د افغانستان د سولې عالي شورا وايي هر هغه هڅه چې د سولې لپاره ترسره کېږي دوی يې هرکلی کوي.
په داسې حال کې چې وسلهوالو طالبانو د افغانستان د جګړې د ختمولو په مقصد د جهادي مشرانو غوښتنه نهده رد کړې د افغانستان د سولې عالي شورا وايي، د ټولو هغه هڅو هرکلی کوي چې په افغانستان کې د جګړې د ختمېدو لامل ګرځي.
د دغې شورا مرستیال حاجي دین محمد د پنجشنبې په ورځ ازادي راډيو ته دغه څرګندونې وروسته له هغې وکړې چې طالبانو تازه د یوې اعلامیې په خپرولو سره ویلي چې په افغانستان کې د جګړې د پای ته رسېدو لپاره له جهادي مشرانو او بل هر هغه چا سره چې په دې برخه کې لېوالتیا لري، خبرو اترو ته چمتووالی لري.
نوموړي زیاته کړه:
"دا مخه خلاصه ده که جهادي مشران وي، ځوانان وي، مدني ټولنې، قومي مشران او یا هم علما وي او د سولې په برخه کې چې د افغانستان د جګړې د پای ته رسېدو لامل کېږي او هڅې کوي، دا د قدر وړ دي او د سولې عالي شورا ترې هرکلی کوي."
وسلهوالو طالبانو له هغې وروسته دا اعلامیه خپره کړه چې جهادي قوماندان محمد اسماعیل خان څو ورځې وړاندې په هرات کې د یوې غونډې پر مهال پر طالبانو غږ وکړ، که د حکومت د سولې وړاندیز ته ځواب نهوايي "د مجاهدینو د سترې کورنۍ" سره دې خبرو اترو ته کېني.
نوموړي ویلي وو، طالبان افغان حکومت او د سولې شورا نامشروع بولي، نو ځکه باید جهادي مشران له هغوی سره د سولې په اړه خبرې اترې وکړي.
طالبانو په دې اعلامیه کې چې د ۱۳۹۶ لمریز کال په وروستۍ ورځیې خپره کړې ویلي، دا چې اسماعیل خان د جهادي شخصیتونو په استازولۍ پر دوی د سولې غږ کړی د جګړې او اشغال د پای ته رسېدو په خاطر دې د طالبانو له سیاسي دفتر سره وګوري.
خو د افغان حکومت د اجرائیه ریاست مرستیال ویاند جاوید فیصل رسنیو ته ویلي چې طالبان دې د افغان حکومت د سولې طرحې ته ځواب ووايي.
افغان ولسمشر محمد اشرف غني څو ورځې مخکې د کابل پروسې په دوهمه ناسته کې طالبانو ته د سولې یوه جامع طرحه وړاندې کړه چې د شنونکو په باور طالبانو ته پهکې د رد څه نهدي پاتې.
طالبانو تر اوسه د حکومت د وړاندیز شوې طرحې په اړه څه نهدي ویلي، خو له دې وړاندې يې په افغانستان کې د بهرنیو عسکرو په شتون کې د سولې هر ډول خبرې رد کړې دي.
په ورته وخت کې د سیاسي چارو یو شمېر کارپوهان بیا وايي، له جهادي مشرانو سره د خبرو لپاره د طالبانو لهخوا د شین څراغ په روښانه کولو کې دوه خبرې دي، یا دا کار د شخصي ګټو او واک لپاره کوي او یا هم د حسن نیت لپاره.
د کابل پوهنتون د سیاسي علومو استاد ودیر صافي وویل:
"که دوی «جهادي مشران» د شخصي ګټو او د قدرتونو د ساتلو په هدف له طالبانو سره خبرې کوي نو ښکاره خبره ده چې نتیجه نهشي ورکولای او د حکومت چارې نورې هم له تخریب سره مخامخوي."
خو دی وايي، که جهادي مشران د ښه حسن نیت له مخې د سولې په برخه کې د وسلهوالو طالبانو غوښتنې له حکومت سره شریکې کړي، نو دا کار بېګټې نهدی.
خو د ښاغلي صافي په خبره، ښه به دا وي چې طالبان د حکومت د سولې وړاندیز ته ځواب ووايي.
راپور: اکرامالله اکرام