د افغانستان او پاکستان ډیپلوماتان بالاخره په څلورمه غونډه کې بریالي شول چې د سولې او پیوستون لپاره د دواړو هېوادونو د عمل ګډ پلان بشپړ کړي.
دا غونډه د دوشنبې په ورځ په اسلاماباد کې د افغانستان او پاکستان د بهرنیو چارو وزارتونو د مرستیالانو حکمت خلیل کرزي او تهمینه جنجوعه په مشرۍ جوړه شوې وه.
د افغانستان د بهرنیو چارو وزارت ویاند احمد شکېب مستغني تېر ماښام ازادي راډیو ته وویل چې دواړه لوري پر دې سلا شول چې په سمه توګه د دغه پلان عملي کېدل د سولې او ثبات او د ترورېزم د لهمنځه وړلو په برخه کې مرسته کولای شي.
احمد شکېب مستغني
ښاغلي مستغني زیاته کړه:
"د دواړو لورو پلاوي موافق وو چې د سولې او پیوستون لپاره د افغانستان او پاکستان د عمل ګډ پلان بشپړ او مؤثر عملي کېدل به مرسته وکړي، دواړه هېوادونه ګډ هدف ته ورسېږي چې هغه د ترورېزم لهمنځه وړل او سولې او ثبات ته د دواړو هېوادونو د خلکو رسېدل دي."
بلخوا په اسلاماباد کې د افغانستان سفیر حضرت عمر زاخېلوال چې په همدې غونډه کې یې ګډون درلود، پر خپل ټویټرپاڼه دا اقدام مهم بللی دی.
د همدې سند له مخې به د دغه پلان د بېلابېلو برخو د تطبیق لپاره ځانګړې شوې شپږ کاري ډلې ډېر ژر خپلې دندې پیل کړي.
ښاغلي مستغني وویل چې د دغو ډلو د کار پیل د همدې عمل پلان په بشپړېدو پورې تړلی وو او اوس به د ده په خبره دغه ډلې د خپلو غونډو د پیلېدو په اړه په نږدې راتلونکي کې پرېکړه وکړي.
نوموړي وویل، د دې ډلو غونډې به پر بېلابېلو برخو متمرکزې وي.
مستغني زیاته کړه:
"په هغو بېلابېلو برخو کې یوهیې د امنیت، له ترورېزم سره د مبارزې او د تاوتریخوالي د راکمولو په برخه کې د دواړو هېوادونو همکاري ده، بله برخه د سوداګرۍ، ټرانزیت او اقتصاد په برخه کې همکاري او یوه بله ډله به د کډوالو چارې ارزوي. په همدې ترتیب شپږ ډلې دي چې پر بېلابېلو برخو کار کوي، څو د دغه پلان مواد عملي کړي."
د افغانستان ولسمشر محمد اشرف غني او د پاکستان صدراعظم شاهد خاقان عباسي په کابل کې په کب يا حوت مياشت کې موافقه وکړه چې د دواړو هېوادونو مقامات به د افغانستان او پاکستان د عمل ګډ پلان سند نهايي کوي.
د افغانستان د بهرنیو چارو وزارت وایي، افغان لوري په ټولو څلورو غونډو کې د دغه ګډ پلان د عملي کېدو په برخه کې پر پاکستاني لوري ټینګار کړی دی.
د دغه وزارت چارواکي ډاډ ښیي چې پاکستان به پر خپلو ژمنو درېږي، ځکه دا ځل د دوی په خبره په لوړه سطح د دواړو لورو موافقه پرې شوې ده.