افغان ولسمشر د کابل په پغمان ولسوالۍ کې د وروستي خونړي برید په تړاو په خپلو دندو کې د غفلت په خاطر د کورنیو چارو وزارت د پنځو لوړ رتبه چارواکو دندې تعلیق کړې.
له ارګ څخه خپره شوې خبرپاڼه وایي چې ولسمشر اشرف غني دغه پریکړه پرون وروسته له هغې وکړه چې د پېښې په اړه څېړنیز پلاوي خپل راپور ولسمشر ته وړاندې کړ.
د کورنیو چارو وزارت د اوله درجې مسوولینو په توګه د لاندې کسانو دندې وځنډول شوې:
د کورنیو چارو وزارت د ځینو مسوولینو دندې وځنډولې
۱: د اداري معینیت د دفتر رئیس او د جلب او جذب عمومي قوماندانۍ سرپرست مل پاسوال محمد حسن عالمي.
۲: د جلب او جذب عمومي قوماندانۍ رئیس ارکان مل پاسوال عبدالمجید صادقي.
۳: د تعلیم او تربیې عمومي قوماندان پاسوال الهام وردک
۴: د تعلیم او تربیې قوماندانۍ مرستیال مل پاسوال سردار محمد کوهدامني
۵: د میدان وردک د تربیوي پولیسو مرکز قوماندان مل پاسوال جلالدین رګبار.
د تیرې پنجشنبې په ورځ په پغمان ولسوالۍ کې د میدان وردګو د پولیسو له له اکاډمۍ څخه د فارغو شوېو پولیسو د موټرو پر کاروان په دوو انتحاري حملو کې له دیرشو زیات کسان ووژل شول او په لسګونو نور ژوبل شول.
وسله والو طالبانو د دغو بریدونو مسولیت پر غاړه اخېستی دی.