د امریکا د متحدهایالتونو دوو ځانګړو استازو پرون د اسرايیل له صدراعظم بنیامین نتنیاهو سره په سیمه کې د روان کړکېچ په باب خبرې وکړې.
د نړیوالې زېربنا او انرژۍ د خوندیتوب لپاره د امریکا د ولسمشرۍ ماڼۍ ځانګړي همږي کوونکي اموس هوخشټاین او د داعش په وړاندې د مقابلې لپاره په نړیوال ايتلاف کې د ولسمشرۍ ماڼۍ ځانګړي استازي برت مکګورک چې د منځني ختیځ په چارو کې د امریکا ځانګړی استازی هم دی، پرون له نتنیاهو سره بحث وکړ.
په بیتالمقدس کې تر دې کتنې وروسته د نتنیاهو دفتر ویلي، صدراعظم په ډاګه کړه، چې اصلي مسئله د دې یا نورو موافقو لپاره کاغذي کارونه نه، بلکې اصلي کار د اسرايیل هوډ او وړتیا ده، چې د دې موافقې تطبیق یقیني کړي او له لبنان څخه د هر ډول امنیتي ګواښ مخه ونیسي.
حزبالله چې د لبنان د جنوب ډېره برخه اداره کوي، یو سیاسي ګوند دی چې پوځي څانګه هم لري او د دې ډلې سیاسي څانګه د لبنان په پارلمان کې ځینې څوکۍ لري.
واشنګټن حزبالله تروریستي سازمان ګڼي، خو اروپايي ټولنې یوازې د دې ډلې پوځي څانګه د تروریستي سازمانونو په فهرست کې شامله کړې ده.
د فرانسې خبري اژانس د راپور لهمخې د اسرائيل دفاع وزیر یوآف ګالنت هم پرون د امریکا له ځانګړو استازو سره جلا-جلا کتلي دي.
ګالنت تر دې کتنې وروسته په یوه اعلامیه کې ویلي، دوی په خپلو بحثونو کې د اسرايیل د شمال پر امنیتي ترتیباتو، د لبنان پر وضعیت او په غزه کې د حماس ډلې له بنده د ۱۰۱ یرغمل شویو د راستنولو پر یقیني کولو خبرې وکړې.
پرون د لبنان له خاورې پر اسرايیل د توغندي په حملو کې د څلورو بهرنیو کارګرانو په ګډون ټولټال د ۷ کسانو د وژل کېدو راپور ورکړل شو.
دا له کله چې د اکتوبر میاشتې په لومړیو کې د لبنان پر جنوب د اسرائيل لهخوا پوځي عملیات پیل شوي، یوه له خونړیو حملو ګڼل کېږي.
په همدې حال کې لبنان هم اعلان کړی، چې د دغه هېواد پر جنوب د اسرايیل په یو لړ حملو کې ۶ روغتیايي کارکوونکي وژل شوي دي.
د امریکا د متحدهایالتونو دوه ځانګړي استازي اموس هوخشټاین او برت مکګورک په غزه کې هم د اوربند د ټینګښت هڅه کوي.
په غزه کې د ۲۰۲۳م کال د اکتوبر له اوومې د اسرايیل او حماس ډلې ترمنځ چې د امریکا متحدایالتونه او اروپايي ټولنه یې یو تروریستي سازمان ګڼي جګړه روانه ده.
د حماس تر ولکې لاندې د غزې روغتیا وزارت پرون وویل، چې د فلسطینیانو په دغه قلمرو کې د وژل شویو کسانو شمېر ۴۳زره ۲۰۴ او د ټپیانو ۱۰۱زره ۶۴۱ ته رسېدلی دی، هغه شمېرې چې بې پرې سرچینو تایید یا رد کړي نهدي.
