یو شمېر افغانان د افغانستان د هزاره وګړو د ملاتړ لپاره د نړۍ په څو ښارونو کې اعتراضونه په پام کې لري.
راپورونه وايي چې دا اعتراضونه نن او سبا د جرمني په پلازمېنه برلین، د فرانسې په پلازمېنه پاریس، د ایرلنډ په پلازمېنه دوبلین او د کاناډا په وانکوور ښار کې تر دې سرلیک لاندې چې د هزاره ګانو وژل بند کړئ، پلان شوي دي.
د کابل په لوېدیځ کې د کاج پر ښوونیز مرکز له خونړۍ حملې وروسته د نړۍ په بېلابېلو ښارونو او همداراز پر ټولنیز شبکو د افغانانو اعتراضونه پیل شول.
نړیوالو هم دا برید غندلی او عدالت ته یې د هغه د عاملانو د راکاږلو او همداراز په افغانستان کې یې د اقلیتونو په تېره د هزاره ګانو د خوندیتوب غوښتنه کړې.