د لاسرسۍ وړ لېنکونه

تازه خبر
سه شنبه ۵ چنګاښ ۱۴۰۳ کابل ۰۸:۲۶

نړۍ

د ایراني مقام ادعا؛ د رییسي او نورو چارواکو جنازو کې تر یو لک زیاتو افغانانو ګډون کړی و

د ایران د پخواني ولسمشر ابراهیم رییسي د جنازې مراسم
د ایران د پخواني ولسمشر ابراهیم رییسي د جنازې مراسم

د ایران یوه چارواکي ادعا وکړه چې په ایران کې د پخواني ولسمشر ابراهیم رئیسي او نورو چارواکو د جنازې په مراسمو کې تر یولک زیاتو افغان وګړو برخه اخیستې وه.

د ایران د خراسان رضوي ولایت د بهرنیو اتباعو او اتباعو عمومي ادارې مشر حسین شرافتيراد پرون جمعه په مشهد کې د «حسینیه هراتيها» په مراسمو کې دغه شمېر اعلان کړ.

د ازادي راډیو د ایرانۍ څانګې راډیو فردا د راپور له مخې، ښاغلي شرافتيراد ونه ویل چې دغه شمېرې یې څنګه ترلاسه کړي دي.

د ایران ولسمشر ابراهیم رئیسي، د بهرنیو چارو وزیر حسین امیر عبداللهیان او ځینې نور چارواکي تېره یکشنبه د څرخي الوتکې د نسکورېدو په پېښه کې مړه شول.

تر دغې پېښې دوې اوونۍ مخکې د ایران حکومت اعلان کړی و چې د یوه کال په موده کې یې د افغانانو په ګډون یو ملیون او درې لکه بهرني وګړي له ایرانه ایستلي دي.

د ورځې تازه خبرونه دلته ولولئ

د روسیې د دوو پخوانیو پوځي لوړپوړو چارواکو د نیولو حکم ورکړل شوی

د عکس ښي لور ته د روسیې د پوځ پخوانی لوی درستیز جنرال والیرې ګراسیموف او چپ لور ته د دې هېواد پخوانی دفاع وزیر سیرګي شویګو
د عکس ښي لور ته د روسیې د پوځ پخوانی لوی درستیز جنرال والیرې ګراسیموف او چپ لور ته د دې هېواد پخوانی دفاع وزیر سیرګي شویګو

د جرمونو نړیوالې محکمې د روسیې د دفاع د پخواني وزیر سیرګي شویګو او د پوځ د لوی درستیز جنرال والیرې ګراسیموف د نیولو حکم ورکړی دی.

دې محکمې د روسیې دا دوه مهم پوځي چارواکي د ۲۰۲۲م کال په فبروري کې پر اوکراین د غیرموجه یرغل له پیل راهیسې په جنګي جرمونو او د بشريت پرضد په جنایتونو محکوم کړي دي.

د دې محکمې د یوه بیان له مخې شویګو او ګراسیموف تورن دي چې په اوکراین کې یې پر ملکي اهدافو حملې تنظیم کړي او داسې جنګي جنایتونه یې کړي چې په نتیجه کې یې ملکي وګړو ته بې حده زیان اوښتی دی.

بیان زیاتوي چې د دې محکمې قاضیان باور لري چې شویګو او ګراسیموف په هغه توغندويي حملو کې لاس درلود چې د ۲۰۲۲م کال د اکټوبر او د ۲۰۲۳م کال د مارچ تر نهمې پورې د اوکراین د انرژۍ پر تاسیساتو شوي دي.

شویګو د روان کال په مې میاشت کې د ولسمشر ولادیمیر پوتین له‌خوا له دندې لیرې شو او اوس د ملي امنیت شورا مشري کوي.

اوکراین د جرمونو د نړیوالې محکمې د دې حکم هرکلی کړی دی.

روسیې په خپله خاوره کې د اوکراین د ۳۰ بې پیلوټه الوتکو د نسکورو ادعا کړې

په بېلګورد کې د بې پیلوټه الوتکو برید کې یوې ودانۍ ته زیان اوښتی دی.
په بېلګورد کې د بې پیلوټه الوتکو برید کې یوې ودانۍ ته زیان اوښتی دی.

روسیه ادعا کوي چې د اوکراین ۳۰ بې پیلوټه الوتکې یې نن سهار په خپله خاوره کې نسکورې کړې دي.

دفاع وزارت وايي، د هوايي مدافعې ځواکونو په بېلګورد سیمه کې ۲۹ او په ورونژ کې یوه بې پیلوټه الوتکه نسکورې کړې دي.

په عین حال کې د بېلګورد والي ویاچیسلاو ګلادکوف ویلي چې پر بېلابېلو سیمو د اوکراین د بې پیلوټه الوتکې په برید کې یوه ښځه وژل شوې او څلور نور کسان ټپیان شوي دي.

اوکراین د روسیې د دې ادعاوو په اړه چې خپلواکو سرچینو هم نه دي تایید کړي، څه نه دي ویلي.

پر غزې د اسراییلو د بمباریو دوام؛ ۱۳ کسان وژل شوي

په غزه کې د روانې جګړې یو انځور
په غزه کې د روانې جګړې یو انځور

که څه هم د اسراییلو صدراعظم بنیامین نتنیاهو ویلي چې په غزه کې د درنو جګړو پړاو تېر شوی، خو د اسراییلو پوځ نن بیا په دې تړانګه کې بمباریو ته دوام ورکړ.

په غزه کې پر دوو ښوونځیو او یوه کور د اسراییلي پوځ د بمباریو په نتیجه کې ۱۳ کسان وژل شوي دي.

دا په داسې حال کې ده چې واشنګټن له اسراییلو غوښتي چې د لبنان سرحد ته د دې کړکېچ له پراخولو ډډه وکړي.

اسراییلو ویلي چې په پام کې لري له غزې سره د لبنان سرحد ته یو شمېر نور سرتېري واستوي، خو د امریکا د بهرنیو چارو وزیر انټوني بلېنکن پرون د اسراییل دفاع وزیر یواف ګالانت ته ټینګار وکړ چې دا جګړه دې پراخېدو ته نه پرېږدي.

د اروپا فوټبال جام؛ دوه لوبې ترسره شوې

د اروپا فوټبال له سیالیو یو انځور
د اروپا فوټبال له سیالیو یو انځور

د اروپا د فوټبال جام د سیالیو په لړ کې پرون شپه په بي ګروپ کې دوه لوبې ترسره شوې.

لومړۍ لوبه د ایټالیا او کروشیا ترمنځ وه چې یو یو مساوي پای ته ورسېده.

اسپانیا بیا یو د صفر په وړاندې البانیا ته ماتې ورکړه.

اسپانیا تراوسه په دغه جام کې نهه، ایټالیا څلور، کروشیا دوه او البانیا یو امتیاز لري.

ټاکل شوې نن شپه هم په ډي او سي ګروپونو کې څلور سیالۍ ترسره شي.

فرانسه او پولنډ او هالنډ او اتریش به د افغانستان په وخت ماښام اته نیمې بجې د سیالۍ ډګر ته ښکته شي.

ورپسې د انګلستان او سلونیا او ډنمارک او صربستان لوبې دي چې د افغانستان په وخت د ماخوستن یولس نیمې بجې پیلېږي.

په جنوبي کوریا کې تر چاودنې وروسته اور ۲۲ کسان مړه کړي

په جنوبي کوریا کې د اور لګېدنې له سیمې یو انځور
په جنوبي کوریا کې د اور لګېدنې له سیمې یو انځور

په جنوبي کوریا کې ۲۲ کسان د لیتیوم بطریو په یوه فابریکه کې تر چاودنې وروسته په اور کې مړه شوي.

د اور وژنې مسوولانو ویلي، اور وروسته له هغه بل شو چې په یوه ډیپو کې چې شاوخوا ۳۵زره بطرۍ په‌کې وې څو کتار بطرۍ وچاودېدې.

تر اوسه نه ده معلوم چې بطرۍ ولې او څنګه وچاودېدې.

د اور وژنې ځایي چارواکي کېم‌جین یونګ خبریالانو ته وویل چې د شرکت د چارواکو د معلوماتو په حواله په مړو کې ۱۸ چینايي کارګران شامل دي.

د جنوبي کوریا ولسمشر یون سوک یول د پېښې ځای ته ورغلی او چارواکو د پېښې په اړه معلومات ورکړي.

شمالي وزیرستان کې د وسله‌والو برید؛ اووه کسان ژوبل شوي

د سیمې پولیسو او امنیتي چارواکو د ازادې اروپا مشال راډیو ته وویل چې د جون پر ۲۴مه، وسله‌والو هغه مهال د لاسي بم برید وکاروه چې د پوځ یو ګاډی له سیمې تېرېده.
د سیمې پولیسو او امنیتي چارواکو د ازادې اروپا مشال راډیو ته وویل چې د جون پر ۲۴مه، وسله‌والو هغه مهال د لاسي بم برید وکاروه چې د پوځ یو ګاډی له سیمې تېرېده.

د خیبر پښتونخوا د شمالي وزیرستان په میرعلي کې وسله‌والو د لاسي بم په برید کې اووه کسان ژوبل کړي دي.

د سیمې پولیسو او امنیتي چارواکو د ازادې اروپا مشال راډیو ته وویل چې د جون پر ۲۴مه، وسله‌والو هغه مهال د لاسي بم برید وکاروه چې د پوځ یو ګاډی له سیمې تېرېده.

چارواکي وایي، بم پوځي ګاډي ته زیان نه دی رسولی، خو په بازار کې پرې ولسي خلک ژوبل شوي او د ملکیانو دوه موټر ویجاړ شوي دي.

وسله‌وال تر بریدو وروسته تښتېدلي او ژوبل کسان د میرلي روغتون ته د درملنې لپاره لېږدول شوي دي.

تراوسه د برید مسوولیت چا نه دی منلی.

د جون په ۱۸مه هم په میرعلي ایسوړي کې وسلوالو درې کسان په هدفي برید کې وژلي وو او په یو بل برید کې یې د میرانشاه چشمه پل پوسته کې شپږ امنیتي عسکر ژوبل کړي وو.

شل اوریز نړیوال جام؛ هندوستان هم نیمه پایلوبې ته لار پیدا کړه

د هند له لوبې یو انځور
د هند له لوبې یو انځور

د کرکټ شل اوریز نړیوال جام د اتو غوره لوبډلو په پړاو کې هندوستان د ۲۴ منډو په توپیر اسټرالیا ته ماتې ورکړه او نیمه پایلوبې ته ورسېده.

دغه سیالي چې نن دوشنبه د کابل پر وخت ماښام ۷:۰۰ بجې پیل شوې وه، هند لومړۍ توپوهنه وکړه او د ۲۰۶ منډو هدف یې وټاکه.

د هند لوبډلمشر روحیت شرما په دې سیالۍ کې ۹۲ منډې وکړې.

اسټرالیا د ۷ لوبغاړو تر سوځېدو وروسته په ۲۰ اورونو کې ۱۸۱ منډې وکړې.

یادې لوبډلې ته ټرېوېس هېډ ۷۶ منډې وکړې او هند ته بیا ارشدیپ سینګ ۳ لوبغاړي وسوځول.

د ۸ غوره لوبډلو په پړاو کې وروستۍ سیالي سبا سه شنبه د کابل پر وخت سهار ۵:۰۰ بجې د افغانستان او بنګله دېش ترمنځ پیلېږي.

که دغه سیالي افغان لوبډلې وګټله نو نیمه پایلوبې ته به ورسېږي.

امریکا پر لبنان د اسراییل د احتمالي برید په وړاندې خبرداری ورکړ

د امریکا د پوځ یو جګپوړي جنرال وايي، پر لبنان د اسراییل پوځي برید دا خطر لري چې ایران د حزب الله دفاع ته راودانګي او دا پېښه په سیمه کې د جګړې د پراخېدو او امریکايي ځواکونو ته د ګواښ سبب کېدای شي.

د امریکا د پوځ لوی درستیز او د هوايي ځواک جنرال چارلس کیو براون پرون یکشنبې وویل چې ایران به په داسې حالت کې د حزب الله نور ملاتړ وکړي، په تېره بیا که دوی احساس کړي چې د حزب الله موجودیت له جدي خطر سره مخامخ دی.

براون دا څرګندونې د افریقايي هېواد بوتسوانا د سفر په ترڅ کې وکړې.

نوموړی د افریقايي هېوادونو د دفاع وزیرانو په غونډه کې د ګډون لپاره بوتسوانا ته تللی دی.

اسراییلي چارواکو ګواښ کړی چې که د خبرواترو له لارې د لبنان حزب الله له پولې څخه شا ته نه شي، د دغه هېواد پوځ به پر لبنان برید وکړي.

امریکایي چارواکي هڅه کوي چې دغو شخړو ته یوه دیپلوماتیکه حللاره ومومي.

تمه کېږي چې دا مسئله به روانه اوونۍ په واشنګټن کې له امریکايي چارواکو سره د اسراییل د دفاع وزیر یوف ګالانت په کتنو کې مطرح شي.

نړیوال جام؛ سویلي افریقا او انګلستان نیمه پایلوبې ته ورسېدل

د ویسټ اینډیز او سویلي افریقا له لوبې یو انځور
د ویسټ اینډیز او سویلي افریقا له لوبې یو انځور

د کرکټ په روان شل اوریز نړیوال جام کې د اتو غوره لوبډلو د پړاو په دویم ګروپ کې سویلي افریقا د کوربه ویسټ اینډیز په ماتولو سره په نیمه پایلوبه کې خپل ځای پوښ کړ.

د دوشنبې په ورځ د جون په ۲۴مه نېټه سویلي افریقا او ویسټ اینډیز سیالي ترسره کړه چې یاده سیالي د ۳ وېکټو په توپیر سویلي افریقا وګټله او نیمه پایلوبې ته یې لار پیدا کړه.

دا د اتو غوره لوبډلو په پړاو کې د سویلي افریقا درېیمه بریا وه.

دغه راز انګلستان بیا تر دوو بریاوو وروسته د دویمې لوبډلې په توګه نیمه پایلوبې ته ورسېده.

په دې ګروپ کې کوربه ویسټ اینډیز او امریکا نیمه پایلوبې ته له رسېدو پاتې شول.

ټاکل شوې چې نن له اول ګروپ څخه د هندوستان او اسټرالیا ترمنځ مهمه سیالي ترسره شي.

دغه سیالي چې نن د کابل پر وخت ماښام ۷:۰۰ بجې پیلېږي که یې هندوستان وګټي، نو نېغ په نېغه به نیمه پایلوبې ته لاړه شي او که اسټرالیا وګټله بیا به د افغانستان او بنګله‌دېش تر سیالۍ وروسته څرګندېږي چې له دې ګروپ څخه کومې دوه لوبډلې نیمه پایلوبې ته رسېږي.

د اتو غوره لوبډلو د پړاو وروستۍ سیالي به د افغانستان او بنګله‌دېش ترمنځ سبا سه شنبه د کابل پر وخت سهار ۵:۰۰ بجې پیل شي.

د ویلو ده چې د نیمه پایلوبې پړاو د جون په ۲۷مه نېټه پيلېږي او پایلوبه به د جون په ۲۹مه نېټه وي.

برون: لبنان ته د اسراییلو د عملیاتو غځېدل به د ایران د غچ اخیستنې خطر له ځان سره ولري

د اسراییل او لبنان د پولو څنډو کې د راکټي بریدونو له کبله اور لګېدلی دی.
د اسراییل او لبنان د پولو څنډو کې د راکټي بریدونو له کبله اور لګېدلی دی.

د امریکا د پوځ یوه لوړپوړي چارواکي خبرداری ورکړی چې لبنان ته د اسراییلو د پوځي عملیاتو غځېدل به د ایران د غچ اخیستنې خطر له ځان سره ولري.

د امریکا د ګډې قومندانۍ مشر او د هوایي ځواکونو جنرال سي کیو برون پرون یکشنبه خبریالانو ته ویلي، پر لبنان عملیات پراخه جګړه پارولی شي چې ورسره په سیمه کې مېشتو امریکایي ځواکونو ته هم خطر پېښېږي.

د اسوشېټېډپرېس په وینا، تر دې وړاندې د اسراییلو چارواکو ګواښ کړی که خبرې د دې لامل نه شي چې حزب‌الله ډله له سرحدي سیمو په شا شي، دوی به پر لبنان عملیات وکړي.

څو ورځې وړاندې د اسراییل پوځ وویل، د لبنان عملیاتو ته یې یو باوري پلان چمتو کړی دی.

حزب‌الله چې د ایران له ملاتړه برخمنه ډله بلل کېږي، د غزې د جګړې له پيله وخت نا وخت پر اسراییلو توغندیز بریدونه کوي او اسراییل یې هم اهداف په نښه کوي.

نور راوښيه

XS
SM
MD
LG