د کاناډا حکومت د نویو غوښتونکو لپاره د افغان کډوالۍ ځانګړی پروګرام بندوي.
یو کال وروسته له دې چې د کاناډا حکومت د افغانانو منل پیل کړل، سي بي ایس نیوز اوس راپور ورکوي چې "اوټاوا د نویو غوښتونکو لپاره د افغان مهاجرت ځانګړی پروګرام بندوي."
د سي بي سي نیوز موندنې ښيي، چې د کاناډا حکومت د هغو ۱۸۰۰۰ غوښتنلیکونو وروستۍ ارزونه کوي کوم چې افغانان هیله لري د دې پروګرام له لارې دې هېواد ته راشي.
دا پروګرام نږدې یو کال وړاندې، د ۲۰۲۱ کال په اګست میاشت کې د طالبانو لاس ته د کابل له سقوط څو اوونۍ وړاندې او د لومړي وزیر جسټن ټروډو له ژمنې مخکې، چې ۴۰ زره افغانان به کاناډا ته انتقال کړي، رامنځته شو.
د دغه پروګرام موخه د کاناډا د حکومت له نظامي او ملکي سکتور سره د افغان همکارانو خوندي ځای ته لېږدول وو.
خو لا هم یو شمېر هغه کسان چې د کاناډا له حکومت سره همکار وه له نامعلوم برخلیک سره په افغانستان کې پاتې دي او د دغه هېواد قبولۍ ته سترګي په لاره دي.
له دغو غوښتونکو څخه يو تن چې د افغانستان په لوېديځ کې د کاناډا حکومت په مالي مرسته د يوې مرستندويه موسسې کارکوونکى و، د نوم د نه ښودلو په شرط ازادي راډيو ته وويل چې د طالبانو په لاس د حکومت د نسکورېدو په لومړیو کې د دوی د نومونو لېست د کاناډا حکومت ته استول شوی و، خو تر اوسه نه دي توانېدلي چې له دغه هېواد څخه د دوی د دوسیې د منلو سند ترلاسه کړي.
هغه د طالبانو د واکمنۍ تر سیوري لاندې د ژوند د خراب وضعیت په اړه داسې وایي: "هغه دفترونه چې زموږ دفتر هم په کې شامل وو، د کارکوونکو نوملړ او اسناد يې د کاناډا حکومت ته لېږلي وو. په تېرو مياشتو کې د کاناډا حکومت زموږ څخه د ځينو اسنادو غوښتنه وکړه، خو څو مياشتې کېږي چې موږ ته کوم خبر نه دی راکول شوی، چې ایا زموږ کار به پروسس شي یا زموږ د وتلو شرایط به چمتو کړي که نه."
د دغه راپور پر بنسټ، کاناډا د تېر کال په اګست میاشت کې د طالبانو له واکمنۍ راهیسې ۱۶۵۴۰ افغانانو ته د اوسېدو د ځای زمینه مساعده کړې ده.
اوس د سي بي سي نیوز د راپور له مخې، فدرالي حکومت د ۴۰ زره افغانانو له ډلې یوازې نیمايي یې دغه هېواد ته لېږدولي او نیمايي لارې ته له رسېدو مخکې یې د نویو غوښتنو د منلو بهیر بند کړ.
د دغه راپور پر بنسټ، د کډوالو مدافع وکیلانو ویلي، چې د دغه پروګرام د پای ته رسولو پرېکړه به هغه افغانان بې برخلیکه پرېږدي چې هیله لري دغه هېواد ته راشي.
په همدې حال کې د سي بي سي د موندنو پر بنسټ، ظاهراً د کاناډا حکومت به د کاناډا د حکومت د افغان همکارانو د ۱۸ زره غوښتنو په منلو سره چې دوسیې یې روانې دي، کاناډا ته د ۴۰ زره افغانانو د لېږلو هدف ته نږدې شي.
له دې ټولو سره سره، کاناډا ته د کډوالۍ خوب د اسیې په څېر د بې شمېره افغانانو لپاره چې د کاناډا د حکومت مثبت ځواب ته منتظر دي، ناڅرګند دی.
