ايران حکومت د فرانسې، جرمني او بريتانيا لهخوا "د لانجې د حل په نوم د مېکانيزم" فعالول، ستراتېژيکه تېروتنه وبلله.
تهران ويلي چې د ٢٠١٥ میلادي کال د اټمي تړون د خونديتوب لپاره پر رغوونکو هڅو غور کولو ته چمتو دى.
د ايران د نيمه دولتي اژانس فارس په حواله د بهرنيو چارو وزير محمد جواد ظريف د قانون له مخې د لانجې د حل مېکانيزم بېاساسه او له سياسي نظره ستراتېژيکه تېروتنه بللې ده.
دغه تړون په ٢٠١٥ میلادي کال کې د ايران او د نړۍ د پياوړو هېوادونو ترمنځ لاسليک شوى و.
فرانسې، بريتانيا او جرمني ويلي چې د ايران په اټمي تړون کې يې د لانجې د حل يو مېکانيزم فعال کړى دى.
دوى ويلي دا اقداميې ځکه کړى چې تهران په اټمي تړون کې د خپلو تعهداتو رعايت کم کړى دى.
وروسته له هغې چې د امريکا ولسمشر ډونالد ټرمپ د ٢٠١٨ میلادي کال په مې مياشت کې له اټمي تړون څخه د وتلو او پر ايران د بنديزونو د بيا لګولو اعلان وکړ، ايران ګڼ داسې اقدامات کړي چې د ٢٠١٥ میلادي کال په اټمي تړون کې يې له تعهداتو سرغړونه ګڼل کېږي.
فرانسې، جرمني او بريتانيا ويلي دوى داسې پروسه تنظيم کړې چې د ايران پر خلاف د ملګرو ملتونو د بنديزونو سبب کېږي، خو له واشنګټن او د هغه د حد اکثر فشارونو له کمپاين سره يولاس نهدي.
بهرنيو چارو او امنيتي پاليسۍ لپاره د اروپايي ټولنې عالي استازي جوزپ بارل وویل د يوه تنظيموونکي په توګه به ضمانت ورکړم چې د لانجې د حل مېکانيزم به د لانجو د حل لپاره فرصتونه برابر کړي.
د بهرنيو چارو او امنيتي پالېسۍ لپاره د اروپايي ټولنې عالي استازي جوزپ بورل پرون د فرانسې په سټراسبورګ کې د اروپايي پارلمان عمومي غونډې ته وويل: "د يوه تنظيموونکي په توګه به ضمانت ورکړم چې د لانجې د حل مېکانيزم به د فرانسې، جرمني او بريتانيا لهخوا د لانجو د حل لپاره فرصتونه برابر کړي، زه به دا پروسه څارم. د راروانو اقداماتو په اړه به له ټولو اړخونو سره په تماس کې يم."
بلخوا د ايران لپاره د واشنګټن ځانګړي استازي د ايران په اړه د بريتانيا د صدراعظم د وروستيو څرګندونو هرکلى وکړ.
براين هوک پرون سې شنبه روېټرز اژانس ته وويل، امريکا "ډېره خوشحاله" ده چې د بريتانيا صدراعظم بورېس جانسون د ايران په اړه د امريکا له ارزونې سره موافق دى او رضايتيې ښوولى چې د ايران د ٢٠١٥ میلادي کال اټمي تړون دې په بله موافقه بدل شي.
د بريتانيا صدراعظم بورېس جانسون د اوسني اټمي تړون پر ځاى د بل تړون چې ده "د ټرمپ موافقه" وبلله وړاندیز وکړ.
هغه بي بي سي ته ويلي چې دغه نوى تړون به وړاندې تګ ته لاره هواره کړي.