طالبانو په ځینو لوړپوړو څوکیو تازه کسان ګمارلي.
د طالبانو د حکومت ویاند ذبیح الله مجاهد په خپل ټوېټر باندې د دې تازه تعیناتو خبره کړې.
هغه لیکلي چې د طالبانو د مشر د پرېکړې په اساس د لوړو زده کړو پخوانی سرپرست وزیر عبدالباقي حقاني د ازموینو د ملي ادارې د رییس په توګه ټاکل شوی.
همداراز قاري صلاح الدین ایوبي چې پخوا د کلیو د بیا رغونې او پراختیا وزارت مرستیال وو د زابل د امنیه قومندانۍ په توګه ټاکل شوی.
د طالبانو د مشر د پرېکړې په اساس ډاکتر ګل محمد عثمان د افغانستان د طبي شورا د سرپرست رییس په توګه ټاکل شوی.
په تېر یوه کال کې د طالبانو پر حکومت نیوکې کېږي چې په خپلو مقرریو کې د وړتیا اصل په پام کې نه نیسي او غیر مسلکي کسان یې په دندو ګمارلي.
د طالبانو د حکومت څوارلس میاشتې وتلي خو هېڅ یوه هېواد په رسمیت نه دی پېژندلی.