د ایران د بشري حقونو سازمان په ایران کې په روانو مظاهرو کې د تلفاتو له زیاتوالي خبر ورکړی او د نورو وژنو د مخنیوي لپاره یې له نړیوالې ټولنې د غبرګون غوښتنه کړې ده.
د ایران د بشری حقونو سازمان چې مرکز یې په اوسلو کې دی، د شنبې په ورځ خبر ورکړ چې په اوسنیو مظاهرو کې د وژل شویو کسانو شمېر ۳۲۶ تنو ته رسېدلی.
د سازمان په خبره له دې ډلې ۴۳ یې ماشومان او ۲۵ وژل شوې ښځې دي.
په وژل شویو ماشومانو کې دری افغانان هم شامل دي.
د دغه سازمان معلومات ښيي چې د وژل شویو کسانو شمېر یواځې له ۲۲ ولایتونو راپور شوی او ډېرې وژنې په سیستان بلوچستان، تهران، مازندران، کردستان،زاهدان او ګیلان ولایتونو کې شوي.
د ایران د بشري حقونو سازمان د مظاهره چیانو په وړاندې د ایران د ځواکونو ځپونکو اقداماتو ته په کتو له نړیوالې ټولنې غوښتي چې په وخت اقدام وکړي او د ډېرو خلکو د وژنې مخه ونیسي.
پرون شنبه هم د ایران په یو شمېر پوهنتونونو کې د محصلینو اعتصاب او اعتراضي غونډې روانې وې.
د ازادې اروپا راډیو فارسي څانګې فردا راډیو په سنندج او د تهران د ساینس او کلتور په پوهنتونونو کې د محصلینو د مظاهرو څو ویډیوګانې ترلاسه کړي.
په دې ویډیوګانو کې لیدل کېږي چې مظاهره کوونکي د حکومت پر ضد شعارونه ورکوي.
د تهران د علومو او کلتور پوهنتون محصلینو د مرګ پر دیکتاتور شعارونه ورکول.
د تهران د بهشتي پوهنتون محصلینو هم خپلو مظاهرو ته دوام ورکړ.
له بلې خوا حکومتي چارواکو هڅه کړې چې د دغو مظاهرو یو بل روایت وړاندې کړي.
د ایران د قضائیه قوې مرستیال کاظم غریب آبادي چې نیویارک ته په سفر تللی، په امریکايي ټولنیزو شبکو تور لګولی چې ګواکې د ایران د اسلامي جمهوریت پرضد د تبلیغاتو لپاره یې په لسګونو زره جعلي اکاونټونه جوړ کړي دي.
له بلې خوا د جرمني صدراعظم اولاف شولتڅ د شنبې په ورځ په ټوېټر کې په یوه پیغام کې ویلي چې اروپا باید د ایران د سپاه پاسداران او د ایران پر حکومتي چارواکو د نویو بندیزونو په لګولو سره نور فشار راوړي.
اولاف شولتڅ د ایران د بهرنیو چارو له وزیر امیرحسین عبداللهیان څخه وپوښتل: "تاسو څنګه حکومت یاست چې په خپلو خلکو ډزې کوئ؟"
په ایران کې له پنځوسو ورځو راهیسې مظاهرې روانې دي.
دغه اعتراضونه وروسته له هغه پیل شول چې د مهسا امیني په نوم یوه ځوانه نجلۍ چې د حجاب د نه مراعتولو په تور نیول شوې وه، د اخلاقي پولیسو په توقیف کې مړه شوه.
د هغې پلویانو او کورنۍ ویلي چې هغه د وهلو ټکولو له امله مړه شوې، خو چارواکو ویلي چې هغه ناروغه وه او سکته یې کړې.
