د اوکراین پوځ وایي، روسیې د اوکراین د لوهانسک سیمې په ختیځ کې حملو ته شدت ورکړی.
د اوکراین پوځ نن وویل، روسي ځواکونو چې سیویردونیڅک ښاریې محاصره کړی، شپه او ورځ پرې بې توپیره بمباري کوي.
د اوکراین د وسله والو ځواکونو لوی درستیز نن سهار وختي وویل چې د اوکراین مدافعانو په تېرو ۲۴ ساعتونو کې د دښمن یولس بریدونه په داسې حال کې په شا تمبولي چې روسي ځواکونو په پر لهپسې دول هڅه کړې وه چې له ډېرو الوتکو څخه د تاسیساتو د ویجاړولو لپاره کار واخلي او د مقاومت سنګرونه مات کړي.
په سیویر دونیڅک ښار کې د سیمې والي سرهې هایډې وویل، روسي ځواکونه هڅه کوي چې د ځمکې د سوځولو له تاکتیک څخه په استفادې په قصدي توګه ښار ویجاړ کړي اوپرې د محاصرې کړۍ تنګه کړي.
د اوکراین پوځ پرون په خپله فېسبوک پاڼه کې په دونیسک سیمه کې د لږ تر لږه اوو ملکیانو د وژل کېدو او اتو نورو د ټپي کېدو خبره کړې ده.
اوکرایني چارواکو دغه راز ویلي چې روسيې په شمال کې د اوکراین پر دوهم لوی ښار خارکییف او په جنوب کې په مایکولاییف او زاپوریژیا د توپونو او توغندویو بریدونو ته زور ورکړی دی.
د بریتانیا پوځي استخباراتو نن په خپل ورځني خبري بولیټن کې وویل چې د روسي ځواکونو د تلفاتو لوړه کچه پر دونباس د بریدونو په دوام سره لا د لوړیدو په حال کې ده او کمزوري او د ټیټې سطحې تکتیکونه، ناکافي هوايي پوښښ او کمزوری انعطاف یې د لاملونو په توګه یاد کړي.
دغه راز د بريتانيا پوځي استخباراتو ویلي یې دي چې د قوماندې دغه تګلاره د دې سبب کېږي چې روسي ځواکونه ناکامه شي او پخوانۍ تیروتنې تکرارشي.
د بریتانیا استخباراتو ویلي چې د اوکراین په ختیځ کې سختې جګړې د روسیې پوځ ته ډېر زیان اړولی او اټکل کوي چې د اوکراین د جګړې په لومړیو دریو میاشتو کې مسکو ته دومره تلفات رسیدلي چې پر افغانستان د پخواني شوروي اتحاد د یرغل په نهو کلونو کې اوښتي و.
د بریتانیا پوځي استخباراتو دغه راز ویلي چې په دوامداره توګه د مرګ ژوبلې زیاتوالی کولای شي په کور دننه د خلکو نا رضایتي را وپاروي هغه مسله چې په روسیه کې په تېرو وختونو کې په هغو جګړو کې چې دې هېواد په خپله پیل کړي، حساسه ثابته شوې ده.
