د ناټو مشران په واشنګټن کې د اوکراین د ملاتړ او د روسیې په وړاندې د قاطعیت د ښودلو لپاره راغونډ شوي دي.
په واشنګټن کې د ناټو درې ورځنۍ غونډه پرون د جولای ۹مه پیل شوه او ټاکل شوې د پنجشنبې تر ورځې پورې دوام وکړي.
دغه غونډه د ناټو د تاسیس د ۷۵مې کلیزې په مناسبت جوړه شوې ده.
د ناټو د غړو هېوادونو د مشرانو پیغام روښانه دی، د روسیې د یرغل پر مهال د اوکراین ملاتړ او د جګړې د پیلولو لپاره د مسکو غندنه.
د اوکراین ولسمشر ولودیمیر زیلینسکي چې پرون واشنګټن ته ورسېد، تمه لري د ناټو د غړو هېوادونو څخه د پیټریوټ توغندیو په ګډون د نورو هوایي دفاع مرستې ترلاسه کړي.
د امریکا د ملي امنیت شورا ویاند جان کربي ویلي، د ناټو مشران به د اوکراین د دفاعي توان پر دوام متحد ودرېږي.
د امریکا د بهرنیو چارو وزیر انټوني بلېنکن پرون په یوه خبري غونډه کې وویل چې له اوکراینه به ملاتړ ته دوام ورکړي.
د امریکا د بهرنیو چارو وزیر انټوني بلېنکن
هغه وویل: "د نړۍ په یوه کوچني کونج کې باید دا یقیني شي چې اوکراین نه یوازې نن ورځ له ځانه دفاع کولی شي، بلکې داسې موقف ته هم رسېدلی شي چې په پوځي، اقتصادي او دیموکراتیک لحاظ په خپلو پښو ودریږي، دا د اوکراین د بریا او د پوتین تر ټولو سرسخته ملامتیا نښه وي."
د امریکا متحدو ایالتونو پر اوکراین د روسیې د غیر موجه یرغل په ځواب کې له کییف سره په ملیاردونو ډالره پوځي مرسته کړې ده.
د ناټو د غړو هېوادونو د مشرانو درې ورځنۍ سرمشریزه په واشنګټن کې په داسې حال کې پیلېږي چې د متحدو ایالتونو ولسمشر جو بایډن د راپورونو له مخې د سیاسي بقا لپاره مبارزه کوي.
اوس له بایډن د دوهمې دورې لپاره له سیالۍ څخه د وتلو غوښتنې ډیرې شوي.
د متحدو ایالتونو ولسمشر جو بایډن
تېره میاشت د سیال ډونالډ ټرمپ سره د ټلویزیوني مناظرې وروسته ، بایډن د خپل ګوند دننه فشار سره مخ شو مګر د استعفا کولو څخه یې ډډه وکړه.
په عین حال کې، د فرانسې ولسمشر ایمانویل مکرون هڅه کوي چې له ناڅاپي ټاکنو وروسته حکومت جوړ کړي.
د مکرون معتدل ایتلاف له کیڼ اړخو وروسته دویم ځای لري چې د فرانسې ولسمشر یې له سختو انتخابونو سره مخ کړی.
د بریتانیا نوی صدراعظم کاییر سټارمر د لومړي ځل لپاره د ناټو په سرمشریزه کې ګډون کوي.
د هنګري پر صدراعظم ویکتور اوربان د روسیې له ولسمشر ولادیمیر پوتین سره په داسې حال کې د لیدنې له امله نیوکې شوي چې هېواد یې د ناټو غړی دی.
د ناټو د سرمنشي ینس سټولټنبرګ لپاره به دا وروستۍ سرمشریزه وي چې نوموړی پهکې د ناټو د مشر په توګه ګډون کوي.
د ناټو د سرمنشي ینس سټولټنبرګ
د سټولټنبرګ ماموریت چې په ۲۰۱۴م کې پیل او څلور ځله تمدید شوی، د روان کال د اکټوبر په لومړۍ نېټه پای ته رسېږي.