د اسپانیا حکومت نن یوه بېړنۍ غونډه جوړوي.
دا غونډه داسې مهال کېږي چې په دې وروستیو کې د کاتالونیا سیمې اوسېدونکو د دې سیمې د خپلواکۍ لپاره ټولپوښتنه وکړه او شااوخوا ۹۰ سلنه خلکو مثبته رأیه ورکړه.
د اسپانیا حکومت نن داسې مهال د بېړنۍ غونډې د جوړولو خبره کړې چې د کاتالونیا د بېلتون غوښتونکې سیمې مشرانو تېره ورځ هغه سند چې د خپلواکۍ د اعلامیې نومیې ورکړی وو، لاسلیک کړ.
د کاتالونیا د بېلتون غوښتونکې سیمې مشر کارلس پوجدومونت.
د کاتالونیا د بېلتون غوښتونکې سیمې مشر کارلس پوجدومونت تېره ورځ په یوه وینا کې وویل چې په وروستۍ ټول پوښتنه کې د کاتالونیا د اوسېدونکو ملاتړ دغې سیمې ته دا حق ورکوي چې له اسپانیا څخه د خپل بېلوالي مراحل پیل کړي.
د کاتالونیا د اوسېدونکو د تمې خلاف ښاغلي پوجدومونت د دې سیمي له پارلمان څخه وغوښتل چې د ټول پوښتنې پایلې وځنډوي، څو له مرکزي دولت سره د خبرو لار پرانیستل شي.
په هغې ټول پوښتنه کې چې د اکټوبر په لومړۍ نېټه د اسپانیا په کاتالونیا کې ترسره شوه ۹۰ په سلو کې رأی ورکوونکو د دې سیمي د خپلواکۍ لپاره مثبتې رأیې ورکړې.
د اسپانیا حکومت دغه ټول پوښتنه غیر قانوني اعلان کړه او وایي چې پایلې یې مشروعیت نهلري.
د اسپانیا صدراعظم ماریانو راخوی ژمنه کړې چې د خپل هېواد د یووالي د ساتلو لپاره به هر اړین اقدام وکړي.
د اروپایي شورا مشر ډونالد ټوسک د کاتالونیا سیمې د مشر د تېرې ورځې تر وینا دمخه له هغه غوښتي دي چې د اسپانیا له حکومت سره د خبرو لاره انتخاب کړي.
ښاغلي ټوسک دغهراز د اسپانیا له صدراعظم نه غوښتي چې د دې موضوع لپاره یوه حل لاره ومومي.
د ښاغلي ټوسک په خبره پر دې موضوع شخړې نهیوازي کاتالونیا او اسپانیا بلکې ټوله اروپا اغېزمنولی شي.