د اسراییل د بهرنیو چارو وزیر اسراییل کاتس نن په ایکسپاڼه( پخواني ټویټر) کې لیکلي دي چې هېواد به یې د غزې له جګړې وروسته هلته د فلسطیني کډوالو لپاره د ملګرو ملتونو د ادارې( یو این روا) فعالیتونه ودروي.
اسراییل د دې ادارې یو شمېر کارکوونکي تورن کړې دي چې د اکتوبر په اوومه یې پر اسراییل د حماس په حمله کې لاس درلود.
د دې برید له امله د اسراییل دننه شاوخوا دولس سوه کسان ووژل شول او وسله والو نژدې دوه سوه څلوېښت اسراییلیان برمته کړل.
د اسراییل تر تور وروسته د امریکا متحد ایالتونو د جمعې په ورځ وویل چې تر هغو به د فلسطیني کډوالو لپاره د ملګرو ملتونو له ادارې سره د دوی مرستې بندې وي چې دا پېښه سمه څېړل کیږي.
د اروپایي ټولنې په استازیتوب بیا پرون د دې ټولنې د بهرنۍ تګلارې مشر جوزیپ بوریل وویل چې اروپایي ټولنه به دا مساله وارزوي او بیا به خپله پرېکړه اعلان کړي.
نن د دې ټولنې مهم غړي هېواد، ایټالیا اعلان وکړ چې د فلسطیني کډوالو په چارو کې د ملګرو ملتونو ( یو این روا) پر ادارې به مرستې بندې کړي.
د ایټالیا د بهرنیو چارو وزیر انتونیو تاجاني په ایکسپاڼه( پخواني ټویټر) کې لیکلي دي چې د ایټالیا حکومت پر ( یو این روا) خپلې مرستې ودرولې.
د ایټالیا د بهرنیو چارو وزیر دا خبره هم کړې ده چې د هېواد مرستې به یې له فلسطنیانو سره روانې وي او د اسراییل د امنیت حمایت به هم کوي.
د اکتوبر د اوومې نېټې تر حملو وروسته اسراییلي ځواکونو د غزې پر تړانګې د ځمکې، هوا او اوبو له لارې بریدونه پیل کړل.
په غزه کې د فلسطینیانو د روغتیا وزارت نن خبر ورکړ چې د دې بریدونو له پيله تر اوسه لږ تر لږه شپږ ویشت زره دوه سوه اووه پنځوس فلسطنیان وژل شوي او څلور شپيته زره اووه سوه اووه نوي نور ټپیان شوې دي.
د فلسطیني کډوالو په چارو کې د ملګرو ملتو اداره وایي چې د خپلو څو تنو هغو کارکوونکو په اړه یې تحقیقات پیل کړې دي چې تور پرې پورې شوی دی چې پر اسراییل یې د اکتوبر د اوومې نېټې په بریدونو کې لاس درلود.
دې ادارې پرون دا خبر هم ورکړ چې له دې مشکوکو کارکوونکو سره یې اړیکي پرې شوې دي.