ایران د فارس خلیج په څو هېوادونو کې د امریکا پر اډو بریدونه کړي دي
له عمان پرته د فارس خلیج د هېوادونو په پلازمېنو او څو مهمو ښارونو کې بریدونه شوي دي.
نړیوالو اژانسونو لیکلي چې په قطر، متحده عربي اماراتو، بحرین او سعودي عربستان کې د چاودنو غږونه اوریدل شوي دي.
تر دې وړاندې ایران ګواښ کړی و که پر دوی برید وشي، په منځني ختیځ کې به د امریکا پوځي اډې په نښه کړي.
له دې ډلې په بحرین کې د ( جفیر له سیمې) لوګي پورته کیږي.
دغلته د امریکا سمندري اډه ده.
د بحرین دولت اعلان کړی چې دغه اډه تر برید لاندې راغلې ده.
د متحده عربي امارتو په ابوظبی او دوبۍ ښارونو کې هم چاودنې شوي دي.
فرانس پریس لیکلي د سعودي عربستان پلازمینه ریاض کې هم زورورې چاودنې شوې دي.
په کویټ کې هم د خطر زنګ وهل شوی دی.
د ایران سپاه پاسداران ته نژدې فارس خبري اژانس ویلي چې " په قطر کې یې د العدید هوایي اډه، په کویټ کې یې السالم ، اماراتو کې یې د الظفره او بحرین کې یې د امریکا پنځمه اډه تر توغندیزو بریدونو لاندې راوستلې.
پر ایران د بریدونو د لومړنۍ څپې هدف ایراني چارواکي وو
رویټرز خبري اژانس او نیویارک ټایمز لیکلي چې پر ایران د امریکا او اسراییل د ګډ برید د لومړۍ څپې هدف ایراني چارواکي وو.
تراوسه د ایران له دننه څخه د ایراني چارواکو د وضعیت او دا چې دوی ژوندي دي او که نه، راپورونه نه دي خپاره شوي.
لومړنی برید پاستور میدان باندې وشو چې هلته د ایران د مذهبي مشر ایت الله علي خامنه یي کور دی.
همهاله په ټولنیزو رسنیو کې یوه خپره شوې ویډیو ښيي چې د پخواني ولسمشر محمود احمد نژاد کور هم تر برید لاندې راغلی دی.
د اسراییل چارواکو ویلي، ایران هم پر دوی توغندي ور ویشتي دي
د اسراییل پوځ ویلي چې ایران پر دوی توغندي ور ویشتلي دي.
د نړیوالو اژانسونو د راپورونو له مخې، د اسراییل پوځ په یوه خبرپاڼه کې ویلي چې د دوی د هوایي دفاع سیستمونه فعال شوي دي.
له دې سره د اسراییل په شمال کې د خطر زنګونه وهل شوي دي.
خلکو ته په مبایل تیلفونو کې د استول شویو پيغامونو له لارې سپارښتنه شوې چې خوندي ځایونو کې پاته شي.
پر ایران له برید سره همهاله په منځني ختیځ کې د امنیتي تدابیرو پراختیا
پر ایران د اسراییل او امریکا له بریدونو وروسته د اسراییل پوځ دغلته پر ښوونیزو پروګرامونو، راټولیدنو او کاري فعالیتونو بندیزونه اعلان کړل.
د اسراییل پوځ وایي، دغه بندیزونه په حیاتي خدمتونو نه دي لګول شوي او دغه څانګې له بندیزونو مستثنا دي.
په قطر کې د امریکا سفارت هم د شنبې په ورځ اعلان کړی چې خپلو ټولو کارکوونکو ته یې ویلي چې ( پر خپل ځای کې) پاته شي او تر دویم خبرداري پورې همدغه سپارښتنه عملي کړي.
په عراق کې هم کورنی هوایي حریم تړل شوی دی.
کاناډا هم اعلان کړی چې په تل ابیب کې خپل غیر اړین ډيپلوماتیک کارکوونکي بل ځای ته انتقالوي.
په دې وروستیو کې د کړکیچ له زیاتیدو سره همهاله ایټالیا، فرانسې، یونان، پولنډ او یوشمېر نورو هېوادونو له ایرانه خپل اتباع وایستل او یا یې هم د وتلو خبرداری ورکړ.