متحدهایالتونو او روسیې د بندیانو د تبادلې هغه نړیوال بهیر پرون بشپړ کړ چې د شوروي اتحاد تر سقوط وروسته یې ساری نهدی لیدل شوی.
د ازادي راډیو د روسي څانګې خبریاله السو کورماشېوا او د وال سټریټ ژورنال ورځپاڼې خبریال ایوان ګریشکوویچ په هغو ۲۴ بندیانو کې شامل دي چې پرون د متحدهایالتونو، روسیې او یوشمېر نورو هېوادونو ترمنځ د بندیانو د بېسارې نړیوالې تبادلې په ترڅ کې خوشې شول.
دا تبادله چې د شوروي اتحاد له پرځېدو وروسته یې ساری نهدی لیدل شوی، په ترکیه کې شوې او ترکي چارواکو هم تایید کړې ده چې شپاړس تنه بندیان د روسیې لهخوا او اته تنه روسان د امریکا او نورو هېوادونو لهخوا خوشې شوي دي.
رویټرز خبري اژانس د باخبره سرچینو په حواله خبر ورکوي چې د تبادلې پهدې پروسه کې دوه ماشومان هم شامل دي خو هغو بندیان نهدي.
د امریکا ولسمشر جوبایډن بېګا په یوه بیان کې دا معامله د امریکا د ډیپلوماسۍ لپاره یوه بریا وبلله.
د ازادې اروپا/ ازادي راډیو لوی مشر ستیفن کاپوس پرون تایید کړه چې السو کورماشېورا هم په هغه ډله بندیانو کې شامله ده چې د دې معاملې په اساس خوشې شوي دي.
ښاغلي کاپوس د امریکا د حکومت او ټولو هغو کسانو مننه وکړه چې د دې بهیر په بریا کې یې مرسته کړې ده.
کورماشېوا چې د امریکا او روسیې دوه ګونی تابعیت لري د ۲۰۲۳ کال په اکتوبر کې د روسیې په کازان کې ونیول شوه او په تېره جولای میاشت کې پهدې تور چې ګنې د روسیې د پوځ په اړه یې ناسم معلومات خپاره کړي په شپږنیم کاله حبس محکومه شوه خو د هغې کورنۍ او ازادي راډیو دواړو دا تور رد کړی و.
د دې تبادلې په اساس له کورماشېوا او ګریشکوویچ پرته یوبل امریکايی چې پاول وهالین نومېږي او په مشیګن ایالت کې امنیتي کمپنۍ لري او د کارا مورزا په نوم یوه ښځه چې په امریکا کې د استوګنې دایمي اقامه لري، هم خوشې شوي دي.
همداراز ۵ جرمنان او ۷ روسان چې په روسیه کې سیاسي بندیان وو، هم جرمني ته ستنېږي. ولسمشر بایډن وویل، په دوی کې ځینې له کلونو راهیسې بې له کوم دلیله په زندان کې وو.
د دې ۱۶ کسانو په بدل کې ۸ تنه روسان مسکو ته وسپارل شول چې له امریکا څخه ۳ نارینه، له سلووینیا څخه یو نارینه او یوه ښځه او له جرمني، ناروې او پولنډ څخه یو- یو نارینه پهکې شامل دي.
د اسوشیتیدپریس آژانس د راپور لهمخې که څه هم د واشنګټن او مسکو اړیکي پر اوکراین د روسیې له یرغل وروسته د بل هروخت پرتله ترینګلي دي، خو د دې معاملې لپاره د دواړو خواوو ترمنځ له کلونو راهیسې پټې خبرې روانې وې.
دا معامله په تېرو دوو کلونو کې د واشنګټن او مسکو ترمنځ د بندیانو د تبادلې د لړۍ وروستی مورد دی.
د ۲۰۲۲ کال په ډسمبر میاشت کې هم د ورته معاملې په ترڅ کې د امریکا د ښځو د باسکټبال نامتو ستورې بریتني ګینر متحدهایالاتو ته ستنه شوه او په بدل کې یې د وسلو خطرناک روسی قاچاقبر ویکتور بوت خوشې شو.
په همدې کال لهدې مخکې د امریکا د سمندري ځواکونو متقاعد سرتېری تریور رید د روسي پیلوټ کنستانتین یاروشینکو په بدل کې چې په امریکا کې د مخدرو موادو د قاچاق په قضیه کې بندي شوی و، خوشې شو.
