د لاسرسۍ وړ لېنکونه

تازه خبر
یکشنبه ۳۰ غبرګولی ۱۴۰۰ کابل ۰۲:۳۰

افغانستان

د هرات امنیتي ځواکونو وسلې او مهمات نیولي دي

د هرات ولايت امنيتي چارواكي وايي، چې په ګذرې ولسوالۍ كې يې يو شمېر وسلې او مهمات ترلاسه كړي.

د هرات د امنيې قومندانۍ د امنيت امر دلاور شاه دلاور ازادۍ راډيو ته وويل، چې په دغو وسلو كې څلور ميله ماشندارې، څلور ماينونه او يو د ځان وژونکي واسكټ شامل دي.

ده وړاندې وويل، چې اوس دغه ولسوالۍ په بشپړه توګه له طالبانو څخه پاكه شوې او دوی خلكو ته د ژوند د اسانتياوو په برابرولو باندې بوخت دي.

د ورځې تازه خبرونه دلته ولولئ

۲۰۵ اتل قول اردو: ارزګان کې ۴۳ طالبان وژل شوي

ارزګان کې امنیتي ځواکونه

۲۰۵ اتل قول اردو په ارزګان ولایت کې د ۴۳ وسله والو طالبانو د وژل کېدو او ۲۸ نورو د ټپي کېدو ادعا وکړه.

د دغې قول اردو، مرستیال ویاند صادق عیسی، نن یکشنبه (د غبرګولي ۳۰مه) سهار رسنیو ته وویل، دغه عملیات پرون شوي: "د افغان هوايي ځواکونو په ملاتړ، د ارزګان ولایت په چوره او خاص ارزګان ولسوالیو کې تصفیوي، کومانډويي او هوايي عملیات شوي دي. په دغو عملیاتو کې ۴۳ وسله وال ترهګر ووژل شوي او ۲۸ نور ټپیان شول."

۲۰۵ اتل قول اردو په بله اعلامیه کې پرون د کندهار په میوند او شاه ولیکوټ ولسوالیو کې هم د ۱۱ طالبانو د وژلو او ۷ نورو د ټپي کولو ادعا کړې ده.

بل خوا د ننګرهار مطبوعاتي دفتر بیا په شېرزادو او حصارک ولسوالیو کې د ۲۱ وسله والو طالبانو د وژلو او ۸ نورو د ټپي کېدو خبر ورکړی دی.

دغه دفتر نن په یوه اعلامیه کې ویلي، دغه شمېر وسلهوالو ته په تېرو ۲۴ ساعتونو کې د امنیتي ځواکونو په ځوابیه بریدونو کې مرګ ژوبله اوښتې ده.

پر دغو پېښو د وسله والو طالبانو ویاندویانو تبصره نه ده کړې.

چارواکي: نه پرېږدو چې د افغان خاورې ځینې برخې له وسله والو سره وي

افغان امنیتي ځواکونه د عملیاتو پر مهال

د افغانستان د کورنیو چارو وزارت وايي، امنیتي ځواکونه نه پرېږدي چې د افغانستان د خاورې ځینې برخې تل د وسله والو په کنټرول کې پاتې شي.

د دغه وزارت ویاند طارق ارین نن یکشنبه (د غبرګولي ۳۰مه) وویل، د هغو ولسوالیو د بېرته نیولو لپاره پلانونه سنجول شوي چې د طالبانو له خوا یې د نیولو ادعا شوې ده: "زموږ امنیتي ځواکونه په تودو سنګرونو کې دي، اجازه نه ورکوي چې د هېواد د جغرافیا ځینې برخې په دایمي ډول له سقوط سره مخامخ شي. هغه ولسوالۍ چې طالبان ادعا کوي د دوی په لاس کې دي، د هغوی د بېرته نیولو او د طالبانو د ځپلو پلان او تدابیر ورته لرو."

دا څرګندونې داسې وخت کېږي چې د بلخ یوې باورې سرچینې د موضوع د حساسیت له کبله د نوم نه ښوولو په شرط نن ازادي راډیو ته وویل چې چهاربولک ولسوالي نن سهار لس نیمې بجې د وسله والو طالبانو له خوا ونیول شوه.

د طالبانو ویاند، ذبیح الله مجاهد هم د دې ولسوالۍ د نیولو ادعا کړې ده.

بل خوا د لوګر امنیې قوماندانۍ ازادي ته ویلي، امنیتي ځواکونو د ملکیانو د مرګ ژوبلې د مخنیوي لپاره د خروار ولسوالۍ له مرکزه خپلې پوستې بل ځای ته انتقال کړي دي.

لوګر چارواکي وايي خروار ولسوالۍ کې یې د خپلو پوستو ځای بدل کړی

د افغانستان په نقشه کې د لوګر ولایت

د لوګر ځایي چارواکي وایي، د افغان ځواکونو د تلفاتو د مخنیوي په هدف یې په خروار ولسوالۍ کې خپلې پوستې تغیر کړي دي.

د لوګر د امنیه قوماندانۍ ویاند ګل حیدر احمدي ازادي راډیو ته وویل چې د دې ولایت خروار ولسوالۍ سقوط نه دی کړی او یوازې د افغان ځواکونو د تلفاتو د مخنیوي په هدف، امینتي پوستې، نوېو ځایونو ته انتقال شوي دي.

د لوګر د ولایت مقام ویاند دیدار لونګ وایي، د خروار ولسوالۍ درې کاله وړاندې، د لوګر مرکز ته انتقال شوې وه او یوازې د خواجه انګور په سیمه کې څلور امنیتي بېزونه ځاى پر ځاى و چې نن یاد ګډ بېزونه هم انتقال شوي او په نویو ځایونو کې ځای پرځای شوي دي.

د وسله والو طالبانو ویاند ذبیح الله مجاهد وایي، تېره شپه یې د لوګر ولایت د خروار ولسوالۍ نقلي مرکز چې د خواجه انګور او پنج پای سیمو تر منځ په یوه قرارګاه کې جوړ و، له شااوخوا امنیتي پوستو سره نیولی دی.

دایکنډي کې د لبنیاتو د پروسس یو لوی مرکز جوړیږي

ارشیف، عکس تئزیني بڼه لري

په دایکنډي کې د نږدې شپږ میلیونه افغانیو په ارزښت د لبنیاتو د پروسس یو لوی مرکز جوړیږي.

د کرنې او مالدارۍ وزارت ویاند اکبر رستمي نن یکشنبه (د غبرګولي ۳۰مه) ازادي راډیو ته وویل چې د لبنیاتو د پروسس یاد مرکز د دایکنډي په خدیر ولسوالۍ کې جوړیږي: "دغه مرکز د لبنیاتو د پروسس د زیاتوالي په هدف جوړیږي چې د افغان حکومت له بودجې به نږدې شپږ میلیونه افغانۍ پرې ولګول شي."

نوموړي وویل چې د لبنیاتو د پروسس په یاد مرکز له ۵ میلیونو افغانيو ډېر لګښت راځي چې په درېیو میاشتو کې به بشپړ او ګټې اخېستنې ته چمتو شي.

د کرنې او مالدارۍ وزارت وایي، افغانستان کې د لبنیاتو د پروسس لپاره خورا ښه طرفیت لري او دایکنډي له هغو ولایتونو یادوي چې ډېری وګړي یې له دې لارې کورنی اقتصاد پرمخ بیایي.

ښاغلی رستمي وایي، دوی په راتلونکي کې پلان لري چې د لبنیاتو د پروسس ورته نور مرکزونه په نورو ولایتونو کې هم پرانیزي.

مالیې وزارت: ملي بودجې ته به د ۱۰۱ میلیونه یورو مرسته ور زیاته شي

د ماليي وزارت

ټاکل شوې چې د روانې مېلادي میاشتې په وروستیو کې د افغانستان ملي بودجې ته د ۱۰۱ میلیونه یورو په شااوخواکې مرسته ور زیاته شي.

د مالېې وزارت ویاند رفیع تابع نن یکشنبه (د غبرګولي ۳۰مه) ازادي راډیو ته وویل چې دغه مرسته د جنیوا کنفرانس د ژمنو پر بنسټ ترسره کېږي.

نوموړي وویل چې په دې اړه د مالیې وزارت د همغږۍ، څارنې او راپور ورکونې عمومي رئیس په مشرۍ د مالیې وزارت، اروپایي ټولنې او پلي کوونکو دولتي ادارو د با صلاحیته استازو تر منځ نن یوه ناسته هم جوړه شوې وه.

ښاغلی تابع وايي، په یاده ناسته کې د حکومت او اروپایي ټولنې ترمنځ د قرارداد جوړونې په چوکاټ کې د ژمنه شوېو اصلاحاتو پلي کولو په برخه کې د دولت د پرمختګونو وروستی راپور تر غور لاندې نیول شوی او ټاکل شوې ده چې د دې راپور نقل د یوې اوونۍ په اوږدو کې په رسمي توګه د اروپایي ټولنې د سیاسي نمایندګۍ په مرسته ولېږل شي.

د افغانستان مشهور سندرغاړی عبدالله مقری د کرونا له امله مړ شو

د افغانستان مشهور سندرغاړی عبدالله مقری

د افغانستان مشهور سندرغاړی عبدالله مقری نن یکشنبه (د غبرګولي ۳۰مه) سهار د کابل په یوه روغتون کې ساه ورکړه.

د عبدالله مقري زوی میرخان د خپل پلار مړینه تایید کړه.

تر دې وړاندې تېره اوونۍ د مقري د مړینې اوازې خپرې شوې وې، خو وروسته د ده زوی او خپلوانو رد کړې.

مقري سلګونه سندرې او ملي ترانې ویلي او هنر یې ډېر مینه وال لري.

مقری په کورونا ویروس اخته و.

په وروستیو کې د کرونا له کبله په افغانستان کې د مړینو شمېر په بې ساري ډول زیات شوی دی.

قریشي: د افغانستان پر وړاندې د اسلام اباد پالیسي بدله شوې

د پاکستان د بهرنیو چارو وزیر شاه محمود قریشي

د پاکستان د بهرنیو چارو وزیر شاه محمود قریشي وایي، د خپل ګاونډي افغانستان پر وړاندې د اسلام اباد پالیسي بدله شوې او د راتلونکې داسې یوه نظام ملاتړ کوي چې د ټولو افغانانو لپاره د منلو وي.

ښاغلي قریشي دغه څرګندونې له طلوع نیوز سره په مرکه کې چې پرون شنبې(د غبرګولي ۲۹مه) خپره شوه، کړي او ویلې یې دي چې په افغانستان کې روغه جوړه، یو د بل په خوا کې ژوند کول او د ټولو افغانانو په منځ کې خبرې د سولې د خبرو د پرمخ بیولو یوازینې لاره ده.

د قریشي په خبره یوه امن او ثبات لرونکی افغانستان د پاکستان په ګټه ځکه دی چې موږ ته له سیمې سره د نښلولو امکانات برابروي: "یوه سوله ییز او باثباته افغانستان یوازې د افغانستان اړتیا نه بلکې پاکستان هم دا شی غواړي. موږ له دې ګټه اخلو."

قریشي دا رد کړه چې ګنې هېواد یې په خپله خاوره کې طالبانو ته ځای ورکړی او ویې ویل چې د دوی اکثره مشران په افغانستان کې دي.

هغه تور چې کابل تل پر اسلام اباد لګولی دی.

قریشي زیاته کړه، هڅه کوي چې د سولې په پروسه کې رغنده رول ولوبوي او له له طالبانو سره تماسونه د دې لپاره دي چې د سولې د خبرو لپاره اسانتیا رامنځ ته شي.

د پاکستان د بهرنیو چارو وزیر په افغانستان کې د تاوتریخوالي زیاتوالي ته په اشاره وویل، هېواد یې دې ته اندېښنه چې افغانستان بیا په کورنۍ جګړه کې ښکېل نه شي.

نوموړي همدارنګه هغه راپورونه چې وایي، له افغانستانه د امریکايي ځواکونو تر وتلو وروسته پاکستان لېوالتیا ښکاره کړې چې په خپله خاوره کې امریکا ته اډې ورکړي چې له هغه ځایه عملیات مخ ته یوسي، رد کړل.

شهرزاد اکبر: د تأسیساتو د ورانولو دوام د افغانستان د ورانولو دوام دی

د افغانستان د بشري حقونو د خپلواک کمېسیون مشره شهرزاد اکبر

د افغانستان د بشري حقونو د خپلواک کمېسیون مشره په افغانستان کې د تاوتریخوالي او ټولګټو تأسیساتو د ورانولو دوام، د یوه هېواد د ورانولو لپاره جګړه وبلله.

شهرزاد اکبر پرون شنبه (د غبرګولي ۲۹مه) په یوه ټویټ کې وویل چې د طالبانو له خوا د ټولګټو تاسیساتو د ورانولو، پر اسیرانو ډزې او د ولسوالیو اقتصادي محاصره هغه اعمال دي چې په ښکاره له دیني اساساستو او نړیوالو بشر دوستانه حقوقو سره په ټکر کې دي.

د اغلې اکبر په وینا د دغو اعمالو دوام په افغانستان کې د انساني منابعو او د تاسیساټو د بشپړ ورانولو ښکارندویي کوي.

په دې وروستیو کې په ټولنیزو رسنیو کې یوه ویډیو خپره شوه چې ښیي وسله وال د فراه د اناردرې ولسوالۍ ودانۍ ورانوي.

طالبانو د دغې ویډیو په اړه رسنیو ته څه نه دي ویلي، خو په تېر کې یې ویلي و چې ټولګټې تاسیسات نه ورانوي.

د کابل لویدیځې برخې لپاره امنیتي طرحه تایید شوه

د کابل لویدیځه څنډه

د کابل ښار د لویدیځې برخې لپاره امنیتي طرحه تایید شوه.

د افغان ولسمشر د دوهم مرستیال سرور دانش د مطبوعاتي دفتر مشر محمد سادات پرون شنبه(د غبرګولي ۲۹مه) ازادي راډیو ته وویل: "په امنیتي ځانګړې غونډه کې پر هغې امنیتي طرحې چې د ولسمشر په سپارښتنه د سیدالشهدا پر ښوونځي تر برید وروسته د ولسمشر د دوهم مرستیال له خوا جوړه شوې وه، بحث وشو او هغه تایید شوه. امنیتي ادارو ته هدایت ورکول شوی چې د دې طرحې بېلابېل اړخونه تطبیق او عملي کړي."

د ښاغلي سادات په خبره دغه طرحه به د افغان امنیتي ادارو د وړتیا پر اساس عملي کېږي.

د کابل لویدیځې برخې ته دغه امنیتي طرحه تر یو شمېر خونړیو بریدونو وروسته جوړیږي چې د ډېرو یې مسوولیت د اسلامي دولت ډلې یا داعش اخیستی. پ

ه دې سیمه کې تر ټولو خونړۍ حمله د ثور په اتلسمه پر سیدالشهدا ښوونځي وشوه چې د رسمي شمېرو له مخې له پنځوسو زیات کسان په کې ووژل شول او شااوخوا سل نور ټپیان شول.

هالنډ کې ځینې افغانان افغانستان کې د روانو وژنو پر خلاف لاریون کوي

د هالنډ ملي بیرغ

په هالنډ کې ځینې مېشت افغانان په پام کې لري چې نن یکشنبه(د غبرګولي ۳۰مه) په افغانستان کې د روانو وژنو پر خلاف لاریون وکړي.

د لاریون یوې تنظیموونکې سایرې نورزۍ ازادي راډیو ته وویل، د لاریون برخوال غواړي په دې اقدام سره نړیوالو ته یو پیغام ورکړي: "دوی غواړي د دغه روان حالت پر وړاندې خپل غږ اوچت کړي او نړیوالو ته دا وښيي چې په افغانستان کې روانه جګړه د افغانانو جګړه نه، بلکې د پردیو، سیمې او نړۍ جګړه ده. دا د اقتصاد جګړه ده."

لاریون به د پلازمېنې امسټردام په مرکزي میدان کې کېږي چې له نورو اروپايي هېوادونو هم افغانان ورته ورځي.

مېرمن نورزۍ وايي، دوی غواړي نړیوال متوجه کړي چې په افغانستان کې روانه جګړه بندېدو ته اړتیا لري.

د لاریون په پای کې به پرېکړه لیک هم خپرېږي چې د هالنډ پارلمان او د بشري حقونو نورو نړیوالو بنسټونو ته هم لېږل کېږي.

له افغانستانه د بهرنیو ځواکونو د وتلو د بهیر له پیل سره جوخت ناامني زیاته شوې چې ملکیانو ته هم مرګ ژوبله اوړي.

پکتیا والي: د خلکو د خوندیتوب لپاره له مېرزاکې ولسوالۍ شاتګ شوی

د پکتیا والي محمد حلیم فدایي

د پکتیا والي محمد حلیم فدایي د شنبې (د غبرګولي ۲۹مه) په ورځ د یوه خبري کنفرانس پر مهال رسنیو ته وویل چې د دې ولایت د مېرزاکې ولسوالۍ، له ودانۍ څخه یې د ملکي وګړو د خوندیتوب لپاره شاتګ کړی دی.

د دغې ولسوالۍ د نیولو لپاره وسله والو طالبانو له تېرو درېیو اوونیو راهیسې خپلو جګړو ته زور ورکړی و چې دواړو لورو ته د مرګ ژوبله له اوښتو سره مل وه.

د پکتیا مېرزاکې ولسوالۍ د دې ولایت د مرکز ګردېز ښار ختیځ لور ته پرته ده چې د پکتیا د ختیځو شپږو ولسوالیو لاره هم له دې ولسوالۍ تیریږي.

د ختیځو شپږو ولسوالیو اوسیدونکي وایي، د وسله والو طالبانو لاس ته د دې لویې لارې لوېدو؛ یو ځل بیا دوی له ګڼو ستونزو سره مخ کړي او د مرکز ګردېز په ګډون یې له نورو ولایتونو سره اړیکې پرې شوي دي.

د پکتیا والي وایي، د ټولو هغو لارو او سیمو د خلاصون لپاره د عملیاتو د ترسره کولو پلان لري چې دا مهال د وسله والو طالبانو له خوا نیول شوي او یا هم محاصره دي.

د وسله والو طالبانو ویاند ذبیح الله مجاهد رسنیو ته ویلي چې تېره شپه یې یاده ولسوالۍ نیولې او په ولسوالۍ کې موجود یو شمېر وسایط او وسله د دوی لاس ته ورغلې ده.

افغانستان: د روان کال لومړیو ۳ میاشتو کې ۱۸۴۰۰ کورنۍبې ځایه شوي

ارشیف، یو شمېر بې ځایه شوي افغان کډوال

د افغانستان د کډوالو او راستنېدونکو چارو وزارت وايي، د روان لمریز کال په لومړیو درېیو میاشتو کې ۱۸۴۰۰ کورنۍ له خپلو مېنو بې ځایه شوي دي.

د دغه وزارت یوه ویاند عبدالباسط انصاري نن شنبه (د غبرګولي ۲۹مه) ازادي راډیو ته وویل، دغه شمېر کورنۍ شااو خوا ۱۲۸۸۰۰ کسان کېږي: "سږکال ۱۸۴۰۰ کورنۍ بې ځایه شوي دي. که پر ۷ ضرب کړو، شمېر یې ۱۲۸۰۰ کسان کېږي. دوی د جګړو او ناامنیو له کبله په بېلابېلو ولایتونو لکه کندهار، هلمند، فراه، کندز، لغمان، بغلان او ځینو نورو ولایتونو کې بې ځایه شوي دي."

د کډوالو او راستنېدونکو چارو وزارت د ډېرو کورنیو د بې ځایه کېدو علت په افغانستان کې د ناامنیو زیاتېدل ګڼي.

دغه وزارت وايي، تېر لمریز کال په افغانستان کې ۹۲،۰۰۰ کورنۍ د جګړو او نورو ستونزو له کبله بې ځایه شوې وې.

ستر جنرال بسم الله محمدي د افغانستان د دفاع وزارت سرپرست شو

ستر جنرال بسم الله محمدي

د افغانستان د چارو اداره وايي ستر جنرال بسم الله محمدي د اسد الله خالد پرځای، د افغانستان د دفاع وزارت د سرپرست په توګه وګمارل شو.

د چارو ادارې په یوه اعلامیه کې ویلي، د کندز والي عبدالستار میرزکوال، د حیات الله حیات پرځای، د کورنیو چارو وزارت د سرپرست او ښاغلی حیات د کلیو پراختیا وزارت د سرپرست په توګه ګمارل شوی دی.

دا لا نه ده معلومه چې دغه سرپرست وزیران به د باور رایې اخېستو لپاره کله ولسي جرګې ته معرفي کېږي؟

بل خوا ملي راډیو ټلویزیون راپور ورکړی چې ډګر جنرال ولي محمد احمدزی د محمد یاسین ضیا پرځای د لوی درستیز په توګه ټاکل شوی دی.

دا تازه ګمارنې داسې وخت کېږي چې د افغانستان په بېلابېلو برخو کې د جګړو شدت زیات شوی دی.

غور چارواکي: په لعل او سرجنګل ولسوالۍ کې ۲ ولسي پاڅونوال وژل شوي

د افغانستان په نقشه کې د غور ولایت

د غور ولایت د لعل او سرجنګل ولسوالۍ سرپرست وايي، د دې ولسوالۍ پر ځینو برخو د وسله والو طالبانو په حمله کې دوه ولسي پاڅونوال وژل شوي دي.

علي فایق ازادي راډیو ته وویل، دغه حمله چې پرون جمعه(د غبرګولي ۲۸مه) ماسپښین پیل شوې وه، تر شپې روانه وه او په نتیجه کې یې بل پاڅونوال ټپي شوی دی.

بل خوا د پروان امنیه قومانداني وايي، په شینواري او سیاه ګرد ولسوالیو کې تېره شپه پر څو پوستو د وسله والو طالبانو په حمله کې دوه پوځیان وژل شوي دي.

د پروان امنیه قوماندان عبدالرؤوف ارزګاني ازادۍ راډیو ته وویل، وسله والو طالبانو ته هم مرګ ژوبله اوښتې، خو ده یې دقیق شمېر په ډاګه نه کړ.

په وروستیو ورځو کې وسله والو طالبانو د شینواري ولسوالۍ پر دره نمک اب سیمه ولکه ټینګه کړې ده.

همداراز د کونړ امنیه قوماندان وايي، په شلتن او غازي اباد ولسوالیو کې تېره شپه د وسله والو طالبانو ډله ییز بریدونه په شا تمبول شوي چې په نتیجه کې یې ۷ وسله والو طالبانو ته مرګ ژوبله اوښتې ده.

سمونوال محمد یوسف مظلومیار د افغان امنیتي ځواکونو د مرګ ژوبلې په اړه څه ونه ویل.

هلمند چارواکي: د افغان ځواکونو په عملیاتو کې ۵۹ طالبان وژل شوي

هلمند کې د افغان امنیتي ځواکونو ځانګړي عملیات

د هلمند د امنیې قوماندانۍ مطبوعاتي دفتر ادعا کوي، په ګرشک ولسوالۍ کې د افغان امنیتي ځواکونو په تصفیوي عملیاتو کې ۵۹ وسله وال طالبان وژل شوي او ۲۷ تنه نور ټپیان شوي دي.

په دې اعلامیه کې چې نن شنبه (د غبرګولي ۲۹مه) خپره شوې راغلي چې په دغو عملیاتو کې ځینې وسایط او مهمات هم تخریب شوي دي.

هاخوا د ننګرهار ولایت مطبوعاتي وايي، په هسکه مېنه او خوګیاڼو ولسوالیو کې په تېرو ۲۴ ساعتونو کې د ۲ پاکستاني اتباعو په ګډون ۱۵ وسله وال وژل شوي او ۹ نور ټپیان شوي دي.

په اعلامیه کې چې نن خپره شوې ویل شوي چې ملکیانو او امنیتي ځواکونو ته زیان نه دی اوښتی.

نور راوښيه

XS
SM
MD
LG