په پنجشېر کې د احمدشاه مسعود د قبر د یوې برخې ړنګېدو غبرګونونه راپورته کړي.
یو ځل بیا په ټولنیزو رسنیو کې د احمدشاه مسعود د قبر د یوې برخې د ویجاړېدو ویډیو خپره شوې.
په دې ویډیو کې لیدل کېږي چې د هغه د قبر په سر هغه تېږه چې د هغه په اړه لیکل پرې شوي، ړنګه شوې او پر ځمکه پرته ده.
دا دویم ځل دی چې د طالبانو تر واکمنۍ لاندې په پنجشېر کې د دې پخواني جهادي قوماندان چې د طالبانو سره یې خورا سختې جګړې کړي، مقبره تخریبېږي.
له دې وړاندې داسې راپورونه هم خپاره شوي چې طالبانو په کندهار کې د دې ولایت د پخواني قوماندان جنرال عبدالرازق مقبره د موټرو په تمځای بدله کړې ده.
جنرال عبدالرازق هم د طالبانو پر وړاندې خورا سخت دریځ درلود او طالبان یې له پاکستان په ملاتړ او د افغانستان په ورانۍ تورنول، هغه څه چې طالبانو تل رد کړي.
د طالبانو له ویاند او د کورنیو چارو وزارت مو په پنجشېر کې د احمدشاه مسعود د مقبرې د یوې برخې د ړنګېدو په اړه وپوښتل، خو هېڅ ځواب یې ورنه کړ.
خو یو شمېر پخوانیو افغان چارواکو او سیاسیونو په دې کار سختې نیوکې کړي.
د ملي مصالحې عالي شورا پخواني رییس عبدالله عبدالله په خپله فېسبوکپاڼه دا کار د شریرو او غیر مسوولو کسانو کړنه بللې او زیاتوي: "دا کړنه په هر ډول شرایطو کې، په ځانګړي ډول په اوسنیو شرایطو کې چې زموږ خلک تر هر وخته ډېر همدلۍ او همپالنې ته اړتیا لري، کولای شي چې د هېوادوالو ملي روحیه شدیداً زیانمنه کړي او په زړونو او دماغونو کې د کینې او نفاق تخم وکري."
عبدالله همدا ډول په وروستیو ورځو کې د بدخشان پوهنتون او په کابل کې له معترضو مېرمنو سره د طالبانو لهخوا له تاوتریخوالي ډک چلند د تاسف وړ بللی دی.
پخواني جهادي قوماندان عبدالرب رسول سیاف هم په خپله فېسبوکپاڼه دا عمل د دین خلاف او د انساني ارزښتونو ضد بللی او زیاتوي، داسې ډول کړنې د ملي یووالي پر وړاندې کلکه ضربه ده.
د جمعیت اسلامي ګوند دوو غړو چې هر یو یې ځان د دې ګوند مشر بولي صلاحالدین رباني او عطامحمد نور هم په دې اړه تُندې څرګندونې کړي.
صلاحالدین رباني دا د طالبانو کار بللی او او په خپله فېسبوکپاڼه یې لیکلي: "د افغانستان د ملي اتل مقبرې ته په پرله پسې ډول سپکاوی د طالبانو د ډلې د تفرقې او نه ماتېدونکي سیاستونو یوه بله ښکاره نښه ده."
عطامحمد نور بیا په خپله فېسبوکپاڼه دا کار د قومونو، ژبې او ملي هویت پر ضد جګړه بللې او طالبان یې د یوه خاصې ژبې او د ځینو قومونو سره په تبعیضي چلند تورن کړي دي.
له طالبانو مو د دې نیوکو او له خلکو سره د دوی د چلند په اړه هم وپوښتل، خو هېڅ چارواکي او ویاند یې ځواب ورنه کړ.
دا په داسې حال کې چې طالبانو له دې وړاندې د کابل پوهنتون د ښکلي هنرونو د پوهنځي مخته جوړه شوې مجسمه هم لهمنځه وړې، تر خوا یې په بامیان کې د پخواني جهادي قوماندان عبدالعلي مزاري تندیس هم تخریب کړې، همدا ډول د یو شمېر مشاهیرو تصویرونه چې په ځینو ولایتونو کې رسامي شوي و، رنګ کړي.
