د چین په هوبې ولایت کې چې د کرونا وایروس سرچینه بلل کېږي، د چهارشنبې په ورځ یو شمېر فابریکو او سوداګریزو خونو ته د فعاليت د بیا پیل اجازه ورکول شوه.
د چین حکومت غواړي وښیي چې د دغه خطرناک وایروس خپرېدل چې د دغه هېواد اقتصاد یې سخت وځپه، تر کنټرول لاندې راوستی.
د چین مشران هڅه کوي چې دغه هېواد کې سوداګریزې چارې بېرته عادي حالت ته راوګرځي.
د چین حکومت په تېره جنوري میاشت کې د کرونا وایروس د کنټرول لپاره یو شمېر چټک ګامونه پورته کړل.
دوی په دې هڅو سره فابریکې او د تګ راتګ وسایط ودرول چې د نړۍ پر اقتصاد یې هم اغېز وکړ.
د چین ولسمشر شي جین پېنګ د سې شنبې په ورځ د هوبې ولایت مرکز، ووهان ښارته ولاړ، چېرته چې د لومړي ځل لپاره په ډسمبر میاشت کې کرونا وایروس پیدا او خپور شو.
دې سیمې ته د چین د ولسمشر سفر وښوده چې هلته د کرونا وایروس ګواښ د کمېدو په حال کې دی.
د هوبې ولایت چارواکو اعلان کړی چې دغه ولایت کې صنعتکاران، د خوراکي توکو د تولید او پروسس شرکتونه او نور سوداګريز بنسټونه خپل فعالیت پیلولی شي.
دغه شرکتونه او فابریکې د چین اقتصاد کې مهمه ونډه لري او د خلکو ورځنۍ اړتیاوې پوره کوي.
د ووهان ښار چې ۱۱ میلیونه نفوس لري او د شانګهای لوېدیځ ته په ۷۰۰ کیلومترۍ کې پروت دی، د چین د مرکزي سیمو له فعالو صنعتي ځایونو څخه شمېرل کېږي.
له هغو شرکتونو څخه چې بېرته فعالیت پيلوي غوښتل شوي چې د وایروس مخنيوي ته پلانونه ولري.
دوی ته ویل شوي چې د نښو نښانو په صورت کې خپل کارکوونکي معاینه کړي او خپلو مارکېټونو او کار ځایونو کې د وایروس ضد مواد وکاروي.
په همدې حال کې اروپايي هېوادونو او د ټولو په سر کې ايټاليا د کرونا وایروس خپرېدو ته جدي تدابیر نیولي دي.
د دغه راپور د غږیزې بڼې د اورېدو لپاره لاندې لېنک کېکاږئ:
Your browser doesn’t support HTML5
تېره ډسمبر میاشت کې د کرونا وایروس په چین وموندل شو