کرملین نن دوشنبه د ( وري ۴) مه وویل چې روسیه او متحده ایالات د اوکراین د جګړې د پای ته رسولو لپاره یوې موافقې ته د رسیدو اړتیا په اړه ګډ تفاهم لري، خو لاهم مختلف اړخونه شته چې باید کار پر وشي.
رویټرز خبري آژانس د کرملین د ویاند دیمیتري پسکوف له قوله راپور ورکړی چې وايي، د مسکو او واشنګټن ترمنځ خبرې اترې چې په سعودي عربستان کې ترسره کېږي، پر تخنیکي مسایلو متمرکزې دي، چې پکې د تور سمندرګي د نوښت موضوع هم شامله ده، کوم چې د سیمې د کښتیو د امنیت اړوند دی.
د روسیې او امریکا پلاوي نن د اوکراین د کړکېچ د حل لپاره د خبرو اترو دوهم پړاو پیل کړ.
دا خبرې اترې د یکشنبې په ورځ د امریکا او اوکراین د چارواکو ترمنځ تر غونډې وروسته ترسره کیږي.
د امریکا پلاوي تر اوسه د یکشنبې د ورځې د اوکراین سره د خبرو اترو په اړه څه نه دي ویلي، خو د اوکراین دفاع وزیر رستم عمروف، چې په دې غونډه کې یې د خپل هیواد د پلاوي مشري کوله، خبرې اترې رغنده وبللې.
هغه په ایکس پاڼه کې لیکلي چې د اوکراین د ولسمشر ولادیمیر زیلینسکي هدف د اوکراین او ټولې اروپا لپاره د عادلانه او تلپاتې سولې تامینول دي، هغه وویل چې هیواد یې هڅه کوي چې دا موخه په واقعیت بدله کړي.
په اوکراین کې د روسیې د جګړې د پای ته رسولو لپاره خبرې اترې په داسې حال کې روانې دي چې اوکرایني ځواکونه په هیواد کې د روسیې د بې پیلوټه الوتکو د بریدونو راپور ورکوي.
اوکرایني ځواکونو ادعا کړې چې په یوه ورځ کې یې د روسیې له خوا د ۹۹ توغول شویو بې پیلوټه الوتکو څخه ۵۷ یې غورځولي دي.
د رویټرز خبري اژانس دوشنبه د ( وري ۴) مه د اوکرایني ځواکونو په حواله راپور ورکړ چې ۳۶ روسي بې پیلوټه الوتکې موخو ته نه دي رسېدلي.
دا لا څرګنده نه ده چې د پاتې شپږو بې پیلوټه الوتکو سره څه شوي دي.
په سعودي عربستان کې د خبرو اترو څخه یوه ورځ مخکې، اوکراین وویل چې کیف ته نږدې د استوګنې ودانیو باندې د روسیې په برید کې یو پنځه کلن ماشوم او یوولس میاشتنی ماشوم وژل شوي دي.
کیف هم د دې بریدونو په وړاندې د ځواب اعلان وکړ.
د امریکا ولسمشر ډونالډ ټرمپ ژمنه کړې چې د روسیې او اوکراین ترمنځ به جګړه پای ته رسوي، او له همدې امله یې د اوکراین سره د خبرو اترو په لومړي پړاو کې د دېرش ورځني اوربند وړاندیز وکړ، چې اوکراین ومنله، خو روسیې یې ونه منله او ویې ویل چې په دې اړه یې ملاحظات لري.
