پر ایران د اسراییل او امریکا د همغږي برید وروستي جزییات

رویټرز خبري اژانس او نیویارک ټایمز لیکلي چې پر ایران د امریکا او اسراییل د ګډ برید د لومړۍ څپې هدف ایراني چارواکي وو.

تراوسه د ایران له دننه څخه د ایراني چارواکو د وضعیت او دا چې دوی ژوندي دي او که نه، راپورونه نه دي خپاره شوي.

لومړنی برید پاستور میدان باندې وشو چې هلته د ایران د مذهبي مشر ایت الله علي خامنه یي کور دی.

همهاله په ټولنیزو رسنیو کې یوه خپره شوې ویډیو ښيي چې د پخواني ولسمشر محمود احمد نژاد کور هم تر برید لاندې راغلی دی.

له عمان پرته د فارس خلیج د هېوادونو په پلازمېنو او څو مهمو ښارونو کې بریدونه شوي دي.

نړیوالو اژانسونو لیکلي چې په قطر، متحده عربي اماراتو، بحرین او سعودي عربستان کې د چاودنو غږونه اوریدل شوي دي.

تر دې وړاندې ایران ګواښ کړی و که پر دوی برید وشي، په منځني ختیځ کې به د امریکا پوځي اډې په نښه کړي.

له دې ډلې په بحرین کې د ( جفیر له سیمې) لوګي پورته کیږي.

دغلته د امریکا سمندري اډه ده.

د بحرین دولت اعلان کړی چې دغه اډه تر برید لاندې راغلې ده.

د متحده عربي امارتو په ابوظبی او دوبۍ ښارونو کې هم چاودنې شوي دي.

فرانس پریس لیکلي د سعودي عربستان پلازمینه ریاض کې هم زورورې چاودنې شوې دي.

په کویټ کې هم د خطر زنګ وهل شوی دی.

د ایران سپاه پاسداران ته نژدې فارس خبري اژانس ویلي چې " په قطر کې یې د العدید هوایي اډه، په کویټ کې یې السالم ، اماراتو کې یې د الظفره او بحرین کې یې د امریکا پنځمه اډه تر توغندیزو بریدونو لاندې راوستلې.

نیویارک ټایمز ورځپاڼې پر خپله ایکس پاڼه د ایران د مشر ایت الله علي خامنه یي د کور انځور خپور کړی دی.

دغه انځور چې پر سپوږمکۍ اخیستل شوی دی د پاستور میدان ښيي چې څو ودانۍ په کې ویجاړې شوې دي.

تر دې وړاندې راپورونه خپاره شول چې د امریکا او اسراییل د برید د لومړنۍ څپې هدف د ایران چارواکي وو.

ایراني چارواکو بیا ویلي چې خامنه یي او ولسمشر مسعود پزشکیان یې خوندي ځایونو ته انتقال کړي دي.

د ازادۍ راډیو ایراني څانګې راډیو فردا د هرموزګان ولایت د میناب د ولسوال په حواله لیکلي چې دغلته ( ۴۰ زده کوونکي) وژل شوي دي.

دا د امریکا او اسراییل په ګډو بریدونو کې د ملکیانو د مرګ ژوبلې لومړنی راپور دی.

ولسوال زیاته کړې چې ۴۸ نور زده کوونکي ټپيان شوي دي.

تر دې وړاندې د هرموزګان د والي سیاسي، امنیتي او اجتماعي مرستیال ویلي و چې دغلته د نجونو یو ښونځی د برید ( مستقیم هدف ) ګرځیدلی دی.

خپلواکو سرچینو لا په دې اړه څه نه دي ویلي.