په افغانستان کې مېشت یو شمېر افغان سېکان له ملګرو ملتونو غواړي چې څومره ژر کېږي، دوی باید له دې هېواده وویستل شي.
رګبر سينګهـ د پلازمېنې کابل په کارته پروان کې د دوی په درمسال په حمله کې ټپي شوی دی.
په کابل د سېکانو پر ګوردواره د داعش په حمله کې دوه کسان وژل شوي او اوه نور ټپیان دي.
د هغې ورځې د حملې وېره او ډار یې لا هم په څېره کې ښکاري، چې له امله دی زخمي او د کورنۍ یو بل غړي يې ووژل شو.
دی له نړیوالې ټولنې غواړي چې ژر تر ژره یې له افغانستانه وباسي.
هغه وویل: "زه له بهرنۍ نړۍ او ملګرو ملتونو غواړم، دلته چې کوم اهل هنود پاتې دي باید له افغانستانه یې د وتلو هڅه وشي او په کوم بل ښار کې دې ورته د استوګنې زمینه برابره شي."
دا په داسې حال کې ده، چې د افغانستان لپاره د متحده ایالاتو ځانګړي استازي توماس ویسټ او د افغان مېرمنو او بشر حقونو لپاره د امریکا استازې رینا امیري په جلا ټویټونو کې پر سېکانو حمله غندلې او دا یې اندېښمنونکې بللې ده.
اغلې امیري، لیکلي د افغان هندوانو او سېکانو په وړاندې د حملې له امله سخته اندېښمنه ده.
نوموړي د خپل ټویټ په دوام دا هم لیکلي:" د افغانستان غني تنوع د دې هېواد بهترینه خزانه ده، د یو هویت په وړاندې ګواښ د ټول افغانستان په وړاندې ګواښ دی."
د افغانستان لپاره د امریکا ځانګړي استازي توماس ویسټ بیا د هندوانو او سېکانو د ژوند پر خوندیتوب ټینګار کړی دى.
خو په افغانستان کې د مېشتو سېکانو او هندوانو په زړونو کې د نورو حملو د کېدو وېره پر ځای ده.
من موهن سنګهـ د فرانسې له خبري اژانس سره په خبرو کې ویلي: "له دې وېره لرو چې په راتلونکې کې په ډله ییز شکل په کومو مراسمو کې پر موږ حمله ونه شي، دا وېره موږ سره شته."
په افغانستان کې د طالبانو د بیا ځلي واکمنېدو راوروسته په دغه هېواد کي د مېشتو افغان هندوانو او سېکانو د خوندیتوب وېره وروسته تر هغې لا پسې زیاته شوه، چې د روانې اونۍ د شنبې په ورځ د پلازمېنې کابل په کارته پروان سیمه کې د دغه مذهبي لږکیو پر ګوردواره د داعش خراسان څانګې وسله والو ډله ییزه حمله وکړه.
په دې اړه نور: داعش په کابل کې د سېکانو پر ګوردواره د پروني برید مسوولیت ومانهپه دې حمله کې د یو سېک په ګډون دوه تنه ووژل شول او اته نور ټپيان شول.