د اوکراین ولسمشر ولودومیر زیلینسکي ویلي، د برلین له کنفرانسه د اوکراین د دفاع او تر جګړې وروسته بیارغونې لپاره د میلیاردونو یورو مرستې تمه لري.
زیلینسکي د برلین د کنفرانس په پيل کې وویل چې د روسیې د بریدونو په نتیجه کې د اوکراین د برښنایي تاسیساتو نیمايي برخه ویجاړه شوې ده.
هغه ویلي، د برلین له کنفرانسه دا تمه لري چې له اوکراین سره د وسلو او مهماتو د تولید، د برښنا د بنسټیزو تاسیساتو د بیارغونې او نوي کولو لپاره میلیاردونه یورو مرستې وکړي.
هغه وویل که چېرته د روسیې د ترهګریزو هڅو وړتیا محدوده شي بیا به د واقعي سولې منلو ته اړ شي.
زیلینسکي د جرمني له صدراعظم اولاف شولز سره په ګډ کنفرانس کې د خبرو پر مهال زیاته کړه: "دا مهمه ده چې واقعیت سره مخ شو. دا جګړه یوازې د دې لپاره روانه ده چې پوتین د اوکراین پر وړاندې زموږ پر وړاندې د جګړې، ترهګرۍ او بریدونو د دوام امکان لري. کله چې د روسیې لهخوا د خپلو ګاونډیانو د ترور کولو توان محدود شي، روسیه به مجبوره شي چې د رښتیني سولې لپاره لاره ومومي."
زیلینسکي وویل په ګډه د روسیې مخه نیولی شو او وخت یې رارسېدلی چې متحدین اوکراین ته ټولې وسلې په واک کې ورکړي چې په مټ یې روسیه وباسي.
د برلین دا کنفرانس د اوکراین د ملاتړ لپاره د دوو زرو سیاستوالو، سوداګرو او نورو مخکښو استازیو په ګډون جوړ شوی دی.
ورته کنفرانس تېر کال په لندن کې هم د اوکراین د ملاتړ لپاره جوړ شوی و.
زیلینسکي داسې وخت له خپلو متحدینو د روسیې په وړاندې د درېدو لپاره لا زیاته مرسته غوښتې چې د امریکا متحده ایالتونو سږ کال د څه باندې شپېتو میلیاردو ډالرو مرسته ورسره وکړه.
همداراز د تازه راپورونو له مخې متحده ایالتونو د اوکراین د پوځ ازوو لانجمنې قطعې ته د امریکايي وسلو او روزنو د انتقال پر سر بندیزونه لرې کړي دي.
په دې سره به د اوکراین دې قطعې ته چې د جګړې لومړیو کرښو کې دي د جنګ لا زیات قوت ورکړي.
