تازه خبر
پنجشنبه ۲۸ لړم ۱۴۰۵ کابل ۰۹:۳۵

خبرونه

جرمني: ایران دې د اټمي تړون له چوکاټه بهر ګام نه‌پورته کوي

هایکو ماس ایران هڅولی چې په ۲۰۱۵ میلادي کال کې د اټمي موافقې پر اساس اقدام وکړي.
هایکو ماس ایران هڅولی چې په ۲۰۱۵ میلادي کال کې د اټمي موافقې پر اساس اقدام وکړي.

د جرمني د بهرنیو چارو وزیر هایکو ماس ویلي، ایران باید ټول هغه اقدامات چې د روان میلادي کال د جولای له میاشتې راهیسې یې کړي، لغو کړي.

هایکو ماس ایران هڅولی چې په ۲۰۱۵ میلادي کال کې د اټمي موافقې پر اساس اقدام وکړي.

د ایران جمهور رئیس حسن روحاني د نومبر په ۵مه وویل، د فوردو په نوم اټمي تأسیساتو ته به د یورانیمو د ګاز ورکولو پروسه پیل کړي.

د جرمني د بهرنیو چارو وزیر پرون د نومبر په ۶مه، په یوه خبري غونډه کې چې د استونیا د بهرنیو چارو وزیر هم حاضر و، وویل: "د ایران د ولسمشر له لوري اعلان شوې خبرې د منلو وړ نه‌دي. په فوردو کې ۱۰۴۴ سنټرفیوژونو ته د یوارنیمو د ګاز ورکولو پیل له هغو تعهداتو سره چې ایران له نړیوالو سره کړي، اړخ نه‌لګوي."

د ایران حکومت په تدریجي ډول له هغې موافقې چې د ۲۰۱۵ میلادي کال کې یې له نړیوالو قدرتونو سره کړې وه، د لیرې کېدو ګامونه پورته کوي.​

د ورځې تازه خبرونه دلته ولولئ

تاجکستان له افغانستان سره د ګډ بازار د جوړولو وړاندیز کړی

ارشیف، د افغانستان او تاجکستان ترمنځ ګډه پوله
ارشیف، د افغانستان او تاجکستان ترمنځ ګډه پوله

تاجکستان غواړي له افغانستان سره پر پوله ګډ بازار جوړ کړي، څو د دواړو هېوادونو ترمنځ سوداګري او اقتصادي همکاري پراخه شي.

دا وړاندیز په کابل کې د تاجکستان سفیر سعدي شریفي د چهارشنبې په ورځ د طالبانو د سوداګرۍ او پانګونې خونې له مشر سید کریم هاشمي سره په کتنه کې مطرح کړی دی.

شریفي ویلي، د دغه بازار جوړېدل به د دواړو هېوادونو سوداګرو او وګړو ته د سوداګرۍ او اقتصادي راکړې ورکړې نوي فرصتونه برابر کړي.

طالبان وايي په شپږو میاشتو کې یې تر ۸۲۷ زره ډېرې الکترونیکي تذکرې وېشلي

ارشیف، د الکترونیکي تذکرو د وېش په اړه یو اعلان
ارشیف، د الکترونیکي تذکرو د وېش په اړه یو اعلان

د طالبانو تر کنټرول لاندې د افغانستان د احصائیې او معلوماتو ملي ادارې ویلي چې د روان لمریز کال په لومړیو شپږو میاشتو کې یې په ټول هېواد کې ۸۲۷ زره او ۶۰ الکترونیکي تذکرې وېشلې دي.

دې ادارې د سې‌شنبې په ورځ په یوه خبرپاڼه کې ویلي چې په دې موده کې ۶۰۰ زره او ۵۴۶ نارینه‌وو او ۲۲۶ زره او ۵۱۴ ښځو الکترونکي تذکرې ترلاسه کړې دي.

د ادارې د شمېرو له مخې، په ټول هېواد کې د الکترونیکي تذکرو د وېش د بهیر له پیل راهیسې نږدې ۱۸.۳ میلیونه الکترونکي تذکرې وېشل شوې دي.

په خبرپاڼه کې راغلي چې اوس‌مهال خلک په افغانستان کې د اسان خدمت له ۸۷ مرکزونو او د متحده عربي اماراتو په ابوظبي کې له یوه بل مرکز څخه د الکترونکي تذکرو اړوند خدمتونه ترلاسه کولای شي.

پر علي‌السالم پوځي اډه د ایران بریدونو ته د کوېټ غبرګون

ارشیف، پر کوېټ د ایران یو توغندیز برید
ارشیف، پر کوېټ د ایران یو توغندیز برید

د کوېټ د بهرنیو چارو وزارت پر دغه هېواد د ایران بریدونه غندلي او هغه‌یې «جنایتکارانه» بللي دي.

د راپورونو له مخې، ایراني ځواکونو د سې شنبې په ورځ د امریکا له لوري د قشم ټاپو د توغندیو د توغولو پر یوه مرکز تر برید څو ساعته وروسته، د کوېټ د علي‌السالم پوځي اډه په نښه کړې ده.

ایران ویلي، په دغه برید کې یې د امریکا د پاتریوټ د دفاعي توغندیو سیستم او د بې‌پیلوټه الوتکو د توغولو مرکزونه ویشتي دي، خو د اوښتو احتمالي زیانونو په اړه لا معلومات نه‌دي خپاره شوي.

د کوېټ د بهرنیو چارو وزارت دا برید د جګړې خطرناکه پراختیا بللې ده.

بحرین او کوېټ هم ویلي چې د ایران هوايي بریدونه‌یې شنډ کړي دي.

د عربي ټولنې سرمنشي نبیل فهمي هم پر کوېټ او بحرین د ایران بریدونه او په هرمز تنګي کې د متحده عربي اماراتو د ادنوک شرکت پر یوې بېړۍ برید غندلی دی.

تر نیمایي ډېر بې‌ځایه شوي او بېرته ستانه شوي افغان ماشومان کافي خواړه نه‌لري

ارشیف، له ماشومانو سره راستانه شوي افغان کورنۍ
ارشیف، له ماشومانو سره راستانه شوي افغان کورنۍ

د ماشومانو د خوندیتوب سازمان (سېف د چلډرن) مؤسسې په یوه تازه راپور کې ویلي، په افغانستان کې کابو ۵۵ سلنه هغه ماشومان چې بې‌ځایه شوي یا بېرته هېواد ته ستانه شوي، د کورونو پرېښودو او نورو کړکېچونو له امله د کافي خوړو د نه‌وررسېدو ستونزه لري.

د دې مؤسسې د موندنو له مخې چې پرون چهارشنبې یې خپرې کړي، ۴۱ سلنه ماشومانو ویلي چې روغتیايي وضعیت‌یې خراب شوی او ۳۸.۳ سلنه د پنځو او ۱۷ کلونو ترمنځ ماشومان په کارونو بوخت شوي دي.

دا څېړنه په اوو ولایتونو کې له ۸۲۴ ماشومانو او د کورنیو له ۸۳۸ سرپرستانو سره د مرکو پر بنسټ شوې ده.

راپور ښيي چې ۳۷.۲ سلنه ماشومانو د زده‌کړو د سویې د خرابېدو او ۳۸.۳ سلنه کورنیو د ماشومانو د رواني او عاطفي وضعیت د خرابېدو خبر ورکړی دی.

د راپور له مخې، له هرو 10 ماشومانو نږدې نهو یې خوراکي مرستې ته اړتیا لرله، خو یوازې ۷.۵ سلنه ماشومانو په خپل اوسني استوګنځي کې بشري مرستې ترلاسه کړې دي.

دا راپور په داسې حال کې خپرېږي چې د ملګرو ملتونو د شمېرو له مخې، د ۲۰۲۳ کال له سپټمبر څخه د ۲۰۲۶ کال تر اکټوبر پورې له ایران او پاکستان څخه څه باندې ۶.۶۷ میلیونه افغانان بېرته هېواد ته ستانه شوي دي.

په مادرید کې د افغان ښځو څلورمه غونډه جوړېږي

ارشیف، په مادرید کې د افغان ښځو یوه غونډه
ارشیف، په مادرید کې د افغان ښځو یوه غونډه

د افغان ښځو لپاره د ښځو بنسټ وايي، «زموږ غږ واورئ» څلورمه غونډه به د نومبر په ۲۲ او ۲۳مه د هسپانیا د بهرنیو چارو وزارت په همکارۍ د دغه هېواد په پلازمېنه مادرید کې جوړه شي.

د ښځو بنسټ د چهارشنبې په ورځ وویل، د غونډې اصلي موضوع به د عدالت او سولې په ټینګښت کې د افغان ښځو مشري او حساب ورکونه وي.

په دې غونډه کې به افغان ښځې، ډیپلوماتان، د ملګرو ملتونو استازي، د بشري حقونو کارپوهان او مدني فعالان ګډون وکړي.

د هسپانیا د بهرنیو چارو وزیر، خوسې مانوېل البارس، به هم غونډې ته وینا وکړي.

هسپانیا په تېرو کلونو کې هم د افغان ښځو په ملاتړ د غونډو کوربه‌توب کړی دی.

د غونډې ګډونوال به د نجونو پر زده‌کړو، د ښځو پر اقتصادي پیاوړتیا، عدالت، د ښځو پر حقونو او د افغانستان د سولې په بهیر کې د هغوی پر ونډې خبرې وکړي.

یو اسرائیلی وګړی د انسانانو د بدن د غړو د قاچاق په تور پر ۱۲ کاله بند محکوم شو

روسیه کې یو محبس
روسیه کې یو محبس

د مسکو یوې محکمې د چهارشنبې په ورځ (د لړم ۲۷مه) د بوریس وولفمن په نوم ۴۲ کلن اسرائیلی وګړی د انسانانو د قاچاق او د بدن د غړو د پلور په تور پر ۱۲ کاله بند محکوم کړ.

د فرانسې خبري آژانس د راپور له مخې، د مسکو څارنوالۍ په یوه اعلامیه کې ویلي، وولفمن د ۲۰۰۶ او ۲۰۰۸ کلونو ترمنځ ، د روسیې د اتباعو په شمول یو شمېر کسان، د ناقانونه جراحي عملیاتو لپاره کوسوو ته لېږدول.

د اعلامیې له مخې، د هر پښتورګې د پیوند لګښت لږ تر لږه ۸۰ زره یورو و.

وولفمن تېر کال په ترکیه کې نیول شوی و او وروسته روسیې ته سپارل شوی و.

د چین ولسمشر د شینجین په هوايي ډګر کې  د ټرمپ هرکلی وکړ

د چین او امریکا ولسمشران د شینجین په هوايي ډګر کې ،
د چین او امریکا ولسمشران د شینجین په هوايي ډګر کې ،

د چین ولسمشر شي جین‌پینګ د چهارشنبې په ورځ (د لړم ۲۷مه) د شینژن په هوايي ډګر کې د امریکا د ولسمشر ډونالډ ټرمپ هرکلی وکړ.

وروسته لدې چې ولسشمر ټرمپ د امریکا د ولسمشرۍ له ځانګړې الوتکې (ایرفورس ون) څخه ښکته شو او په داسې حال کې چې د شي جین‌پینګ ترڅنګ پر سره غالۍ ولاړ و، د تشریفاتو ګارډ ورته د هرکلي مراسم ترسره کړل.

ټرمپ د شینژن په ښار کې له درې اړخیزې غونډې یوه ورځ مخکې چین ته ورسیده. ټاکل شوې ده چې د روسیې ولسمشر ولادیمیر پوتین هم په دې غونډه کې ګډون وکړي.

سعودي ائتلاف وايي د حوثیانو یو توغندی یې شنډ کړی دی

ریاض کې د پاچا خالد هوايي ډګر ته څیرمه د تیلو د ذخیرې څخه د لوګي د پورته کیدو انځور
ریاض کې د پاچا خالد هوايي ډګر ته څیرمه د تیلو د ذخیرې څخه د لوګي د پورته کیدو انځور

د سعودي عربستان په مشرۍ ائتلاف وايي، د حوثي وسله‌والو یو توغندی یې شنډ کړی او له منځه وړی دی.

د رویټرز خبري اژانس د راپور له مخې، د سعودي عربستان د ملکي دفاع ادارې دیمن له حوثیانو سره د نښتو ددوام په ترڅ کې، د چهارشنبې په ورځ (د لړم ۲۷مه) د سعودي عربستان د جنوبي ښارونو جازان، نجران او خمیس مشیط اوسېدونکو ته د احتمالي خطر خبرداری ورکړی دی.

په عین حال کې، د فرانسې خبري اژانس د راپور له مخې، نن د سعودي عربستان په پلازمېنه ریاض کې د یوې زورورې چاودنې غږ اورېدل شوی او یو شمېر اوسېدونکو د ریاض هوايي ډګر ته څېرمه د لوګي د لیدلو خبر ورکړی دی.

له پیښې مخکې د سعودي عربستان په مشرۍ ائتلاف اعلان وکړ چې د حوثیانو له خوا د ریاض ښار پر لور توغول شوی یو کروز توغندی یې نسکور کړی دی.

د ایران له ملاتړ برخمنو حوثیانو تراوسه په دې اړه څه نه دي ویلي.

روبیو: فکر نه کوم پر واشنګټن د «چټل بم» د برید نږدې ګواښ موجود وي

د امریکا بهرنیو چارو وزیر مارکو روبیو
د امریکا بهرنیو چارو وزیر مارکو روبیو

د امریکا د بهرنیو چارو وزیر مارکو روبیو ، په واشنګټن کې د «چټل بم» په وسیله د برید لپاره د ایران د احتمالي پلان په اړه د سي‌اېن‌اېن د راپور په غبرګون کې ویلي، دی فکر نه کوي چې د امریکا پلازمېنه به له کوم سملاسي ګواښ سره مخ وي.

د«چټل بم» بم اصطلاح داسې وسلې ته کارول کیږي چې د عادي چاودېدونکو توکو په وسیله راډیواکټیف مواد په چاپېریال کې خپروي.

د رویټرز خبري اژانس د راپور له مخې، روبیو د چهارشنبې په ورځ (د لړم ۲۷مه) د فلیپین په پلازمېنه مانیلا کې، پر واشنګټن د احتمالي برید په اړه د یوه خبریال د پوښتنې په ځواب کې وویل: «د امریکا استخباراتي ادارې په دوامداره توګه امنیتي ګواښونه ارزوي.»

هغه زیاته کړه چې ځینې کسان داسې معلوماتو ته دلاسرسي ادعا کوي چې په حقیقت کې یې په اختیار کې نه دي خو یوازې د دې لپاره چې د دولتي ادارو برېښنالیک پته لري، د خبریالانو لخوا د اعتبار وړ ګڼل کیږي.

د امریکا د بهرنیو چارو وزیر ټینګار وکړ چې د هغه نیوکې په ځانګړې توګه د سي‌اېن‌اېن د یاد راپور په اړه نه دي، بلکې په عمومي توګه د رسنیو د استخباراتي سرچینو په اړه خبرې کوي.

د ټرمپ د ترور د توطیې په قضیه کې د سپاه پاسداران روزل شوی کس په ۲۷ نیم کاله بند محکوم شو

د امریکا د عدلیې وزارت لخوا د آصف مرچند خپور شوی تصویر
د امریکا د عدلیې وزارت لخوا د آصف مرچند خپور شوی تصویر

د امریکا د عدلیې وزارت اعلان وکړ چې د پاکستان تبعه او د ایران د سپاه پاسداران روزل شوی عامل، آصف مرچنت، د ډونالډ ټرمپ او نورو امریکايي چارواکو د ترور لپاره توطیه کې د لاس لرو له امله په ۲۷ نیم کاله بند محکوم شوی دی.

نوموړی تورن شوی و چې د پنځه زره امریکايي ډالرو په بدل کې د اجیرو قاتلانو د ګمارنې په هڅې سره یې په توطیه کې ګډون درلود.

د امریکا د عدلیې وزارت د هغې اعلامیې له مخې چې د سې‌شنبې په ورځ، د لړم په ۲۶مه خپره شوې، د نیویارک د یوې د فدرالي محکمې قاضي، اریک کومېټي، ۴۸ کلن آصف مرچنت د پولې هاخوا د ترهګریز اقدام د ترسره کولو د هڅې او د اجیرانه وژنې د توطیې په تور په ۳۳۰ میاشتو بند محکوم کړی دی.

د امریکا د عدلیې وزارت وايي، مرچنت په ۲۰۲۲ کال کې له سپاه پاسداران سره همکارۍ ته مخه کړې وه او د یوه خپلوان له لارې یې په دغو ځواکونو کې له خپل ارتباطي کس، "یوسف مرهرداد"، سره اړیکه ټینګه کړې وه.

د دې اعلامیې له مخې، مرچنت له ۲۰۲۳ کال راهیسې د شاوخوا یو نیم کال په موده کې نږدې ۱۵ ځله په تهران کې له خپل ارتباطي کس سره ولیدل او په دغو لیدنو کې یې د استخباراتي ضد فعالیتونو په برخه کې روزنه ترلاسه کړه. وروسته ورته دنده وسپارل شوه چې د امریکايي چارواکو د ترور د تنظیمولو لپاره امریکا ته سفر وکړي.

د امریکا د عدلیې وزارت په وینا، مرچنت ته لارښوونه شوې وه چې د عملیاتو د ترسره کولو لپاره له مجرمینو یا د مافیا له غړو څخه کسان وګوماري او امریکا کې په یوه سیاسي غونډه کې د ترور اقدام ترسره کړي.

امریکايي څارنوالانو ویلي، چې د دې توطیې اصلي هدف ډونالډ ټرمپ و، خو د هغه مهال د امریکا ولسمشر جو بایډن او د جمهوري غوښتونکي ګوند په لومړنیو ټاکنیزو سیالیو کې د ټرمپ سیاله نیکي هیلي هم د احتمالي هدفونو په توګه په پام کې نیول شوي وو.

نور راوښيه

XS
SM
MD
LG