دپاکستان څخه دښاغلي کرزي ددوه ورځنۍ ليدنه په پيل کي دواړه مشرانو پرون په اسلام کي غونډه وکړه ٠
پرويز مشرف وويل چي دواړه هيوادونه دتروريزم او ترهه گرۍ په وړاندي جگړه کي يوشان اهداف لري ٠

ښاغلي کرزي داسي څرگنده کړه چه _دافغانستان او پاکستان ترمينځ گډو پولو په سيمه کي کړکيچ دومره مهم نه دۍ لکه څرنگه چي بريښي او وي ويل چي ده ته ټينگار شوۍ چي پاکستان دهغو افراطيانو ملاتړ نه کوي چي ويل کيږي له پولي پوري غاړه ددغه هيواد له خاورو څخه په استفاده په افغانستان کي ميشته امريکايي قواوو او افغاني ځواکونو بريدونه کوي ٠
افغاني چارواکي وايي دطالبانو دنسکور شوي واک او دالقاعده تروريستي شبکي فراري جنگيالي په پاکستان کي له قبايلي سيمي څخه چي دقانون دحاکميت له پلوه کمزوري بريښي افغانستان ته رااوړي او بريدونه کوي ٠
دپاکستان جمهور رئيس سره له غونډي دمخه ښاغلي کرزي دهيواد صدراعظم ظفرالله خان جمالي سره ليدلي او په دي غونډه کي پاکستان ديته هڅولۍ چي دافغانستان او پاکستان ترمينځ دگډو پولو سيمي تړل نور هم ټينگ کړي ٠

دمتحده ايالاتو چين او شمالي کوريا پلاوي نن په پيکنگ کي غونډي په ترځ کي دپيونگ يانگ داتومي پروگرامونو څخه رامينځ ته شوي کړکيچ دحل لوري ته هلي ځلي کوي ٠
دمتحده ايالاتو بهرنيو چارو وزارت ويلي دي چي دبهرنيو چارو مرستيال وزير جيمس کيلي چه په دغو خبرو کي دامريکايي پلاوي مشري په غاړه لري زيار کوي چه له شمالي کوريا نه داسي ژمني ترلاسه کړي چي خپل اتومي پروگرامونه به پريږدي ٠
دغه دري ورځنۍ خبري دپيکنگ په يوه سيمه کي چه نوم يي نه دۍ اخيستل شوۍ دتړل شويو دروازو ترشا ترسره کيږي ٠
پرون په جنوبي کوريا کي دامريکايي ميشته ځواکونو قوماندان وويل چي شمالي کوريا نړيوال امنيت او آرامي ته گواښ ، او په سيمه کي دسولي هلو ځلو مخي ته يو خڼډ ګڼل کيږي ٠
جنرال ليون له پورت وويل : شمالي کوريا چه داتومي وسلو شکمن پروگرامونه لري ، دتوغنديو تکنالوژي خپروي او دجنوبي کوريا سره دخپلو ګډو پولو په سيمه کي ځواکونه راغونډ کړي ،، په دي سره نړيوال امنيت او آرامي ته ګواښيږي ٠

په عراق کي له جگړي وروسته __دهيواد دچارو داداري امريکايي مشر ،، متقاعد جنرال جي گارنر دهيواد دبيلابيلو سيمو څخه ليدنو په ترځ کي پرون دهيواد په شمال کي له کردي مشرانو سره وليدل ٠
جنرال گارنر دکردستان دملي يووالي گوند له مشر جلال طالباني او دکردستان ددموکراتيک گوند له مشر مسعود بارزاني سره غونډي کړي دي ٠
جنرال گارنر د دغو خبرو په پاي کي وويل چه متحده ايالات غواړي دکردانو ددغو دواړو ډلو په شمول په عراق کي دديني ، توکمي او قبايلي گوندونو له خوا يو متحد حکومت رامينځ ته شي ٠

داپه داسي حال کي چه امريکايي ځواکونو ددي خبري ټينگار کړۍ دۍ چي ايتلافي ځواکونو په بغداد کي څه دپاسه شپږ سوه مليون ډالر نقدي پيسي ميندلي دي ٠

امريکايي جنرال ونسان بروکس پرون وويل پوليس او چارواکي ددي کتنه کوي چه دغه روپۍ جعلي نه وي ٠

ده وويل چي عسکرو دغه پيسي چه ديو ديوال شاته پټي شوي وي ميندلي دي ٠

جنرال ونسان بروکس وايي :
دغلا دمخنيوي لپاره دعملياتو په ترځ کي ، دامريکايي ځواکونو ددريمي پلي فرقي
عسکرو يوه زياته اندازه پيسي ميندلي دي چه ديو ديوال ترشا پټي ايښودل شوي وي ٠
دغه سلگيز بانکنوټونه ، ښکاري چي څه دپاسه شپږ سوه مليون ډالر دي ٠

دغه راز پرون په سلگونه زره شيعه مسلمانان دديني هغو مراسمو پرځاي کولو لپاره چي دصدام حسين دواک په مهال بنديز ورباندي لگول شوۍ وو دبغداد جنوب ته د کربلا مقدس ښار کي راغونډ شول ٠

په داسي مهال چي فرانسه په موقت ډول په عراق باندي د لگول شويو بنديزونودليري کولو وړانديز کوي _ متحده ايالات په دغه هيواد دوسلو دپلټني حق دځان بولي ٠

فرانسي وړانديز کړۍ دۍ چي په عراق باندي غيرپوځي بنديزونه دي په فوري توگه ځوړند اعلان کړاي شي او په هيواد کي دګڼي ويجاړي وسلو پلټني دي له سره تنظيم کړاي شي ٠
په ملگرو ملتونو کي دفرانسي سفير ژان مارک دوله سبليير پرون دملگرو ملتونو امنيت شوري له يو ي غونډ ي نه وروسته وويل چي ديته اړتيا ليدل کيږي چه په عراق نوۍ وضعيت په هکله واقعي او عملي ترتيبات رامينځ ته کړاي شي ٠
دۍ وايي :

ما دا نظر هم وړاندي کړۍ چي دداسي واقعي او عملي ترتيباتو لپاره ښايي کار وشي چه زمونږ په اند ددي لپاره لازمي بريښي ترڅو په عراق کي په ډگر کي دامريکايي ډلو او په هيواد کي دملگرو ملتونو له خوا دوسلو دپلټني نړيوال پلاوي هلي ځلي سره گډي کړي ،ددي لپاره چي دعراق څخه دوسلو ليري کول دنړي له خوا تاييد شوي وي ٠

دفرانسي سفيرويلي دي چي فرانسه دا وړانديز کوي چي امريکايي هغه ډلي چه په عراق کي دپلټني کار ترسر ه کوي خپلي هلي ځلي له ملگرو ملتونو سره په گډه و کړي ٠

بلي خواته په ملگرو ملتونو کي دامريکا سفير جان نيگروپونټ ويلي دي چي واشنگتن به پاريس سره گډي هلي ځلي وکړي چه څه ډول کيداي شي په عراق باندي لگول شوي بنديزونه ليري کړاي شي ٠
خو ده وويل چي د امريکاپه مشري ايتلاف اوس د عراق دبي وسلي کول په غاړه اخيستي او دملگرو ملتونو دونډي لپاره کومه اړتيانه ليدل کيږي ٠

د افغانستان کرکټ بورډ نن د نړیوال جام لپاره د راشد خان په مشرۍ لوبډله اعلان کړه.

په دې لوبډله کې عبداله احمدزی او اسحاق رحیمي هغه څیرې دي چې په ملي لوبډله کې ډير کله نه دې لوبیدلي.

ټاکل شوې ده چې د کرکټ د شل اورونو نړیوال جام د فبرروي په اوومه د هند او سریلانکا په کوربتوب پيل شي او یوه میاشت دوام وکړي.

په دې جام کې د نړۍ شل لوبډلې په څلورو ګروپونو کې لوبیږي، له افغانستان سره په ګروپ کې نیوزیلنډ، جنوبي افریقا، متحده عربي امارات او کاناډا یوځای شوې دي.

نړیوال جام ته د تیاریو په لړ کې به افغان لوبډله د جنوري له شلمې وروسته له ویسټ اینډیز لوبډلې سره د شل اورونو درې لوبې وکړي.

ترکیې د اسلامي دولت( داعش) د لسګونو مشکوکو کسانو د نیولو خبر ورکړ.

د ترکیې د کورنیو چارو وزیر علي یرلیکایا پر ایکسپاڼه لیکلي چې یوسل او پنځه ویشت داعشیان نن سهار په ترکیه کې نیول شوې دي.

د ترکیې د کورنیو چارو د وزیر په وینا دا کسان د ترکیې په پنځه ویشت ولایتونو کې د امنیتي ځواکونو د هممهاله عملیاتو په ترڅ کې توقیف شوې دي.

ترکیې اونۍ مخکې هم د داعش د یوسل او پنځلس کسانو د نیولو ادعا کړې وه او ویلي یې و چې دې کسانو غوښتل د کرسمس او نوي میلادي کال د مراسمو پرمهال په ترکیه کې بریدونه وکړي.

د فراه په سیلونو کې یوشمیر ایسار کسان ژغورل شوې دي.

په فراه کې د طالبانو چارواکو نن وویل چې د مرکز په قرغ زرد او دزدک سیمو کې یې شاوخوا دوسوه کسان ژغورلي او خوندي ځایونو ته لیږدولي دي.

د فراه په ولایت کې د سې شنبې په شپه د سیلونو له امله د یوه کس د مړینې، د څلورو نورو د ټپي کیدو او خلکو ته د مالي زیانونو د اوښتو خبرونه خپاره شوې وو.

د سیلونو له امله د فراه په لرې پرتو سیمو کې هم د سر او مال د زیان د اوښتو خبرونه خپاره شوې دي خو تر اوسه له رسنیو سره دقیقې شمیرې نه دې شریکې شوي.

د بریتانیا پولیس د یوه شل کلن افغان د نیولو خبر ورکوي او وایي چې د بریتانیا په شمال لویدیځ کې یې د (نیوټن لي ویلوز) په روغتون کې سې شنبې ناوخته د اورسپنې پر یوې الې پنځه کسان برسیرن ټپيان کړې دي.

پولیسو ویلي دي چې مشکوک کس روغتون ته له ډاکټر سره د لیدو لپاره تللی و خو کله چې یې غوښتنه رد شوه په قهر شو، یو میز یې مات کړ بیا پر خلکو حمله وکړه.

د طالبانو ویاند وایي، په دوه زره پنځه ویشتم کال کې د دوی د حکومت او نړیوالو اړیکي پراخ شوي دي.

ذبیح الله مجاهد نن د دوه زره پنځه ویشتم کال په وروستۍ ورځ په ایکسپاڼه کې لیکلي دي چې د دې کال په ترڅ کې روسیې د دوی حکومت په رسمیت وپیژانده او د دوی د کابینې غړیو د ریاست الوزرا د مرستیالانو په شمول نهه نوي بهرني سفرونه کړې دي چې د دیپلوماتیکو اړیکو د پراختیا سبب شوې دي.

د طالبانو حکومت په تیرو څه باندې څلورو کلونو کې چې کابل یې نیولی دی، له بهرنیو هیوادونو سره د اړیکو د ټینګیدو هڅې کړې دي، خو نړیوالو د دوی حکومت په رسمیت نه دی پیژندلی او پر دوی انتقاد کوي چې بشري حقونه، په ځانګړي ډول د نجونو او ښځو حقوق یې نه دې ورکړي. طالبان بیا دا خبره ردوي او ټینګار کوي چې د اسلامي شریعت په چوکاټ کې یې دا حقوق رعایت کړې دي.

په ایران کې لاریونونه له پلازمېنې تهران څخه نورو ښارونو ته غځیدلي دي. دا اعتراضونه د انفلاسیون او د پیسو د ارزښت د کمیدو له کبله له پلازمینې تهران څخه نورو ښارونو ته خپاره شوې دي.

اعتراضونه د یکشنبې په ورځ وروسته له هغه پيل شول چې د امریکایي ډالر پر وړاندې د ایراني ریال بیه تر بل هر وخت ټیټه شوه، نو همهغه و چې د تهران په لوی بازار کې دوکاندارانو اعتصاب وکړ.

د راپورونو له مخې له تهرانه پرته، په کرج، همدان، ملارد، قشم، کرمانشاه، شیراز، اصفهان او یزد کې هم مظاهرې شوې دي.

پولیسو په ځینو سیمو کې د لاریونوالو د خورولو لپاره له اوښکي بهوونکي ګازه کار اخیستی دی.

اوکرایني چارواکي وايي، "پر اودیسا ښار د روسیې په بریدونو کې د دریو ماشومان په ګډون څلور کسان ټپیان شوي دي".

ددغه ښار پوځي مشر نن چهارشنبې پر خپل تلګرام کې لیکلي، "د روسیې بې پیلوټه الوتکو زموږ کورونه، لوجستکي او د انرژي د تولید سیمې په نښه کړې دي".

دا بریدونه یوه ورځ وروسته له هغه دي چې د اوکرایین د ولسمشرۍ دفتر د روسیې د ولسمشر ولادیمیر پوتین پر استوګن ځاي د بې پیلوټه الوتکو بریدونه رد کړل او مسکو يې د غلطو معلوماتو په خپرولو تورن کړ.

کرملین پرون سه شنبې ادعا کړې وه چې،"بې پیلوټه الوتکو د نووګورود په سیمه کې چیرته چې د پوتین استوګن ځای دی برید کړې دی".

وړاندې راغلي و چې دا برید پر "پوتین برید دی" دی.

بل پلو، تمه ده د اوکرایین ولسمشر ولادیمیر زلنسکي د جنوري په شپږمه په فرانسه کې له خپلو لویدیزو متحداین سره له روسیې سره د سولې د خبرو اترو په اړه وګوري.

د امریکا ولسمشر ډونالډ ټرمپ د یکشنبې په ورځ ویلي و، اوکرایین او روسیه د بل هر وخت پرتله سولې ته نژدې شوي دي.

نن د بنګله دیش د پخوانۍ صدراعظمې خالدې ضیا د جنازې مراسم دي.

هغه چې د بنګله دیش لومړنۍ ښځینه صدراعظمه وه پرون سهار د ۸۰کلنۍ په عمر د ورپېښې ناروغۍ له کبله مړه شوه.

د محمد یونس په مشرۍ د بنګله دیش موقت حکومت په دې هېواد کې درې ورځې ملي ماتم اعلان کړی او تمه ده چې د خالدې ضیا د جنازې لمونځ د پارلمان د باندې وشي.

د هغه مړی به د بنګله دیش د پخواني ولسمشر او د هغې د خاوند ضیالرحمن ترڅنګ خاورو ته وسپارل شي.

موقت حکومت اعلان کړی چې په ټولو امنیتي پوستو کې به بیرغ نیمه ځوړند وي.

د خالدې ضیا د جنازې په مراسمو کې به د هند او پاکستان د بهرنیو چارو وزیران هم ګډون ولري.

اغلې ضیا چې درې ځلې د بنګله دیش د صدارعظمه په توګه ټاکل شوې وه، په ۲۰۱۸کال کې د شیخ حسینې په حکومت کې په مالي فساد تورنه او نورو هېوادونو ته له تګ څخه راوګرځول شوه.

د کډوالو نړیوال سازمان (IOM) وايي، د طبیعي پېښو له کبله له ۲۷زرو څخه زیاتو زیانمنو شویو کورنیو سره يې مرستې کړي دي.

دغه سازمان د سه شنبې په ورځ پر خپله ایکس پاڼه لیکلي، په مرستو شویو توکو کې نقدې پیسې، اضطراري سرپناه، غیرخوارکي توکې، اوبه او روغتیايي خدماتونه شامل دي.

ای او ایم وايي، له دغو زیانمن شویو څخه نژدې ۱۵زره کورنیو مالي مرستې او خیمې ترلاسه کړي دي.

د دغه سازمان په ټکو، افغانستان له طبیعي افتونه لکه زلزلې او سیلابونه سره مخ هېواد دی او اقلیمي بدلونو دغه ستونزه لا پسې ډیر کړې ده.

ای او ایم خبرداری ورکړی چې اقلیمي بدلون او په افغانستان طبیعي پېښې بشري مرستو ته د خلکو اړتیا لا پسې زیاتوي.

دغه سازمان له دې وړاندې ویلي چې د روان کال په لومړیو څلور میاشتو کې څه باندې ۳۰۰ زره افغانان د اقلیمي بدلون، وچکالۍ، داخلي کډوالۍ او له نورو هېوادونو څخه له اخراج سره مخ شوي چې عاجلو بشري مرستو ته اړمن دي.

په پاکستان کې د شخړو او امنیت څیړنیز مرکز وايي، په ۲۰۲۵کال کې په دې هېواد کې د وسله والو په بریدونو کې ۱۷سلنه زیاتوالی راغلی دی.

دغه مرکز په خپل کلني راپور کې چې د ډیسمبر په ۲۹مه خپور شوی ویلي چې د تیر کال پرتله په امنیتي بریدونو کې اوښتې مرګژوبله ۷۳سلنه لوړه شوې او له ۲۰۱۵کال راهیسې دا کال تر ټولو خونړی کال یاد شوی دی.

په راپور کې راغلي چې په ۲۰۲۵کال کې تر ټولو ډیر ځانمرګي بریدونه شوي او ډیر مرګژوبله يې ملکیانو ته اړولې ده.

د راپور له مخې، اکثره دغه امنیتي پېښې په خیبرپښتونخوا او بلوچستان کې شوي دي.

په راپور کې وړاندې راغلي چې سږکال په ټول پاکستان کې څه باندې زر امنیتي پېښې ثبت شوي، خو په ۲۰۲۴کال کې د ورته پېښو شمیر ۹۰۸ ته رسیده.

د راپور په ټکو، دغو امنیتي پېښو کې له ۳۳زرو ډیر کسان وژل شوي دي.