د لاسرسۍ وړ لېنکونه

تازه خبر
چهارشنبه ۱۹ سلواغه ۱۴۰۱ کابل ۰۱:۵۲

ایران کې د حکومت ضد لاریونونو دوام؛ محصلانو نوې غوښتنې مطرح کړي


ایران کې د لاریونونو یوه څنډه

د ایران په یو شمېر پوهنتونونو کې د حکومت ضد اعتراضونو د دوام راپورونه ورکول کېږي.

د ایران د محصلینو ټولنې ویلي چې په امیرکبیر، علم او صنعت، علم او فرهنګ پوهنتونونو او د تهران په ګډون یو شمېر پوهنځیو کې محصلینو د اعتراض په توګه پلتۍ وهلي دي.

د اصفهان د صنعتي پوهنتون محصلانو په یوه لاریون کې له نورو محصلینو هم غوښتنه وکړه چې له دغو اعتراضونو سره یوځای شي.

د ازادي راډیو فردا څانګې د دغو اعتراضونو ویډیوګانې ترلاسه کړي او پر ویبپاڼې یې خپرې کړي دي.

د زنداني محصلانو سمدستي خوشې کېدل او په پوهنتونونو کې د سختو امنیتي تدابیرو لغوه کول د معترضو محصلانو له اصلي غوښتنو څخه دي.

دوی همداراز په کردستان او سیستان بلوچستان ولایتونو کې د مظاهرو ملاتړ وکړ.

د ایران لوی مشر آیت الله علي خامنه اي
د ایران لوی مشر آیت الله علي خامنه اي

په عین حال کې د ایران لوی مشر آیت الله علي خامنه اي د بسیج ځواک له یو شمېر چارواکو سره په کتنه کې په غیرمستقیم ډول د مظاهره چیانو په ځپلو کې د هغوی د رول ملاتړ وکړ او ادعا یې وکړه چې په وروستیو پېښو کې پر بسیجیانو د ده په وینا ظلمونه شوي دي.

دغه ادعا داسې مهال کېږي چې په ډېرو ویډیوګانو کې لیدل کېږي چې د بسیج ځواک غړي اعتراض کونکي وهي ټکوي او خفیه پولیس هم د خلکو پر کورونو چاپې وهي.

له نږدې دوو میاشتو راهیسې د ایران د پلازمېنې تهران په ګډون د دې هېواد په ډېرو ښارونو کې مظاهرې روانې دي.

دغه مظاهرې وروسته له هغې پیل شوي چې د حجاب د نه مراعتولو په تور د پولیسو په توقیف کې تر شکنجې لاندې د مهسا امیني په نوم د یوې ځوانې نجلۍ د مړه کېدو راپورونه ورکړل شول.

د بشري حقونو د مدافع ډلو په وینا په ایران کې په دغو تاوتریخجنو مظاهرو کې له ۴۰۰ زیات مظاهره چیان وژل شوي او په زرګونو نور بندیان شوي دي.

XS
SM
MD
LG