د لاسرسۍ وړ لېنکونه

تازه خبر
شنبه ۴ چنګاښ ۱۴۰۱ کابل ۰۳:۳۱

د هند لوبډلې پر وړاندې د افغان فوټبال لوبډلې ماتې غبرګونونه راپارولي


د افغانستان د فوټبال ملي لوبډلې د شنبې په ورځ د اسیا د ملتونو جام لپاره د لارې موندنې په دوهمه سیالۍ کې ۱-۲ له هنده ماتې وخوړه.

وروسته له هغې چې افغانستان له هند نه د فوټبال د اسیا د ملتونو جام سیالیو ته د لارې موندنې په سیالۍ کې ماتې وخوړه ګڼ غبرګونونه یې راوپارول.

د افغانستان د فوټبال ملي لوبډله له هندوستان نه په ماتې سره د اسیا د ملتونو په جام کې له مخکې تګه پاتې شوه.

د افغان لوبډلې دغې ماتې ته خلکو او د فوټبال فدارسیون پخوانیو چارواکو غبرګونونه ښودلي.

د فوټبال لوبې مینه وال ندیم ازادي راډيو ته وویل: "زما په نظر موږ ښه ټيم لرو خو هغه روحیه چې د نورو هېوادونو ټیمونه لري زموږ ټیم یې نه لري، د دې لپاره چې د طالبانو په راتګ سره ورزش سخته ضربه خوړلې."

د فوټبال یو بل مینه وال شېردل وايي: "ښايي ستونزه په رهبرۍ کې وي چې ونه شوای کړای لوبډله سمه رهبري کړي، بله خبره دا ده چې زموږ لوبډله سمه نه تشویق کېږي، د خپل ټیم له ماتې زیات جګرخونه یم."

دا په داسې حال کې ده، چې د افغانستان د فوټبال ملي لوبډلې د شنبې په ورځ د اسیا د ملتونو جام لپاره د لارې موندنې په دوهمه سیالۍ کې ۱-۲ له هنده ماتې وخوړه.

افغانستان چې په خپل ګروپ کې له هانګ کانګ، هند او کمبودیا سره دي په دې ماتې سره په درېیم مقام کې پاتې کېږي.

خو د افغانستان د فوټبال فدارسیون پخواني چارواکي بیا د دې ماتې یو لامل د فدارسیون د اوسنیو مسوولانو مدیریتي ضعف په ګوته کوي.

د ملي لوبډلې پخوانی روزونکی علي اصغر اکبر زاده له ازادي راډيو سره په خبرو کې وویل: "دا د فوټبال فدارسیون د مشرانو، ښاغلي یوسف کارګر او انوش دستګیر د بې پامې له امله و چې زموږ ملي ټیم ونه شوای کړای د اسیا د ملتونو جام سیالیو ته لاره پیدا کړي، په فدراسیون کې کسان د روابطو پر بنسټ ټاکل شوي."

نوموړې همداراز د ملي ټیم د ماتې یو بل لامل په ملي لوبډله کې د هغه بهرنیو لوبغاړو شتون په ګوته کړ چې ترمنځ یې سمه همغږي نه شته.

هغه وايي، دغه لوبغاړي له یو بل سره د نه همغږۍ ترڅنګ ګډ تمرینونه هم نه لري.

د افغانستان د فوټبال فدارسیون هم دغه ماتې یوه ترخه تجربه یادې کړې.

موږ هڅه وکړه چې په دې اړه د افغانستان د فوټبال فدراسیون رییس یوسف کارګر نظر هم واخلو خو زموږ اړیکې یې ځواب نه کړه.

له بلې خوا بیا د طالبانو حکومت د ملي المپیک کمېټې د نشراتو برخې مسوول سمیر هیبت د دغو نیوکو په اړه وویل: "هر ورزش ماته او بریا لري او دا یو اصل دی، د یوې لوبډلې ماته او بریا نه شي کولای د یوې ادارې ټولې کړنې تر پوښتنې لاندې راولي."

د افغانستان د فوټبال ملي لوبډله سره له دې چې د اسیا په ملتونو جام کې د مخکې تک چانس نور نه لري خو د سې شنبې په ورځ به د کمبودیا پر وړاندې د سیالۍ ډګر ته ووځي.

افغانستان په خپلې لومړۍ لوبه کې له هانک کانګ کانګ نه ۱-۲ په وړاندې ماتې خوړلې وه.

XS
SM
MD
LG