د افغانستان د کرېکټ ملي لوبډلې تېره شپه له متحده عربي اماراتو سره د درو شل اوره سیالیو لومړۍ مسابقه په ۵ ویکټونو او ۵ توپونو وګټله.
په دې مسابقه کې، چې د متحده عربي اماراتو د ابوظهبي په لوبغالي کې وشوه، لومړی د متحده عربي اماراتو لوبډلې بیټنګ وکړ.
اماراتي لوبغاړو په داسې حال کې چې ۵ لوبغاړي یې سوځېدلي وو، په شلو اورونو کې ۱۴۲ منډې وکړې چې ظاهراً د افغانستان په شان لوبډلې ته ټیټ هدف و.
راشدخان، چې دا یې د افغانستان د شل اوره لوبډلې د کیپتانۍ لومړنۍ مسابقه وه، دوه لوبغاړي وسوځول.
خو په بیټنګ کې د افغانستان لپاره تر ټولو ښه لوبه کریم جنت او افسر ځاځي وکړه.
کریم جنت په ۳۸ توپونو ۵۳ منډې وکړې او د مسابقې غوره او اغېزمن لوبغاړی وپېژندل شو.
د افغان کرېکټ او متحده عربي اماراتو لوبه
افسر ځاځي بیا په ۴۰ توپونو ۴۸ منډې وکړې.
خو د افغانستان توپ وهونکي په تېره بیا اوپینران د توقع خلاف ژر وسوځېدل.
حضرت الله ځاځي یوازې یوه منډه وکړه، رحمت الله ګوربز په ۸ توپونو ۱۰ منډې وکړې او ابراهیم ځدراڼ، چې ډېره تمه ورته کېږي، په لسو توپونو ۸ منډې وکړای شوې.
دا سیالي د دواړو لپاره په تېره بیا د متحده عربي اماراتو لپاره زیاته مهمه ده.
حال دا چې دغو لوبغاړو د ډېرو غښتلو لوبډلو په وړاندې تر دې ښه لوبه نندارې ته وړاندې کړې ده.
ټاکل شوې ده چې د شنبې په ورځ یعنې سبا د افغانستان او متحده عربي اماراتو ټیمونه دوهمه شل اوره سیالي وکړي.
دا سیالي د دواړو لپاره په تېره بیا د متحده عربي اماراتو لپاره زیاته مهمه ده.
د افغانستان د کرېکټ بورډ د رسنیو د برخې مسوول عبدالله پکتیاني پرونۍ بریا د راتلونکو دوو لوبو لپاره مهمه وبلله.
د افغان کرېکټ او متحده عربي اماراتو لوبه
د دوو ټیمونو وروستۍ مسابقه به د یکشنبې په ورځ په ابوظهبي کې وي.
د هغې موافقې پر اساس چې د نوومبر په وروستیو کې د افغانستان او متحده عربي اماراتو د کرېکټ بورډونو ترمنځ لاسلیک شوه، د افغانستان د کرېکټ ملي لوبډله به په راتلونکو ۵ کلونو کې د متحده عربي اماراتو له لوبغالي څخه د کورني میدان په توګه کار اخلي.
د دې موافقې پر اساس، افغانستان به د دې په بدل کې د پنځو کلونو په موده کې هر کال د متحده عربي اماراتو له لوبډلې سره درې ۲۰ اوره سیالۍ کوي.
همداراز متحده عربي امارات به له افغان لوبډلې فیس نه اخلي.
د کرېکټ بورډ په وینا پخوا افغان لوبډلې د هرې مسابقې لپاره متحده عربي اماراتو ته یو لک ډالره فیس ورکاوه.