د لاسرسۍ وړ لېنکونه

تازه خبر
پنجشنبه ۱۵ غبرګولی ۱۳۹۹ کابل ۰۸:۵۹

افغانستان

ولسمشر کرزی نن کندز ولایت ته ولاړ

د افغانستان جمهوررييس له سيمه ايزو چارواكو، ديني عالمانو او قومي مشرانو سره د خبرو اترو لپاره نن كندز ولايت ته تللى دى.

ټاكل شوې ده، چې ولسمشر كرزى له خلكو سره په ليدنه كې په افغانستان كې د سولې د هڅو او په شمالي ولايتونو كې د امنيت د ټينګښت په اړه هم خبرې وكړي.

راپورونه وايي، چې جمهوررييس كرزى به د كندز ولايت په چهاردرې ولسوالۍ كې د هغو كسانو د كورنيو له غړو سره هم وګوري، چې د جرمني الوتكو په بريد كې تيركال ووژل شول.

په كندز او ځينو نورو شمالي ولايتونو كې په وروستيو مياشتو كې د دولت د وسله والومخالفينو خوځښت او فعاليتونه زيات شوي او له دې امله خلكو اندېښنه ښودلې ده.

ولسمشر كرزي تيره اونۍ له كندهار ولايت څخه هم ليدنه وكړه او له دولتي چارواكو او د خلكوله استازو اوسپين ږيروسره يې په بيلابيلومسايلو خبرې وكړې.

د ورځې تازه خبرونه دلته ولولئ

پکتیا سيمه‌ييز چارواکي: د سید کرم امنیه قوماندان د ماین چاودنه کې وژل شوى

د پکتیا ولایت نقشه

د پکتیا د سید کرم ولسوالۍ امنیه قوماندان، څارمن همایون د ماین په چاودنه کې ووژل شو.

د سید کرم ولسوال محمد شریف کلیوال نن، د جون په ۳مه، د ازادي راډیو خبریال ته وویل چې چاودنه تر لمرخاته مخکې شوې ده.

د پېښې مسئولیت لا چا نه‌دی اخیستی.

د پکتیا امنیه قومانداني هم په دې اړه له خبرو ډډه کړې ده.

ولسمشر غني وزیر اکبر خان کې د پرونۍ پېښې په اړه د څېړنې امر وکړ

محمد اشرف غني

د افغانستان ولسمشر محمد اشرف غني د وزیر محمد اکبرخان مېنې په جومات کې د پرونۍ چاودنې په اړه د څېړنې ځانګړې کمېټه ټاکلې ده.

پرون مازدیګر په چاودنه کې د وزیر محمد اکبر خان مېنې د جومات ملا او په پېژندل شوی دیني لارښوود، محمد ایاز نیازی ووژل شو.

په چاودنه کې یو شمېر ولسي خلک هم چې د لمانځه لپاره جومات ته ورغلي وو، وژل شوي او زخمیان شوي دي.

د ارګ خبرپاڼه چې نن، د جون په ۳مه، خپره شوه، وايي چې د شپږ کسیز څېړونکي پلاوي مشري د حج او اوقاف وزیر عبدالحکیم منیب کوي.

د افغانستان د علماو د سراسري شورا، لویې څارنوالۍ، د ملي امنیت شورا، کورنیو چارو وزارت او د ملي امنیت عمومي ریاست استازي د پلاوي غړي دي.

د چاودنې مسئولیت لا کومې ډلې نه‌دی منلی.

وسله‌والو طالبانو ویلي چې په وزیر محمد اکبرخان مېنه کې پر جومات پرونۍ حمله یو جنایت دی.

خو د افغانستان د جمهور رئیس مرستیال، امر الله صالح ویلي چې په داسې کارونوکې تر دې وړاندې تل وسله‌والو طالبانو لاس درلود.

ناټو سازمان په کابل کې بېګانی بمي برید وغانده

مشهور افغان دیني عالم مولوي محمد ایاز نیازی

د ناټو سازمان په کابل کې پر وزیر اکبر خان کې بمي برید غندلی دی.

په افغانستان کې د دغه سازمان نوي ملکي استازي استفانو پونتیکورو په خپله ټوېټر پاڼه لیکلي چې پر عبادتځایونو او د خلکو په راټولېدنو بریدونه د منلو وړ نه‌دي.

ښاغلي استفانو پونتیکورو ویلي چې افغانان د سوله‌ییز او سوکاله ژوند مستحق دي او ناټو په دې چاره او له ترهګرۍ سره په مبارزه کې د افغانانو تر څنګ ولاړه ده.

بېګا شپه د افغانستان په پلازمینه کابل کې د وزیر محمد اکبر خان مېنې په جامع جومات کې بمي چاودنې د دغه جومات امام وتلی دیني عالم دکتور محمد ایاز نیازی او یو بل عام کس ووژل او دوه نور ملکیان یې ټپیان کړل.

د افغانستان مرستیال ولسمشر امرالله صالح طالبان ملامته کړي چې د داسې بریدونو تر شا لاس لري.

هغه زیاته کړه طالبانو د هغو دیني عالمانو، قومي شخصیتونو، سیاستوالو او علمي څېرو په ترور کې لاس لري چې له پاکستان بهر یې زده کړې کړي دي.

طالبانو د افغانستان د مرستیال ولسمشر امرالله صالح د تازه څرګندونو په اړه څه غبرګون نه‌دی ښوولی خو بیګاه یې ویلي و چې دوی پر ایاز نیازي برید غندي او لوی جنایت یې بولي.

د بېلابېلو ناروغینو مخنیوي په هدف جلال اباد ښار دواپاشي کېږي 

جلال اباد ښار

د ننګرهار چارواکي وايي جلال اباد ښار د بېلابېلو ناروغیو د خپرېدو د مخنیوي په هدف دواپاشي کوي.

د والي ویاند عطاالله خوږیاڼي پرون سې شنبه ازادۍ راډیو ته وویل، په پام کې ده د جلال اباد ټولې ناحیې دواپاشي شي.

هغه وویل: "د دې دواپاشۍ په ترڅ کې به د ملاریا او لشمانیا سربېره د ځینو نورو ناروغیو کنټرول او مخنیوی وشي، دا لړۍ چې اوس په اوومه ناحیه کې پیل شوې ده، د جلال اباد ښار ټولو سیمو ته به وغځول شي."

بلخوا د ننګرهار چارواکو خبر ورکړی، چې د څارنې په لړ کې یې په جلال اباد ښار کې دوه لابراتوارونه چې پر روغتیايي معیارونو برابر نه‌وو، مهر و لاک کړي دي.

هرات کې ۱۳ ډاکترانو خپلې دندې پرېښي

ارشیف

په هرات کې په کرونا ویروس د اخته کسانو د درملنې د روغتون ۱۳ ډاکترانو د کاري ساعتونو د زیاتېدو او په روغتون کې د امکاناتو د کموالي له کبله استعفی وکړه.

مسعود میرزايي چې ده هم استعفی کړې پرون ناوخته ازادۍ راډیو ته وویل، دوی په کرونا ویروس اخته کسانو ته کافي امکانات نه لري او په روغتون کې د مړینو شمېر هم زیات دی.

هغه زیاته کړه: "زموږ د استفعی یو دلیل د امکاناتو کموالی دی، په دې معنی چې د ناروغانو پایوازان د خپلو ناروغانو د مړینې پوښتنه له موږ کوي، هېڅ امکانات نه‌شته، هره شپه له ۸ تر ۱۰ پورې ناروغان مري، خو روغتیا ریاست یوازې د دوو ناروغانو مړینه اعلانوي."

دغو ډاکترانو ویلي، چې له درېیو میاشتو معاشونه هم نه‌دی ورکړل شوي.

خو په هرات کې د کرونا ویروس په وړاندې د مبارزې مسؤل زمری حَصین ازادۍ راډیو ته وویل، دوی د دغه روغتون د ستونزو د حل هڅه کوي.

ښاغلی حصین دا نه مني چې په کرونا ویروس د اخته کسانو د درملنې روغتون دې امکانات ونه لري.

په هرات کې په کرونا ویروس د اخته کسانو شمېر تر ۲۹۰۰ اوښتی او ۵۸ کسان په دې ویروس تر اوسه په دغه ولایت کې مړه شوي دي.

چارواکي: د تجهیزاتو د کموالي له کبله د کرونا ویروس ازمویلو بهیر پڅ روان دی

ارشیف

د افغانستان د روغتیا وزارت یو چارواکی وايي، د تجهیزاتو د کموالي له کبله، د کرونا ویروس د نمونو ازمویلو بهیر پڅ روان دی.

د دغه وزارت یوه معین فدا محمد پیکان رویټرز خبري اژانس ته پرون وویل، دوی د ورځې د ۲۰زره نمونو له ډلې، له ۱۳۰۰ تر ۱۵۰۰ پورې نمونې ازمويلای شي.

ښاغلي پیکان ویلي، تر اوسه د اخیستل شویو نمونو دقیق شمېر معلوم نه‌دی.

د روغتیا وزارت دغه معین ویلي، ناازمویل شوې نمونې له مشخصو کوډونو سره په یخچالونو کې ساتل کېږي.

په افغانستان کې په کرونا ویروس د اخته کسانو شمېر تر ۱۶زرو او ۵۰۰ اوښتی دی.

له دې جملې تر ۲۷۰ زیات کسان په دغه ویروس مړه شوې او تر ۱۴۰۰ زیات کسان روغ شوي دي.

فراه کې ۱۵ ډاکتران په کرونا ویروس اخته شوي

ارشیف

د فراه ولایتي روغتون ۱۵ ډاکتران په کرونا ویروس اخته شوي دي.

د فراه د عامې روغتیا رئیس عبدالجبار شایق ازادي راډیو ته وویل: "له نېکه مرغه هغه ډاکتر صاحبان چې په کرونا اخته دي، جدي علایم نه‌لري. کورنۍ قرنطین مراعتوي او که خدای کول تر قرنطین وروسته به بېرته دوهمه معاینه ورکړل شي."

د فراه ولایت د عامې روغتیا رئیس له خلکو غوښتي چې د کرونا ناروغۍ څخه د ځان ژغورنې لپاره دې د ډاکترانو سپارښتنې په نظر کې ونیسي.

د فراه د روغتیايي چارواکو په وینا په دې ولایت کې په کرونا د اخته کسانو شمېر ۱۷۴ تنو ته رسېدلی چې ۱۸ تنه‌یې رغېدلي او یو تن وفات شوی دی.

کندز کې ماین چاودنې ۷ کارګران وژلي او ۶ ټپیان دي

د کندز نقشه

د کندز په خان‌اباد ولسوالۍ کې د یو ماین چاودنې اووه کارګران وژلي او شپږ نور یې ټپیان کړي دي.

د کندز د والي ویاند عصمت‌الله مرادي نن سې شنبه ازادي راډیو ته وویل، دا مرګ‌ژوبله هغه مهال اوښتې چې تېره ورځ ماښام د خان‌اباد ولسوالۍ د جنګل باشي سیمه کې د کارګرو پر یو زرنج موټر د طالبانو له‌خوا خښ شوی ماین وچاودېده.

نوموړي زیاته کړه، د ۴ تنو ټپیانو روغتیايي وضعیت ښه نه‌وي او د درملنې لپاره د کندز حوزوي روغتون ته انتقال شوي دي.

هغه زیاته کړه چې د خان‌اباد د جنګل باشي سیمه د وسله‌والو طالبانو کنټرول کې ده او طالبانو د خان‌اباد ښار ته پر غځېدلو فرعي سړکونو ماینونه خښ کړي.

په مړو او ټپیانو کې هغه مزدورکاران شامل دي چې کلیو او بانډو ته په کروندو کې د کار او مزودرۍ لپاره روان و.

طالبانو په دې اړه تبصره نه‌ده کړې. دا وسله‌واله ډله ډېر کله د هغو چاودنو مسؤلیت پر غاړه نه‌اخلي چې په‌کې ولسي خلکو ته مرګ‌ژوبله اوړي.

فراه کې به روان کال د هندواڼو حاصلات څه باندې ۶۸۹ زره ټنو ته ورسېږي

ارشیف

روان کال به په فراه ولایت کې د هندواڼو حاصلات څه باندې ۶۸۹ زره ټنو ته ورسېږي.

د دغه ولایت د کرنې رئیس عبدالمنان متین ازادي راډيو ته وویل، وړاندوینه دا ده چې روان لمریز کال به د فراه ولایت د هندواڼو حاصلات ۶۸۹ زره ۴۰۰ مټریک ټنو ته ورسېږي.

د نوموړي په وینا اوس‌مهال په دغه ولایت کې په ۱۹ زره ۱۵۰ هکټاره ځمکه کې هندواڼې کرل شوي.

تېر کال هم په همدې ولایت کې ۱۸ زره ۴۰ هکټاره ځمکه کې هندواڼې کرل شوې وې چې ۶۵۰ زره ۲۶۸ مټریک ټنه هندواڼې یې کړې وې.

د ښاغلي متین په خبره د تېر کال په پرته روان کال د فراه کرنیز محصولات په سلو کې ۶ سلنه زیات شوي.

د متین په وینا سږ کال د هنډوانو د ضایع کېدو د مخنیوي او پلور لپاره‌یې ځانګړي تدابیر نیول شوي.

د یادولو ده چې تېر کال په فراه ولایت کې د ستونزو له امله د دغه ولایت هندواڼې خرابې شوې وې.

د اقتصاد عالي شورا د غالیو د صادراتو لپاره ۶ سلنه سبسایډي ورکوي

ارشیف

د افغانستان د اقتصاد عالي شورا د هوايي دهلېزونو له لارې د غالیو د صادراتو لپاره شپږ سلنه سبسایډي په پام کې نیولې ده.

د افغانستان د پانګې اچونې او سوداګرۍ خونې د عامه اړیکو مرستیال جان اقا نوید نن ازادي راډیو ته وویل چې دغه اقدام د وطني غالیو د صادراتو د زیاتوالي او د ګاونډیو هېوادونو له لارې د غالیو د قاچاق د مخنیوي په هدف ترسره شوی.

ښاغلی نوید زیاتوي دغه کار افغان سوداګر هڅوي چې با کیفیته غالۍ تولید او صادرې کړي، د افغاني غالیو سکټور چې د کیفیت له امله په ګرده نړۍ کې لومړی و او دا مهال له ستونزو سره مخ دی یو ځل بیا په نړۍ کې پخوانی بازار او شهرت خپل کړی.

د جان اقا نوید په خبره تېر کال د هوايي دهلېزونو له لارې افغاني غالۍ صادرېږي، خو د کرونا ویروس د خپراوي د مخنیوي په هدف دغه صادرات درول شوي دي.

ویل کېږي چې افغاني غالۍ تر ډېره اسټرالیا، جرمني، انګلستان او امریکا ته صادرېږي.

دا په داسې حال کې ده چې اوس‌مهال زرګونه متره افغاني غالۍ ګاونډیو هېوادونو په ځانګړې توګه پاکستان ته وړل کېږي او په هغه هېواد کې له پروسس وروسته په پاکستاني نوم او نښان نورو هېوادونو ته صادرېږي.

تخار کې د وسلو او مهماتو دوه قاچاقبران نیول شوي

د تخار ولایت نقشه

د تخار امنیه قوماندانۍ د وسلو او مهماتو د دوو قاچاقبرانو د نیولو خبر ورکوي.

د تخار امنیه قوماندان سمونوال سید معراج‌الدین سادات نن رسنیو ته وویل، د جنايي جرایمو پر ضد د مبارزې پولیسو د تالقان ښار په تنګي فرخار سیمه کې دوه کسان چې د وسلو او مهماتو د لویو قاچاقبرانو له ډلې دي، نیولي دي.

ښاغلی سادات وايي دا قاچاقبران چې د تخار ولایت د چایاب (چاه آب) ولسوالۍ اوسېدونکي دي په داسې حال کې ونیول شول چې یوه اندازه وسلې او مهمات‌یې په یوه تونس موټر کې چایاب ولسوالۍ ته وړل.

د تخار امنیه قوماندان وايي چې له تورنو کسانو څخه تحقیقات روان دي.

اشرف غني له پومپیو سره د افغانستان د سولې په اړه خبرې وکړې

د افغانستان ولسمشر محمد اشرف غني او د امریکا د بهرنیو چارو وزیر مایک پومپیو

ولسمشر محمد اشرف غني د امریکا د بهرنیو چارو له وزیر مایک پومپیو سره د وېډیو کنفرانس له لارې د افغانستان د سولې د بهیر په اړه خبرې وکړې.

د امریکا د بهرنیو چارو وزیر مایک پومپیو وویل: "د امریکا اساسي هدف د اوږدمهاله او ستراتېژيکو اړیکو د دوام په چوکاټ کې یو موټي، خپلواک، ډموکراتيک او باثباته افغانستان دی او دې هدف ته د رسېدو لپاره به‌يې هېواد له افغان حکومت سره یو ځای کار وکړي."

په همدې حال کې د افغانستان د سولې لپاره د امریکا ځانګړي استازي زلمي خلیل‌زاد د دوشنبې په ورځ د انټرنټ له لارې خبریالانو ته وویل چې د افغانستان د سولې په برخه کې پرمختګ شوی دی او امریکا د افغان حکومت او طالبانو ترمنځ د بندیانو د خلاصون په برخه کې مرسته کوي.

ده هیله څرګنده کړه چې د تاوتریخوالي کچه به ټيټه پاته شي چې بین‌الافغاني خبرې پيل شي.

د امریکا او طالبانو ترمنځ د موافقې له مخې ټاکل شوې وه د مارچ تر ۱۰مې پورې طالبان د افغان حکومت زر بندیان او افغان حکومت د طالبانو پنځه زره بندیان راخوشې کړي چې بین‌الافغاني خبرې پیل شي، خو د بندیانو د مبادلې بهیر تر اوسه نه‌دی بشپړ شوی.

د ژغورنې نړیواله کمېټه: افغانستان له یو بشري ناورین سره مخ دی

ارشیف

د ژغورنې نړیواله کمېټه وايي، افغانستان له بشري ناورین سره مخامخ دی چې د کرونا ویروس پېښې پرته له تشخیصه مخ پر زياتېدو دي.

د دې کمېټې د اعلاميې له مخې چې د دوشنبې په ورځ خپره شوه، په افغانستان کې په مې میاشت کې د کرونا ویروس پېښې ۶۸۴ فیصده زیاتې شوې او ډېرې نورې پېښې بې‌تشخیصه پاته دي.

دا په داسې حال کې ده چې د افغانستان عامې روغتیا وزارت ویلي چې هر ورځ یوازې د دوه زره کسانو د معایناتو ظرفیت لري، خو له ۱۰ زرو څخه تر ۲۰ زرو پورې سمپلونه ورته ورځي.

د ژغورنې نړیوالې کمېټې په راپور کې راغلي چې دا په دې معنی ده چې ۸۰ او ۹۰ فیصده احتمالي پېښې پرته له تشخصیه پاته کېږي.

دې کمېټې ویلي چې په افغانستان کې د جګړې ترڅنګ د کرونا ویروس له کبله ۱۱ میلیونه کسان د خوړو له کمښت سره مخامخ دي.

د ژغورنې نړیوالې کمېټې له نړیوالو هېوادونو غوښتي چې په افغانستان کې دې له مرستندویه ادارو سره په دې برخه کې مالي مرسته وکړي چې د خلکو ژوند وژغورل شي.

اتمر د اذربایجان له بهرنیو چارو وزیر سره د سولې په اړه خبرې وکړې

د افغانستان د بهرنیو چارو سرپرست وزیر محمد حنیف اتمر

د افغانستان او اذربایجان د بهرنیو چارو وزیرانو د افغانستان د سولې پر پروسه خبرې وکړې.

د اذربایجان تریند خبري اژانس نن د دغه هېواد د بهرنیو چارو وزارت په حواله خبر ورکړی چې محمد حنیف اتمر او ایلمار محمدیاروف په وېډیو کنفرانس کې بحث وکړ.

د خبر له مخې د اذربایجان د بهرنیو چارو وزیر د افغانستان د سولې په پروسه کې له خپله اړخه د همکارۍ ژمنه کړې ده.

د کوچني اختر په درېیو ورځو کې نافذ شوي اوربند د افغانستان د سولې پروسې چټکتیا ته هیلې زیاتې کړې دي.

د حکومت او طالبانو ترمنځ د بندیانو تبادله هم زیاته شوې چې دواړو لورو د یو بل په لسګونه بندیان خوشې کړي دي.

په پام کې ده حکومت د طالبانو ۵،۰۰۰ او طالبان د حکومت ۱،۰۰۰ تنه بندیان خوشې کړي.

د بندیانو تبادله د بین‌الافغاني مذاکرو د پیل لپاره اساسي شرط ګڼل کېږي.

چارواکي: ننګرهار کې د دولت ۱۶ مخالف وسله‌وال وژل شوي

ارشیف

د ننګرهار چارواکي وايي په حصارک ولسوالۍ کې د دولت ۱۶ مخالف وسله‌وال وژل شوي دي.

ویل شوي، دغه وسله‌وال وروسته له هغې ووژل شول چې اول‌یې تېره شپه د امنیتي ځواکونو پر پوستو ډله‌ییز بریدونه پیل کړل چې وروسته وسله‌واله نښته وشوه.

د والي ویاند عطاالله خوګیاڼي نن رسنیو ته وویل چې په دې نښته کې سیمه‌ییزو پولیسو ته هم مرګ‌ژوبله اوښتې ده.

هغه وویل: "متأسفانه د دوی په ډله‌ییزو بریدونو کې ۳ سیمه‌ییز پولیس شهیدان شوي او یو بل ټپي شوی دی. د دغو ترورېستي بریدونو په ځواب کې امنیتي ځواکونو ۱۶ مخالف وسله‌وال وژلي او ۹ تنه نور یې ټپیان کړي چې په وژل شویو کې د عباس او ادریس په نوم د دوی دوه سرګروپان هم شامل دي."

د والي ویاند وایي تر پېښې وروسته سیمې ته تازه دمه امنیتي ځواکونه لېږل شوي دي.

د دولت کومې مخالفې ډلې د دې پېښې په اړه څه نه‌دي ویلي.

نور راوښيه

XS
SM
MD
LG