو په ګډون د زمري د مياشتې په ٢٧مه پيل شوې دي او د پنج‌شنبې په ورځ د سلواغې په درېيمه به پاى ته ورسېږي.

د طالبانو د احصايې اداره: سږکال افغانستان کې نږدې پنځه ميليونه ميټريک ټنه غنم توليد شوي

ارشیف: په افغانستان کې د غنمو د راټولولو له بهیره یو انځور
ارشیف: په افغانستان کې د غنمو د راټولولو له بهیره یو انځور

د طالبانو د حکومت د احصایې او اطلاعاتو اداره وايي، سږ کال په افغانستان کې د غنمو حاصلات زیات شوي دي.

دې اداري په یوې خبرپاڼې کې چې نن یې خپره کړې ویلي، د غنمو په حاصلاتو کې یې د زیاتوالي په اړه دا معلومات د ریموټ سینسینګ یا له لرې د معلوماتو د راټولولو د ټیکنالوژۍ او سټلایت د عکسونو په وسيله راټول کړي.

په خبرپاڼه کې همداراز ویل شوي، سږ کال په ټول هېواد کې ۴.۸۳ میلیونه مټریک ټنه غنم تولید شوي او دا اندازه د تېر کال پرتله د غنمو په حاصلاتو کې لس سلنه زیاتوالی ښيي.

پر وخت ورښتونه او په ځینو ځایونو کې د کوکنارو پر ځای د غنمو کر، د غنمو په حاصل کې د دې زیاتوالی سبب ښودل شوی.

د همدې ادارې په وینا د غنمو په حاصلاتو کې د دې زیاتوالي سربېره سږ کال لا هم افغانستان شاوخوا د دوه میليونه میټریک ټنه غنمو واردولو ته اړتیا لري.

په همدې حال کې WFP یا د خوړو نړیوال پروګرام وايي، په ۲۰۲۴ کال کې په افغانستان کې څه کم ۲۴ میلیونه وګړي عاجلو بشري مرستو ته اړتیا لري.

د دغه سازمان د معلوماتو له‌مخې دا مهال د درې میليونو څخه د زیاتو ماشومانو په ګډون ۴ میلیونه افغانان له خوارځواکۍ سره مخ دي.

افغان ابدالیانو د هانګ کانګ لوبډلې ته د ۱۳۲ منډو هدف ورکړ

د افغانستان او هانګ کانګ د لوبې يو انځور
د افغانستان او هانګ کانګ د لوبې يو انځور

د اسیا ایمرجینګ جام په ګروپي پړاو کې نن سه‌شنبه د اکټوبر په ۲۲مه نېټه د افغانستان الف لوبډلې د هانګ کانګ له ملي لوبډلې سره سیالي پیل کړې ده.

دغه سیالي چې د عمان په کوربه‌توب د افغانستان په وخت ماسپښین ۱:۳۰بجه پیل شوې ده، افغان لوبډلې د پچې تر ګټلو وروسته توپوهنه غوره کړه.

افغان لوبډلې ونه کړای شول چې پوره شل اورونه ولوبوي، ټوله لوبډلې یې په ۱۹.۵ اورونو کې وسوځېده او ۱۳۱ منډې یې وکړې.

په نننۍ سیالۍ کې د افغان توپوهونکو له ډلې یو وار بیا صدیق اتل نیمه سلیزه ووهله او ۵۲ منډې یې وکړې.

په نورو توپوهونکو کې کریم جنت ۲۱ او نعمان شاه ۲۰ منډې وکړې.

د هانګ کانګ لپاره په توپ اچونه کې کیڼ لاسي ورو توپ اچونکي انس خان ښه وځلېد، چې په ۳.۵ اورونو کې یې ۱۲ منډې ورکړې او ۶ لوبغاړي یې وسوځول.

افغان لوبډله له وړاندې نیمه پایلوبې ته رسېدلې ده، خو تر دې لوبې وروسته به څرګنده شي چې په اول یا هم دویم مقام کې پاتې کېږي.

د سمنګان-بغلان پر لویه لاره ترافیکي پېښه؛ یو کس مړ او شپږ نور ټپیان شوي

ارشیف
ارشیف

د سمنګان-بغلان پر لویه لاره په یوه ترافیکي پېښه کې د يو تن د مړينې او شپږ نورو د ټپي کېدو خبر ورکړل شوی دی.

د سمنګان د امنیې قوماندانۍ ویاند حشمت الله رحماني کورنیو رسنیو ته ویلي، د دوشنبې ماسپښین د سمنګان په رباطک سیمه کې یو فورتینر ډوله موټر چپه شو چې په کې يو ماشوم ساه ورکړې او د ښځو او ماشومانو په شمول شپږ کسان نور په کې ټپيان شوي دي.

نوموړي زیاته کړه چې ټپیان د سمنګان ولایتي روغتون ته لېږدول شوي دي.

د سړکونو خرابوالی، د ترافیکي اصولو نه رعایت او د چلوونکو بې‌احتیاطي په افغانستان کې د زیاتو ترافیکي پېښو لوی لاملونه ګڼل کېږي.

طالبانو په هرات کې د ۳۰ بېلابېلو وحشي مرغانو د خوشې کولو خبر ورکړی

ارشیف
ارشیف

په هرات کې د طالبانو چارواکي په طبعیت کې د ۳۰ بېلابېلو وحشي مرغانو د خوشې کولو خبر ورکوي.

د طالبانو تر کنټرول لاندې باختر دولتي خبري اژانس د چاپېريال ساتنې د رياست د مسوولانو په حواله خبر ورکړی چې دغه مرغان د چاپېريال ساتنې د سرغړوونکو له‌خوا د سپين ادې او د مرغانو پلورونکو له بازار څخه راټول شوي وو.

په خبر کې د دغو طالب چارواکو په حواله راغلي چې دوی په جدي توګه د وحشي ژوو د ښکار، انتقال، قاچاق، پېر او پلور مخه نیسي.

د باختر اژانس د خبر له مخې، د کشک رباط سنګي ولسوالۍ امنيه قوماندانۍ هم په دغې ولسوالۍ کې د وحشي حيواناتو د ښکار په تور درې کسان نيولي او عدلي او قضايي ارګانونو ته يې سپارلي دي.

د افغانستان د خپلو وحشي مرغانو سربېره، دا هېواد د نایابه مرغانو د موسمي مهاجرت په مسیر کې هم دی چې هر کال د هند بحر څخه سایبریا ته او برعکس عکس یې مهاجرت کوي.

د افغانستان په ۱۴ ولایتونو کې د شدیدو ورښتونو او سېلابونو د راوتلو اټکل شوی

ارشیف: په لغمان کې بارانونو او سېلابونو زیانونه اړولي دي.
ارشیف: په لغمان کې بارانونو او سېلابونو زیانونه اړولي دي.

نن سه شنبه، سبا او بل سبا د افغانستان په ۱۴ ولایتونو کې د شدیدو ورښتونو او سېلابونو اټکل شوی دی.

د طالبانو د حکومت تر کنټرول لاندې باختر خبري اژانس د افغانستان د هوا پېژندې ادارې او نړیوالو بنسټونو په حواله راپور ورکړی چې د بدخشان، تخار، بغلان، بامیان، سمنګان، بلخ، سرپل، پنجشېر، غوربند، کونړ، لغمان، ننګرهار، کابل، لوګر او یو شمېر اړوندو سیمو کې د بارانونو او د واورو د ورښت له امله د سیندونو د اوبو د کچې د لوړېدو او د سېلابونو د راوتلو او اټکل شوی دی.

دا په داسې حال کې ده چې په دې وروستیو کې په یو شمېر ولایتونو کې له دې ډلې ننګرهار او کونړ کې شدیدو ورښتونو او سېلابونو خلکو ته مالي او ځاني زیانونه وراړولي دي.

د افغانستان د فوټبال ۱۷ کلنو ځوانانو فیلیپین ته لویه ماتې ورکړه

د افغانستان د فوټبال ۱۷ کلنو لوبډله
د افغانستان د فوټبال ۱۷ کلنو لوبډله

د ۱۷ کلنو ځوانانو د فوټبال اسیايي سیالیو د لارموندنې په پړاو کې افغانستان د فیلیپین لوبډلې ته ۸ د صفر پر وړاندې ماتې ورکړه.

دغه سیالي د دوشنبې په ورځ د اکټوبر په ۲۱مه نېټه د کمبودیا په کوربتوب ترسره شوه.

د فوټبال اسیايي سیالیو د لارموندنې په پړاو کې افغانستان په سربېره، له کمبودیا، بنګله دېش او ماکایو سره هم سیالۍ لري.

د فیلیپين پر وړاندې لوبه کې د افغانستان ۱۷ کلنو ځوانانو لپاره وارث شېرزي او ارش احمدي دوه ـ دوه او نوید محبوبي، یاسر ساپي، جواد ابراهیمي او ساحل سروري یو ـ یو ګول وواهه.

د افغانستان دوهمه سیالي به د راتلونکې چهارشنبې په ورځ د اکټوبر په ۲۳مه نېټه د ماکایو پر وړاندې وي.

د ویلو ده چې د فوټبال اسيايي سیالیو د لارموندنې پړاو د ۴۳ هېوادونو ترمنځ پيل شوي جې په لسو بېلابېلو ګروپونو کې سره سیالۍ کوي.

د افغانستان آزادۍ جبهې د کابل په هوايي ډګر د راکټي برید مسوولیت ومانه

ارشیف: د کابل هوايي ډګر یوه څنډه
ارشیف: د کابل هوايي ډګر یوه څنډه

د افغانستان د آزادۍ جبهې په نوم د طالبانو یوه مخالفه ډله ادعا کوي چې د کابل پر هوايي ډګر یې راکټي برید کړی دی.

دې جبهې نن دوشنبه د تلې ۳۰مه په یوه خبرپاڼه کې ویلي چې د هوايي ډګر پر نظامي برخه یې برید کړی او طالبانو ته یې د سرومال درانه تاوانونه اړولي دي.

په خبرپاڼه کې زیاته شوې چې دې عملیاتو لس دقیقې دوام درلود.

نور راوښيه

XS
SM
MD
LG