د برېښنا ستنو د ویجاړېدو په دوام نن سهار یو ځل بیا د پروان ولایت په جنګل باغ سیمه کې د وارداتي برېښنا یوه بله ستنه د بمونو په وسیله ویجاړه شوه.
دا په داسې حال کې ده چې د برېښنا ستنو د ویجاړېدو له امله د کابل او ځینو نورو ولایتونو اوسېدونکي د برېښنا د نشتوالي له امله له جدي ستونزو سره مخ دي او لمریزې برېښنا تهیې مخه کړې ده.
د کابل ښار اتمه ناحیه هغه بازار چې خلک پهکې لمریزې انرژۍ یا سولر دستګاوې پېري په دې شپو او ورځو کې ورته د خلکو تګ راتګ زیات شوی دی.
په یاد بازار کې د سولر د پلور له ۸ تر ۱۰ دکانونه شته او د مشتریانو شمېر هم زیات شوی.
مصطفی فرید تازه په دې بازار کې سولر اخیستی او خپل کور یې په لمریزې برېښنا سمبال کړی.
افغانستان کې پر یو کور د لمریزې برېښنا تختې لګول
دی وايي: "کله چې په کابل برېښنا پرې شوه، ستونزې مو زیاتې شوې، کله چې برېښنا نهوي اوبه هم په کور کې نهوي، زه مجبور شوم، د سولر (لمریزې انرژۍ) ته مخه کړم، اوس مې چې سولر سیستم لګولی، د شپې لهخوا مې کور رڼا وي، نورې ستونزې مې هم ورسره کمې شوې، خو د سولر بیې ورسره لوړې شوې."
نوموړی وايي چې په کور کې یې د سولر انرژۍ دستګاه په لګولو تر ۸۰ زره افغانیو لګښت راغلی.
حاجي بلال په دغه بازار کې د سولر انرژیو دکان لري او وايي، د سولرو د پلور بازار یې ګرم دی.
دی زیاتوي: "زموږ مراجعین ډېر زیات دي، موږ شااوخوا ۱۲ د برېښنا انجنیران لرو، دوی د خلکو په کورونو باندې سولر تختې لګوي، مشتریانو ته نهشو رسېدلای، په دې وروستیو دوو اوونیو کې د سولر تختو بیه له ۲۰ نیولې تر ۳۰ سلنه لوړه شوې ده."
بلال زیاتوي د یوې وړې سولر دستګاه بیه له ۲۰ تر ۲۵ زره افغانۍ او بیا د غټې سولر دستګاه بیه ان تر ۷ لکه افغانیو رسېږي.
د دغه بازار د پلور ګرموالی د کابل له بېبرقي سره نېغه اړیکه لري.
د لمریزې برېښنا تختې یا سولر
له ازبکستان نه د وارداتي برېښنا د ستنو د ویجاړېدو له امله کابل او ځیني نور ولایتونه له څو میاشتو راهیسې دایمي او منظمه برېښنا نهلري، دغه وضعیت کابل ښاریان مجبور کړي چې د برېښنا د تأمین لپاره له نویو لارو استفاده وکړي.په ورته وخت کې، د پروان د والي ویانده وحیده شهکار ازادي راډيو ته وايي چې دغه ولایت کې یې د برېښنا ستنو د ویجاړولو په تور څو تنه نیولي او هڅه دا ده چې دغه ستونزه هواره شي.
اغلې شهکار وايي: "له بده مرغه په دې وروستیو کې موږ د برېښنا ستنو د ویجاړېدو شاهدان یو، موږ تېره میاشت په دې اړه دستګري هم درلودې، څو ورځې وړاندې مو د سالنګ په سیمه کې درې تنه ونیول، بیا هم زموږ هڅې روانې دي."
د افغانستان برېښنا شرکت د معلوماتو له مخې په تېرو شپږو میاشتو کې له ۳۰ زیاتې د وارداتي برېښنا ستنې نړول شوي چې ډېری یې د افغانستان په شمالي ولایتونو کې وې.