په دوحه کې د دولت او طالبانو د مرکچیانو له ټیک درېیو میاشتو بحثونو او ناندریو وروسته خبرې د لنډ وخت لپاره ودرول شوې.
دوی په خپلو خبرو کې د شااوخوا ۲۰ ورځنۍ وقفې اعلان کړی دی.
پرون ماښام دواړو لورو په جلا جلا خبرپاڼو کې وویل چې د خبرو بل پړاو به د ۲۰۲۱ کال د جنورۍ په پنځمه او د جدي میاشتې په ۱۶مه نېټه پیلوي.
2/2دا چې د اجنډا موضوعات لا زیاتو مشورو ته ضرورت لري دواړو لوریو توافق وکړ چې د مذاکراتو دویم پړاو به روان ۱۳۹۹ کال د جدي په ۱۶مه چې د ۲۰۲۱ کال د جنورۍ ۵مې سره برابره ده، پیلیږي.دواړه لوري د قطر دولت او ملت له میلمه پالنې او د لازمو تسهيلاتو برابرولو څخه مننه کوي.
— Nader Nadery (@N_Nadery) December 12, 2020
مرکچیانو ویلي چې دوی د بینالافغاني خبرو د اجنډا د موضوعاتو "لومړني لېستونه" سره تبادله کړي او دغه دمهیې ځکه اعلان کړې چې په خبرهیې دا موضوعات زیاتو سلامشورو ته اړتیا لري.
د دولت او طالبانو د مرکچیانو په خبرپاڼو کې د قطر له کوربهتوبه مننه شوې، خو دا یې کره کړې نهده چې بل پړاو خبرې به هم دوحه کې کېږي او که بل ځای.
2/2 دا چې داجنډا موضوعات لا زیاتو مشورو ته ضرورت لري دواړو لوریو توافق وکړ چې د۲۰۲۰/۱۲/۱۴ نېټه به وقفه شروع کېږي او د دمذاکرات بل پړاو به د ۲۰۲۱کال د جنورۍ په ۵ مه پیلیږي.دواړه لوري د قطر هیواد ددولت او ملت د ميلمه پالنې او لازمو تسهيلاتو برابرولو څخه مننه کوي.
— Dr.M.Naeem (@IeaOffice) December 12, 2020
خبرو کې دا دمه په داسې ورځ اعلان شوه چې د افغانستان د ملي امنیت شورا غوښتنه وکړه چې د خبرو پاتې پړاوونه باید افغانستان کې ترسره شي.
د دغې شورا ویاند رحمتالله اندړ وایي، د هېواد هر ځای کې چې طالبان وغواړي، دوی ورته چمتو دي او هغې سیمه کې اړینې اسانتیاوې رامنځته کولای شي.
ښاغلی اندړ زیاتوي: "افغانانو لسګونه کاله په وینو کې د سولې انتظار کړی، که د سولې خبرو پاتې پړاوونه افغانستان کې پر مخ ولاړ شي، مالکیت او نظارت بهیې د افغانانو وي، هر ځای چې طالبان وټاکي، افغان حکومت ورسره موافق دی او مذاکرات ورسره کوي، د افغانستان په هره نقطه کې چې وي."
رحمتالله اندړ
د طالبانو ویاند ذبیحالله مجاهد ازادي راډیو ته وویل، دوی به وروسته د حکومت د دغه وړاندیز په اړه خپل نظر څرګند کړي.
پوښتنه دا ده چې حکومت ولې طالبانو ته داسې وړاندیز کړی؟
په ټولنیزو چارو کې د ولسمشر سلاکارې ملالۍ شینوارې ازادي راډیو سره یوه تازه بحث کې وویل، داسې شکونه شته چې ممکن قطر د اوږدمهال لپاره د سولې کوربهتوب لپاره ګټور نهوي.
اغلې شینوارې زیاتوي: "زما په نظر د قطر هېواد د اوس لپاره ښه دی، خو که راتلونکي کې د افغانستان د سولې له پروسې نه د ځان په ګټه کار اخلي، ښه به دا وي چې بیا داسې هېواد ته ولاړ شو چې له هېڅ ډلې طرفداري ونهشي."
ملالۍ شینوارې
ژورنالېست او د چارو کتونکی وليالله شاهین بیا وایي، اوسمهال د افغانستان دننه د سولې خبرو ته امکانات نهدي برابر.
ښاغلی شاهین وايي: "لومړی دا چې د اعتماد فضا چې داسې کار ممکنوي، د دواړو لورو ترمنځ نهده موجوده، بله خبره دا چې د افغانستان په ټولو ولایتونو کې جګړه روانه ده، د افغانستان داخل ته د دې خبرو انتقال په دې معنی دی چې له سولې د بینالمللي خواخوږو لاسونه لنډېږي، دا د دې پر ځای چې له خبرو سره مرسته وکړي، د مذاکرو د ناکامۍ سبب کېږي."
پر قطر سربېره څو نورو هېوادونو له هغې ډلې روسیې، چین، ازبکستان، ایران، ناروې او جرمني له وړاندې د بینالافغاني خبرو کوربهتوب ته چمتووالی ښودلی.
خو معلومه نهده چې د خبرو نور پړاونه به چېرته او څه ډول ترسره کېږي.