په کابل کې د سترو مالیه ورکوونکو لپاره د برېښنايي خدمتونو ازمایښتي سیستم پرانیستل شو چې وروسته به نورو ولایتونو ته وغځول شي.
د افغانستان د ماليې وزارت وايي، د مالیاتو د سیستم په برېښنايي کېدو سره به له يوه اړخه د فساد مخه ونیول وشي او بلخوا به د مالیاتو د ورکړې په سیستم کې ډېر سادهوالی راشي.
د دغه وزارت د عوایدو رئیس عبدالحبیب ځدراڼ د چهارشنبې په ورځ په کابل کې د سترو مالیه ورکوونکو لپاره د برېښنايي خدمتونو د سیستم د پرانیستې پر مهال وویل چې د مالیاتو د سیستم په برېښنايي کېدو سره به په عوایدو کې زیاتوالی راشي او د مالیاتي فرار مخه به هم ونیول شي.
ښاغلي ځدراڼ دا شان وویل چې د مالیاتو په برخه کې یې د اصلاحاتو په هدف يو لړ لومړیتوبونه هم مشخص کړي.
نوموړي زیاته کړه:
"اصلاحاتو ته مو ډېره توجه په درېیو څلور ساحو کې ده چې لومړی د خدماتو د کچې لوړول دي، دوهم د مالیه ورکوونکو لپاره د پروسو ساده کول دي چې ښه بېلګهيې د الکترونیکي خدماتو پرانیستل دي، درېیم کوښښ کوو او پلان لرو چې عامه پوهاوي ته ډېر کارو وکړو."
دا په داسې حال کې ده چې د افغانستان د ماليې وزارت د معلوماتو له مخې اوسمهال له ۶۰ څخه تر ۷۰ سلنه پورې شرکتونه د مالیې له ورکړې څخه په تېښته کې دي چې زیاترهيې متوسط مالیه ورکوونکي شرکتونه دي.
د دوی په خبره کې په دې ډله کې يو شمېر داسې شرکتونه هم شته چې د مالیې وزارت له کارکوونکو سرهيې د ماليې د ورکړې په برخه کې ناوړه چلند هم کړی دی.
- خو دا چې د دغو شرکتونو په وړاندې به د ماليې وزارت اقدامات څه وي؟
په دې اړه د مالیې وزارت د عوایدو او ګمرکاتو مرستیال نجیبالله وردګ داسې وايي:
"موږ اوس عملاً په دې باندې کار کوو چې دا فلتر کړو، که بیا هم دوی د ماليې ورکړې ته حاضر نهشول موږ به د دغو شرکتونو نومونه له رسنیو سره شریک کړو او په خپل وېبپاڼه کې بهيې هم خپور کړو."
په ورته وخت کې د افغانستان د سوداګرۍ او صنایعو خونې مسؤلین د ماليې وزارت له دغه اقدامه د هرکلي تر څنګ له حکومته غواړي چې افغان سوداګرو ته ورته ډېرې نورې اسانتیاوې هم برابرې کړي.
د دې خونې مرستیال خان جان الکوزي د ياد برېښنايي سیستم د پرانیستې مراسمو ته وویل چې د بیلانس سازۍ د مسلکي شعبې د نهموجودیت له امله لا هم سوداګر د کمېشنکارانو ښکار کېږي.
خان جان الکوزی
نوموړي زیاته کړه:
"موږ په تېرو ۱۶ کلونو کې د بیلانس سازۍ يو قانوني او مسلکي شعبه جوړه نهکړه چې سوداګر مجبور مکلف شي او هغه تخنیکي سړي سره کېني او هغه تخنیکي کس د يوه وکیل مدافع په توګه له سوداګر څخه دفاع وکړي نو لوی مشکل دا دی چې همغږي نهشته."
د افغانستان د ماليې وزارت په داسې حال کې د سترو مالیه ورکوونکو لپاره په کابل کې په ازمایښتي ډول د خدماتو برېښنايي سیستم پرانيزې چې له دې وړاندې د افغانستان د صنعت کارانو ټولنې ویلي و چې د مالیاتو په برخه کې د يوه ځانکړي سیستم د نهموجودیت له امله د دولت د عایداتو ډېره برخه شخصي جېبونو ته ځي.
راپور: واصل وصال