احمد ظاهر، هغه غږ چې پر موسیقۍ د طالبانو له محدودیت سره سره د کابل له تله اورېدل کېږي

په افغانستان کې چې موسیقي جرم ګڼل کېږي، د احمدظاهر مینه وال، د دغه نوموتي هنرمند له مړینې ۴۴ کاله وروسته، د هغه سندرې په پټه اوري. هغه د ۱۳۵۸ لمریزکال د غبرګولي په ۲۴ د پروان په سالنګ دره کې په یوه ترافیکي پېښه کې خپل ژوند له لاسه ورکړ. داسې ادعاوې شوي چې دا یوه ترافیکي پېښه نه بلکې د قتل دسیسه وه او د هغه وخت یو شمېر چارواکو په‌کې لاس درلود، خو په دې اړه تراوسه هېڅ یوه بې پرې او رسمي څېړنه نه‌ده ترسره شوې او د مړینې څرنګوالی یې تراوسه روښانه نه‌دی.